Fota: asabisty archiŭ
«U Zachodnim Krymie možna kupić dom z padviedzienymi hazam i vadoj za 10 tysiač dalaraŭ»
«U peŭnym uzroście ŭ bolšaści ludziej uźnikaje žadańnie niešta pamianiać. U mianie taksama. Heta pieršaja pryčyna, čamu ja vyrašyŭ pierajechać. Druhaja — klimat. Chaciełasia pajechać da mora, u ciapło. Krym mnie byŭ dobra znajomy. My jeździli siudy da 2014 hoda adpačyvać. Alternatyŭny varyjant, jaki ŭ nas byŭ, — źjechać u ZŠA. Tam svajaki žyvuć. Ale tudy patrapić składana, ciažka ź lehalizacyjaj. Vyrašyli jechać u Krym», — kaža Uładzisłaŭ.
Na pytańnie, ci nie biantežyła jaho pry pierajeździe, što Krym byŭ aneksavany Rasijaj, mužčyna adkazvaje, što nie zhodzien z takoj farmuloŭkaj. Padziei, jakija adbylisia z Krymam, naadvarot paŭpłyvali na toje, kab jon tudy pierajechaŭ.
«Kali b Krym byŭ ukrainskim, ja b nie vyrašyŭsia źjazdžać. Ja časta byvaŭ va Ukrainie i da 2014 hoda, i paśla. Staŭleńnie da ruskaj movy mianiałasia. Heta było zaŭvažna. Vučyć ukrainskuju ja nie chacieŭ.
Adna z pryčyn, čamu ja nie źjechaŭ u inšuju krainu, — viedańnie zamiežnaj movy. Ja bačyŭ, jak ludzi ŭ Kijevie na mianie hladzieli, kali ja pačynaŭ razmaŭlać na ruskaj. Mianie takoje staŭleńnie nie zadavalniała. Va Ukrainu z takim padychodam ja žyć by nie pajechaŭ nikoli. Toje, što Krym staŭ rasijskim, ja ŭspryniaŭ stanoŭča», — kaža mužčyna.
«U Zachodnim Krymie možna kupić dom z padviedzienymi hazam i vadoj za 10 tysiač dalaraŭ»
Kolki kaštuje žyćcio ŭ Sievastopali? Uładzisłaŭ raskazvaje pra ceny na arendu. Za čatyrochpakajovuju kvateru ź vidam na mora siamja płacić 230 dalaraŭ.
«Chacia za hetyja ž hrošy možna ŭ Sievastopali zdymać i adnapakajovuju, — kaža jon. — Jość ludzi, jakija žyvuć u takich ža kvaterach, ale płaciać u dva razy bolš. Žytła tut chapaje, składana znajści pa košcie toj varyjant, jaki zadavalniaje. Da hetaha my zdymali dvuchpakajovuju kvateru za 200 dalaraŭ taksama ź vidam na mora. U cełym ceny ŭ Sievastopali vyšejšyja, čym u astatnich haradach.
U Zachodnim Krymie možna kupić dom z padviedzienymi hazam i vadoj za 10 tysiač dalaraŭ. Heta z narmalnym ramontam i ŭčastkam ziamli. U Sievastopali tolki sam učastak budzie kaštavać nie mienš za 20 tysiač dalaraŭ. Kali kazać pra kvatery, to ŭ novabudoŭli adnapakajoŭku možna ŭziać ad 40 tysiač dalaraŭ. Kvadratny mietr tut kaštuje kala tysiačy. Dalej cana budzie zaležać ad miesca raźmiaščeńnia. Čym bližej da mora, tym daražej.
My paraŭnoŭvali košty ź minskimi pa canie za kvadratny mietr, u Biełarusi navat daražej u niekatorych vypadkach byvaje. U 2019 hodzie, kali my tolki pryjechali, nam prapanoŭvali za 36 tysiač dalaraŭ dvuchpakajovuju kvateru ŭ chruščoŭcy na bierazie mora. Tady na rukach u nas nie było takich hrošaj, nie kupili».
«U Biełarusi amal na 80 pracentaŭ daražej niekatoryja pradukty, čym u Krymie»
Ceny na pradukty ŭ Sievastopali zaležać ad vytvorcy. Kali paraŭnoŭvać ź biełaruskimi cenami, to sadavina, soki, ryba i śvinina ličacca niedarahimi.
Fota: asabisty archiŭ
«Varanuju kiłbasu možna kupić za 5 rubloŭ (u pieraliku na biełaruskija), a jość varyjant i za 20. Darečy, bresckaja tut kaštuje 20 rubloŭ. U Biełarusi tańniejšaja małočnaja pradukcyja, harodnina.
Rybu možna kupić za 2,50 rubla za kiłahram. Małako samaje tannaje kaštuje 1,65 rubla, chleb — 1,41, masła — 5,76, muka — 2,81 rubla. Pamiataju, jak my hod tamu pryjazdžali ŭ Biełaruś. Byli ŭ šoku ad cen. U Biełarusi amal na 80 pracentaŭ daražej niekatoryja pradukty, čym u Krymie. Navat bienzin u Minsku bolš kaštuje, čym u Sievastopali», — dzielicca mužčyna.
Zarablaje Uładzisłaŭ u zaležnaści ad kolkaści zamoŭlenych u jaho ekskursij. Akładu ŭ jaho niama.
«Zvyčajnaja ekskursija ŭ mianie kaštuje 60 rubloŭ. Byvaje, što za dzień ich moža być siem-vosiem, a jość dni, kali adna ci dźvie. Maja žonka pracuje nastaŭnicaj chimii i bijałohii ŭ škole. Da hetaha ŭ Biełarusi jana była ŭ miedycynie, potym atrymała adukacyju nastaŭnika.
Pryjšła ŭ škołu ŭ Krymie z nulavym stažam, heta značyć, što nijakich nadbavak u jaje nie było. Jana atrymlivała 1400 rubloŭ. Toj ža samy zvyčajny nastaŭnik u Homieli atrymlivaŭ nie bolš za 600-700 rubloŭ u miesiac na toj čas. Roźnica amal u dva razy. Siaredni zarobak uvohule ŭ Krymie 1360 rubloŭ», — pryvodzić ličby jon.
Fota: asabisty archiŭ
«Kiraŭnik dziaržavy pryniaŭ takoje rašeńnie. Značyć, heta pravilna»
Uładzisłaŭ ličyć, što ciapier idzie «śpiecapieracyja».
«Kali adkinuć emocyi, palityčnyja pierakanańni, słova «vajna» vyznačana ŭ mižnarodnym pravie. Kali jana abjaŭlajecca inšaj dziaržavie, adbyvajucca peŭnyja jurydyčnyja padziei.
Pry ustupleńni ŭ fazu mienavita vajny vydajucca dakumienty. U dadzienym vypadku, jak z boku Rasijskaj Fiederacyi, tak i z boku Ukrainy nie było nivodnaha dakumienta ab pačatku vajny. Jak juryst, ja liču heta śpiecapieracyjaj. Niejkich źmianieńnieŭ u nas, u Krymie, paśla pačatku śpiecapieracyi ja nie zaŭvažyŭ,
— dzielicca jon. — Ja vas nie źbirajusia ni ŭ čym pierakonvać. U vas svaje pohlady. Kali prachodziła śpiecapieracyja ŭ Siryi, jakuju pravodzili ZŠA, jany abjaŭlali vajnu Siryi? Nie. A ŭ Afhanistanie? Taksama nie. Kali my zaraz prybiarem emocyi, to ŭbačym suśvietnuju praktyku vyrašeńnia jakich-niebudź pytańniaŭ. Pucin heta robić ci nie — jakaja roźnica? Ja paraŭnoŭvaju heta ź inšymi anałahičnymi padziejami. Kali b aficyjna heta pryznali vajnoj, dyk byli b zusim inšyja jurydyčnyja nastupstvy. Možna kazać usio, što zaŭhodna, ale jość dakumienty».
Uvohule mužčyna vielmi stanoŭča stavicca da toho, što Rasija pačała «śpiecapieracyju» va Ukrainie. Takoje staŭleńnie jon tłumačyć tym, što «ŭźnikła niejkaja situacyja, na jakuju adreahavaŭ prezident Rasii».
«Miarkuju, što heta było pravilna. Jość toje, što my z vami čujem i bačym. Voś navat vy — u vas sfarmiravana svajo asabistaje mierkavańnie ŭ zaležnaści ad taho, z kim vy razmaŭlali. Ale ź inšym bokam vy nie razmaŭlali.
Kiraŭnik dziaržavy pryniaŭ takoje rašeńnie, paličyŭ jaho pravilnym, hramadzianie jaho padtrymali. Značyć, heta pravilna. Ja ŭvohule liču, što atrymać u ŚMI abjektyŭnuju infarmacyju nielha. Dla hetaha vam treba pryjechać na miesca, pažyć i tady ŭ vas składziecca mierkavańnie», — kaža jon.
Uładzisłaŭ nieadnarozova padkreślivaje: jon upeŭnieny ŭ tym, što takaja «situacyja», jakaja patrabavała «śpiecapieracyi», była. Jon całkam daviaraje Pucinu.
«Jość u dziaržavie infarmacyja pad hryfam «sakretna». Ni vy, ni ja, akramia koła asob, jakija majuć dostup da takoj infarmacyi, nie viedajem usiaho, što adbyvajecca na samoj spravie.
Kali niešta pahražaje nacyjanalnaj biaśpiecy krainy, prezident pavinien vykanać dziejańni dla taho, kab dziaržava joj nie padvierhłasia abo prajšła ź minimalnymi stratami. Kali Pucin addaŭ taki zahad — značyć, u hetym była patreba».
«Ja skažu, što niechta ŭ kahości streliŭ, kali ŭbaču rašeńnie suda, dzie budzie trasałahičnaja ekśpiertyza»
Na arhumient žurnalistki ab tym, što jana asabista znachodziłasia va Ukrainie padčas pačatku vajny i bačyła, što stralajuć ruskija vajskoŭcy, u mužčyny taksama znachodziacca tłumačeńni.
«Adkul u vas takaja ŭpeŭnienaść? Była praviedziena ekśpiertyza, rasśledavańnie? Jak vy zrazumieli, što jany ruskija? Na formu ściažok možna pryšyć, a na technicy napisać niejkija litary. Ja tut maju znosiny ź ludźmi z Daniecka, Łuhanska, i jany mnie raskazvajuć, što adbyvałasia ŭ hetych haradach u 2014 hodzie. Ja nie budu z vami spračacca. Kolki ludziej, stolki i mierkavańniaŭ.
Ja skažu, što niechta ŭ kahości streliŭ, kali ja ŭbaču adpaviednyja dakumienty, naprykład, rašeńnie suda, dzie budzie trasałahičnaja ekśpiertyza. A pakul heta prosta vašy słovy.
Davajcie ja vam pryviadu prykład pa Biełarusi. Uspomnim apošnija vybary Łukašenki. Vy viedajecie, što jość dźvie viersii: pieramoh jon ci Cichanoŭskaja. Skažycie mnie, kali łaska, na siońnia my možam ubačyć z vami abo z taho, abo ź inšaha boku abjektyŭnyja dakumienty? Nie. Adpaviedna my pavinny zrabić unutrany vybar. Vy jaho zrabili dla siabie.
Fota: asabisty archiŭ
Ja liču, što ŭłada, jakaja zaraz jość u Biełarusi, abjektyŭna pieramahła na vybarach. Ludzi, jakija vyjšli na pratesty, byli ŭ svajoj mienšaści. Paviedamlali ž, što ich było nie bolš za miljon pa ŭsich haradach. Sychodziačy z hetaha, ja liču, što prezident lehitymny. Navat kali b vyjšła 49 adsotkaŭ, to heta nie 51.
Jość čałaviek, jaki parušyŭ dziejnaje zakanadaŭstva, za heta jon byŭ aryštavany. Ja nie baču nijakich tut prablem. Vy adkryjcie zakon ab abaviazkach i pravach supracoŭnikaŭ unutranych spraŭ. Tam napisana, što źjaŭlajecca supracivam supracoŭniku milicyi. Kali ŭ jaho kinuli kamień, to heta treba spynić», — razvažaje jon.
«Toje, što vas było 15 čałaviek u kamiery, heta ž nie vina dziaržavy. Vina, musić, tolki ŭ tym, što ŭ Biełarusi mała turmaŭ»
Mužčyna taksama upeŭnieny, što katavańniaŭ na Akreścina i ŭ inšych izalatarach nie było. Zadaje pytańnie: «I što tam takoha žachlivaha było? Raskažycie». Žurnalistka pryviała fakty, u jakich jana pierakanałasia na asabistym vopycie. Naprykład, toje, što ŭ dvuchmiesnaj kamiery znachodziłasia 15 čałaviek.
«Prabačcie, ja z vami nie pahadžusia nakont katavańniaŭ ludziej. Kali zaŭtra ŭ Biełarusi abjaviać, što treba pabudavać dvaccać turmaŭ, nasielnictva ŭsprymie heta niehatyŭna, bo heta hrošy ź biudžetu. A ŭzrovień złačynnaści ŭ Biełarusi nie taki vysoki.
Toje, što vas było 15 čałaviek u kamiery, heta ž nie vina dziaržavy. Vina, musić, tolki ŭ tym, što ŭ Biełarusi mała turmaŭ. Usim nie chapiła miescaŭ, jakija musiać być pa sanitarnych normach. Tady ŭ mianie inšaje pytańnie. Kudy vas treba było dziavać?
Drenna, viadoma, što vas nie vypuskali na vulicu i nie vadzili ŭ duš. Prosta ja abjektyŭna nie mahu acanić, ja tam nie byŭ. Značyć, praviły ŭnutranaha rasparadku byli parušany. U vašym vypadku hetyja normy nie byli vykanany. Vy tam apynulisia čamu? Kali vy vykonvali svaje prafiesijnyja abaviazki, to ŭ vas musiła być schiema dziejańniaŭ. Kali vas zatrymali, značyć vy parušyli dziejnaje zakanadaŭstva. Kali b vy siadzieli doma, nie vychodzili na vulicu, vas nie zatrymali b. Vy znachodzilisia nie ŭ tym miescy i nie ŭ toj čas», — zapeŭnivaje mužčyna.
Razam z tym Uładzisłaŭ ličyć, što supracoŭniki izalataraŭ, jakija parušyli praviły ŭtrymańnia pavinny być pryciahnuty da adkaznaści. I škaduje, što vinavatych nie pakarali.
«Kali byli takija parušeńni ŭ adnosinach da vas, heta drenna, — kaža jon. —
Ale što mnie zrabić? Vybiehčy na vulicu i kryčać ab hetym? Ja nie baču ŭ hetym sensu. Ja mahu pryvieści svoj prykład. U supracoŭnika milicyi kinuli kamień, ja b hetamu čałavieku za takoje ruku adsiek. Pahražać žyćciu, abražać nielha».
Razmaŭlać z Uładzisłavam ab tym, što adbyvajecca ŭ Biełarusi i Ukrainie možna było b doŭha. I ŭsio ž viarnulisia da temy Kryma. Mužčyna skazaŭ, što zaraz jaho poŭnaściu zadavalniaje jaho žyćcio.
«Ja mieŭ dźvie mety, kali jechaŭ siudy, — źmianić klimat i śfieru dziejnaści. Ja tut znajšoŭ heta. Jość znajomyja, jakija pryjazdžajuć siudy i praź miesiac źjazdžajuć. Niekatoryja zastajucca nazaŭždy. Majo žyćcio źmianiłasia poŭnaściu. Ja tut zrabiŭ toje, što chacieŭ. Nielha skazać, što stała lepš ci horš. Pa-inšamu, voś tak», — padsumoŭvaje jon.
«Naša Niva» adnaŭlaje zbor danataŭ — padtrymać prosta
Čytajcie taksama:
«Źniali trochpakajoŭku za 550 dalaraŭ». Biełarusy, jakija pierajechali va Uźbiekistan, raskazvajuć pra žyćcio tam
«U Minsku ŭ nas časta śniedali Znak i Kaleśnikava». Jak biełarus adkryŭ kafe ŭ Vilni
