Stojkaściu abaroncaŭ Maryupala ŭražany ceły śviet. Jak i ich taktyčnymi ŭmieńniami. Niahledziačy na toje, što rasijanie praktyčna całkam zrujnavali horad, u jakim ciapier niama vady, aciapleńnia i praduktaŭ, zabłakavali jaho z mora, ukrainskija abaroncy praciahvajuć da apošniaha bicca za hety stratehična važny horad na bierazie Azoŭskaha mora.
Rasijanie atakavali horad ź niekalkich bakoŭ. Prykładna tydzień abaroncy horada strymlivali voraha na podstupach da horada. Koła akružeńnia vakoł Maryupala zamknułasia 3 sakavika, na 8-y dzień vajny. Rasijanie pastupova ściskali hetaje koła. Praź miesiac, u pačatku krasavika, zastalisia try ačahi abarony: centr horada, port i zavod «Azoŭstal». U porcie trymałasia bryhada ŭkrainskich marpiechaŭ, na «Azoŭstali» — połk «Azoŭ»
Taktyka rasijan była brutalnaja: jany bambili, bambili, bambili i abstrelvali horad z ustanovak załpavaha ahniu. Kolki zahinuła mirnych žycharoŭ — mahčyma, nichto nikoli nie padličyć. Rasijanie pryvieźli z saboj mabilnyja krematoryi, kab spalvać zabitych. Pradstaŭniki haradskoj administracyi nazyvajuć ličby: moža być da 20 tysiač, moža być, bolš za 20.
13 krasavika, na 49-y dzień abarony, paŭ port. Častka marpiechaŭ z bojem prarvalisia z zavoda imia Iljiča da «Azova» na «Azoŭstali». Dziakujučy Starlink-u, jany majuć suviaź sa śvietam. Kiraŭniki abarony ŭ viečar paśla praryvu zapisali videazvarot:
Bieznadziejnaja, zdavałasia b, situacyja, ale jaki spakoj vypramieńvaje ŭkrainski kamandzir.
Što za čałaviek, jaki akazaŭsia zdolny nie tolki arhanizavać takuju składanuju abaronu, ale i trymać bajavy duch svaich bajcoŭ u akružeńni šmatkroć macniejšaha voraha?
Padnačalenyja źviartajucca da jaho prosta «druža Redys» (z naciskam na pieršy skład).
Vykarystańnie mianušak — tradycyja pałka. Tut usie źviartajucca adzin da adnaho ŭ styli «druža Bazyl» abo «druža Buhaj». «Azoŭ» stvarali futbolnyja fanaty. Sam Prakapienka tapiŭ za kijeŭskaje «Dynama». Za zbroju ich prymusiŭ uziacca 2014 hod, kali Rasija zabrała Krym i pieršy raz pasprabavała zachapić poŭdzień Ukrainy. Paśla Janukoviča armija Ukrainy była ŭ vartym žalu stanie. Abaraniać krainu daviałosia voś hetym pacanam, i jany strymali ruskich pad Danieckam. Voś vakoł taho kaściaka matyvavanych ramantykaŭ i źjaviŭsia «Azoŭ».
«Druh Redys» pryjšoŭ u «Azoŭ» 11 lipienia 2014 hoda prostym hranatamiotčykam. A pieramirje 2015 hoda jon užo sustreŭ kamandziram roty. Nijakaj aficerskaj adukacyi ŭ jaho nie było. Ën skončyŭ kijeŭski Linhvistyčny: vyvučaŭ anhlijskuju i niamieckuju movy. Ale byli ŭ im jaŭnyja zadatki lidara, raz jon tak chutka ŭźniaŭsia pa armiejskaj leśvicy.
«Tady skončyłasia vajna ŭ farmacie «ścienka na ścienku» i «natoŭp na natoŭp», i my razumieli, što nam vielmi terminova ź nievajskovych ludziej treba stanavicca vajskoŭcami, inakš my vyjdziem kudyści nie tudy. I tady my vybrali standarty NATA — ad afarmleńnia kart, štatnych struktur padraździaleńniaŭ da taktyčnych pabudoŭ i pryjomaŭ», — havaryŭ Prakapienka ŭ intervju. «Azoŭ» byŭ u hetym sensie pieršym. Rešta ŭkrainskaj armii zrobić toje samaje praź niekalki hadoŭ.
Čytajcie taksama: Ekskursija ŭ»Azoŭ». Adzin dzień z ukrainskim pałkom śpiecpryznačeńnia
U 2017 hodzie ŭ 26 hadoŭ Dzianis Prakapienka staŭ samym maładym kamandziram pałka ŭ historyi Uzbrojenych sił Ukrainy.
Jadro «Azova» składali pravyja nacyjanalisty. Pry Prakapienku jon pieraros u elitnuju vajskovuju adzinku śpiecyjalnaha pryznačeńnia. Ale pry hetym zachavałasia pačatkovaja idejnaść, a časam i niepakorlivaść.
A ŭ žniŭni 2019 hoda Prakapienka atrymaŭ z ruk Uładzimira Zialenskaha orden Bahdana Chmialnickaha III stupieni. Toje ŭznaharodžańnie spravakavała skandał. Prakapienka nie vykanaŭ voinskaha pryvitańnia viarchoŭnaha hałoŭnakamandujučaha, prezidenta Ukrainy.
Mnohija acanili tuju stojku Prakapienki na zvažaj jak demarš, ale Zialenski kamandzira nie zvolniŭ.
Prakapienka — naščadak kareła, jaki cudam vyžyŭ u Saviecka-finskaj vajnie 1939—1940 hadoŭ: «Takoje adčuvańnie, što ja praciahnuŭ tuju ž vajnu, ale na inšym učastku frontu, vajnu suprać akupacyjnaha režymu Kramla. U majho dzieda była takaja nianaviść da kamunizmu, da balšavizmu, da saŭka… Ujaŭlaješ, što takoje stracić svaju siamju? Heta značyć, usie jaho braty zahinuli, radnia…»
Prakapienka zaŭsiody skieptyčna staviŭsia da mahčymaści dypłamatyčnaha vyrašeńnia kanfliktu z Rasijaj.
«Ja liču, što my dastatkova mocnyja, kab kryvioju i potam advajoŭvać našu ziamlu, a nie iści na niejkija padački ad Rasii. Nam nie patrebna jak padarunak ziamla, što i tak naležyć nam. Heta niapravilna. My pavinny adstojvać svaju ziamlu i nie majem prava addavać Danbas ni ŭ jakim razie…» — kazaŭ jon jašče da taho, jak stać kamandziram.
Cikava, što Prakapienka ŭ kancy 2021 hoda sprahnazavaŭ nie tolki poŭnamaštabnaje ŭvarvańnie rasijskich vojskaŭ, ale i toje, pa jakim scenary jano budzie adbyvacca.
«Azoŭstal» — hihancki zavod, u 25 razoŭ bolšy za dziaržavu Vatykan, pad im jość razhalinavanaja sistema padziemnych kamunikacyj i bombaschoviščaŭ.
Ale situacyja dla ŭkraincaŭ biazradasnaja. Hrupoŭka praciŭnika ŭ dziasiatak razoŭ pieravyšaje ŭkrainskuju. Jany panujuć u pavietry, u artyleryi. Ukraina nie zdolnaja ažyćciavić debłakadu Maryupala, siłaŭ Ukrainy chapaje tolki na abaronu. Prabicca da Maryupala stepam praz 100 kiłamietraŭ va ŭmovach, kali Rasija kantraluje pavietra, niemahčymaja zadača. Dypłamatyčnaje vyrašeńnie situacyi taksama nie prahladajecca.
«My budziem bicca da apošniaj kropli kryvi. Nam nie strašnyja ni varožyja tanki, ni rakietnyja ŭdary, ni avijacyja. Ja zahadvaju kožnamu bajcu pałka «Azoŭ» zmahacca da apošniaha. Razam da pieramohi. Słava Ukrainie», — kaža Prakapienka.
«Vorah parušaje praviły vajny, abstrelvajučy cyvilnych ludziej i rujnujučy infrastrukturu horada. My vykonvajem svoj abaviazak vajskoŭcaŭ, našy vajary mužna zmahajucca. Zaklikajem zakryć nieba nad Ukrainaj, dać sučasnuju zbroju i arhanizavać humanitarnuju dapamohu dla cyvilnych ludziej u Maryupali. U hety histaryčny momant pavinny spynić ahresara razam», — adznačaje jon.
«Treba zaŭsiody mieć samavałodańnie i spakojna dumać u luboj situacyi. Heta značyć, u vypadku strat nie treba ŭpadać u paniku, nieabchodna, kab mozh razvažliva pracavaŭ, kab dalej vykonvać pastaŭlenuju zadaču i nie ŭsprymać heta blizka da serca padčas praviadzieńnia apieracyi», — kazaŭ jon.
19 sakavika, na 24-y dzień abarony, Dzianisu Prakapienku było prysvojenaje zvańnie Hieroja Ukrainy.
