Fota: asabisty archiŭ

Fota: asabisty archiŭ

«U suśvietnym rejtynhu ceny na pradukty va Uźbiekistanie ličacca nievysokimi» 

Pradprymalniku Siarhieju 34 hady. Jon razam ź siamjoj ŭ sakaviku pierajechaŭ ź Minska ŭ Taškient. Spačatku jak varyjant dla rełakiejtu razhladali Hruziju, ale potym vyrašyli jechać va Uźbiekistan. 

«Pakul varta pieračakać hety čas niavyznačanaści ŭ inšym miescy. Pierajechaŭ razam z žonkaj i dziećmi, im 8 i 10 hadoŭ. U Hruzii ciapier vielmi šmat ludziej. Pra Taškient na toj momant ja niešta viedaŭ, raniej dapamahaŭ tut prasoŭvać adzin ajcišny prajekt. Było zrazumieła, što inviestujecca ŭ horad i biznes šmat, idzie dobraje raźvićcio kirunku IT, tamu pajechali siudy. Ciapier ja šukaju pracu, maja žonka ŭ SMM na biełaruskim rynku. Mabyć, tam i zastaniecca», — kaža jon. 

U Biełarusi Siarhiej mieŭ markietynhavy biznes. Ciapier jon zamarožany. 

«Heta nie śviazana z palityčnaj ci ekanamičnaj situacyjaj. Chutčej za ŭsio, ja prosta pavyharaŭ, treba było źmianić što-niebudź u žyćci», — kaža jon.

Pa słovach Siarhieja, uzrovień žyćcia ŭ Taškiencie prykładna taki ž, jak u Minsku. Horad dla aŭtamabilistaŭ, narmalnych piešachodnych pierachodaŭ niama.

«Vielmi šmat mašyn, jość zatory. Pieššu tut składana pierasoŭvacca», — kaža jon.

Ceny na pradukty ŭ Taškiencie roznyja: u supiermarkiecie daražej, na rynku tańniej. Naprykład, masła ŭ kramie kaštuje 25000 sumaŭ (7 biełaruskich rubloŭ), a na rynku 8000 sumaŭ (2,30 rubla), masła «Savuškin» — 115 tysiač sumaŭ (32,85 rubla). 

Fota: asabisty archiŭ

Fota: asabisty archiŭ

«Biełaruskija pradukty tut pa košcie prykładna jak zachodniejeŭrapiejskija, — kaža jon. — Małočnyja pradukty daražejšyja niedzie ŭ paŭtara raza. Muka, krupy pradajucca na vahu. Tut vielmi smačnyja pamidory. U nas navat uletku takich niama. U suśvietnym rejtynhu ceny na pradukty va Uźbiekistanie ličacca nievysokimi».

U pieraliku na biełaruskija hrošy bulba tut kaštuje 1,43—1,71 rubla za kiłahram, morkva — ad 1,71 rubla, kiefir — 2,86 rubla, jałavičyna — ad 14,28 da 15,71 rubla, chleb — 46 kapiejek. Cana na farš zaležyć ad pracentu tłušču, kali jaho 20%, — 17,14 rubla, 15% i mienš — 19,71 rubla.

Fota: asabisty archiŭ

Fota: asabisty archiŭ

«Kupić kvateru ŭ navabudzie ciapier doraha, kaštuje ad 60 tysiač dalaraŭ i vyšej»

Apošnim časama ŭ Taškient pryjechała šmat ajcišnikaŭ i pradprymalnikaŭ, tamu ceny na žytło pavysilisia. Siamja šukała kvateru pa kryteryjach «jak maha bližej da centra i jak maha tańniej».

«My źniali trochpakajoŭku za 550 dalaraŭ za miesiac. I heta vialiki pośpiech, bo ciapier užo za takija hrošy znajści žytło ciažka. Naprykład, trochpakajoŭki prapanujuć za 800 dalaraŭ, dvuchpakajoŭki ad 400, adnuški — 300-400. Heta kali ŭ centry. Pa kamunałcy skazać nie mahu, my jaje jašče nie płacili. Miascovyja kažuć, što jana ŭ rajonie 20 dalaraŭ u miesiac. Płacili za internet kala 15 dalaraŭ, ale jon tut vielmi drenny. Rekamiendujuć šukać žytło bližej da centra, bo tut lepš infrastruktura. U centry ŭsio bolš-mienš spakojna, a na ŭskrainach — nie. Treba jašče aryjentavacca na mietro», — kaža Siarhiej.

Va Uźbiekistanie ŭ asnoŭnym biaruć žytło ŭ kredyt. Košt kvater zaležyć ad miesca ich raźmiaščeńnia.

«Naprykład, kali žytło ŭ centry horada, pasiołka, u jakim pablizu šmat biznes-centraŭ, supiermarkietaŭ, aptek, to jano kaštuje daražej — ad 60 tysiač dalaraŭ.

Dalej ad centra — tańniej. Ad 40 da 55 tysiač dalaraŭ — heta trochpakajovyja kvatery. Ad 25 tysiač dalaraŭ — adnapakajovyja. Kupić kvateru ŭ navabudzie ciapier doraha, kaštuje ad 60 tysiač dalaraŭ i vyšej», — kaža mužčyna. 

Hramadski transpart u Taškiencie tanny. Prajezd u aŭtobusie i mietro kaštuje 1600 sumaŭ (46 kapiejek).

«Maršrutki pa 2000-3000 sumaŭ (57 — 86 kapiejek) u zaležnaści ad adlehłaści i maršrutu. Taksi z horada ŭ vobłaść abychodzicca značna tańniej, čym pajezdki pa stalicy. Naprykład, u Taškiencie za adlehłaść 13-15 kiłamietraŭ vy zapłacicie 18-20 tysiač sumaŭ (kala 5 rubloŭ). Pajezdka za horad z takim ža kiłamietražom — 7-8 tysiač sumaŭ (kala 2 rubloŭ)».

Fota: asabisty archiŭ

Fota: asabisty archiŭ

Ceny na mabilnuju suviaź va Uźbiekistanie zaležać ad apieratara, u jakoha nabyvajecie sim-kartu. Samy tanny taryf — 10000 sumaŭ (2,86 rubla). Ź nievialikaj kolkaściu internetu i biaspłatnych chvilin — ad 20000 sumaŭ (5,71 rubla).

Kali Siarhiej tolki pryjechaŭ u Taškient, nadvorje tam było chaładniejšaje, čym u Biełarusi. Ciapier dniom byvaje da 15 hradusaŭ ciapła.

«Ludzi niekatoryja ŭ futbołkach chodziać, — dzielicca jon. — Časam u horadzie bačny smoh.

Z ekałohijaj tut prablemy, tamu što šmat mašyn, ale bolš za pałovu ź ich na hazie. I jašče byvajuć burany».

Viarnucca ŭ Biełaruś Siarhieju chočacca zaŭsiody. Ale ličyć, što dla jaho siamji ciapier lepš pabyć va Uźbiekistanie. 

«U nas ciapier niebiaśpiečna. Tamu pakul pahladzim na Aziju, a tam budzie bačna», — kaža jon.

«Siaredni zarobak ŭ nasielnictva — 664 rubli»

Vasilinie 35 hod. Jana pracuje ŭ dydžytał-kampanii. Na pačatku sakavika jana razam z mužam i dziciem pierajechała ź Minska ŭ Taškient. Adnoj z pryčyn adjezdu stała vajna, jakaja pačałasia va Ukrainie.

«Ź Biełarusi my nie chacieli źjadžać, ale 24 lutaha była apošniaja kropla. Bolš zastavacca stała niemahčyma. Ja vielmi drenna adčuvała siabie ŭ Biełarusi. Nie spała, nie jeła, nie pracavała, bo ŭ hałavie pastanna była dumka, što naša kraina datyčnaja da padziej va Ukrainie. Ciapier mnie značna lepiej, adčuvaju siabie ŭ biaśpiecy.

Čamu mienavita Taškient? U muža była mahčymaść pajechać siudy ŭ kamandziroŭku. A taksama možna było ŭziać nas i pahladzieć, ci zachočam my tut zastacca. Tak i atrymałasia. U biełarusaŭ uvohule nie šmat nakirunkaŭ, kudy možna palacieć. Razhladali Hruziju, Turcyju, ale kvitki va Uźbiekistan byli ŭ dva razy tańniejšyja i patok ludziej nievialiki. Tamu pajechali ŭ Taškient», — tłumačyć jana.

U Vasiliny i jaje muža zarobki zastalisia biełaruskimi. Hetaha całkam chapaje na žyćcio dla ŭsioj siamji ŭ Taškiencie. 

«Muž pracuje ŭ IT. Uvohule, jon utrymlivaje siamju. Ja svoj zarobak patraciła, mabyć, za try tydni, ale heta nie ŭ čym sabie nie admaŭlajučy. Va Uźbiekistanie roznyja zarobki. Naprykład, ja hladzieła vakansii dla ekspataŭ. U adnu kampaniju patrebny byŭ kiraŭnik markietynhavaha adździeła, zarobak — 2500 dalaraŭ. 

Siaredni zarobak tut u nasielnictva — 2,5 miljona sumaŭ (664 biełaruskija rubli). Heta, kaniečnie, nie tyčycca ajcišnikaŭ. U cełym u krainie jość biedny i bahaty kłas. Siaredniaha vielmi mała».

Pa ŭzroŭni žyćcia Taškient nahadvaje Vasilinie Minsk piać hadoŭ tamu. Ale infrastruktura ŭ stalicy raźvitaja dobra. 

«Šmat parkaŭ i centraŭ dla adpačynku. Heta mnie padabajecca, jany vielmi krutyja, — kaža Vasilina. — Treba adznačyć, što ŭ kafe, restaranach tut raspaŭsiudžanaje kureńnie. U niejkich siamiejnych kaviarniach ja hetaha nie bačyła, ale ŭ barach, naprykład, paŭsiudna. I kaljany vielmi papularnyja. Što jašče? Drennyja darohi. Pieršyja dni mianie heta vielmi razdražniała.

Ličbavaja kultura mienš raźvitaja. Naprykład, šmat dzie nielha zapłacić kartkaj albo možna tolki miascovaj. My tak nie zmahli kupić anłajn-kvitki na ciahnik, pryjšłosia praz turystyčnuju firmu. Jak mnie raskazvali, raniej ŭ ich było jašče horš. Nielha było pieravody rabić z kartki na kartku.

Taksama bankamataŭ nie vielmi šmat, internet tak sabie. Jość prablemy z adzieńniem: jano niatannaje i niama vybaru. Miascovyja žychary jeździać u Kazachstan. Jašče cikavy momant tut z ałkaholem. Jon jość nie va ŭsich kafe i restaranach. Nabyć ałkahol možna tolki ŭ śpiecyjalizavanaj kramie — u zvyčajnym supiermarkiecie jaho nie budzie».

Fota: asabisty archiŭ 

Fota: asabisty archiŭ 

Va Uźbiekistanie zamiežnikam abaviazkova treba zrabić rehistracyju. Bieź jaje možna atrymać štraf. 

«Spačatku nas rehistravali ŭ hateli, a potym užo ŭ kvatery. Vid na žycharstva vydajecca tolki pry ŭmovie nabyćcia nieruchomaści. U Taškienckaj vobłaści i ŭ stalicy — na sumu nie mienš za 400 000 dalaraŭ.

Dla IT kampanij i śpiecyjalistaŭ sproščanaja pracedura. Im možna nabyć majomaść na lubuju sumu. Ja jašče nie viedaju, kolki dakładna dzion tut možna znachodzicca. Spačatku nam skazali, što 60, a potym, što ekspatam možna być 365 dzion, jak u Hruzii», — zaŭvažaje jana.

Fota: asabisty archiŭ

Fota: asabisty archiŭ

«Časta baču, što pierakryvajuć darohu, kali niechta jedzie. Heta historyja, jak i ŭ Biełarusi» 

Kali Vasilina jechała ŭ Taškient, dumała, što ŭ miascovaha nasielnictva ŭźniknuć pytańni nakont jaje źniešnaści. Dziaŭčyna nosić dredy i jarkaje adździeńnie.

«Akazałasia, što tut takich prablem niama. Jość šmat dziaŭčat, jakija taksama niestandartna vyhladajuć. Ale i tradycyi zachoŭvajucca, asabliva nie ŭ stalicy.

Niekatoryja nosiać nacyjanalnaje adzieńnie, jość tyja, chto chodzić u chidžabie. U siamji muž moža nie dazvolić žoncy pracavać, naprykład. U płanie svabody naohuł: tut byŭ zabaronienyja Skajp, Tvitar.

Časta baču, što pierakryvajuć darohu, kali niechta jedzie. Heta historyja, jak i ŭ Biełarusi. Jość parki, jakija całkam začynienyja. Bačna, što pa jeŭrapiejskich mierkach Uźbiekistan svabodnaj krainaj nazvać nielha.

Žychary pišuć u čatach, što jany niezadavolenyja tym, što niekatoryja internet-prahramy, resursy zabłakavanyja. Ich heta chvaluje», — kaža jana. 

Žytło siamja šukała praz ahienctva. Ryełtaru zapłacili 150 dalaraŭ.

«Źniali trochpakajoŭku ŭ centry za 550 dalaraŭ i pakinuli taki ž załoh. Kamunalnyja płaciažy tut atrymlivajucca kala 30 dalaraŭ u miesiac. Tut usio jość, ale adziny minus, što sama kvatera staraja. Pa pasłuhach mahu skazać, što ceny pryblizna takija ž, jak u Minsku. Naprykład, na manikiur ja chadziła ŭ sałon za 130000 sumaŭ (37 rubloŭ)», — kaža dziaŭčyna.

Piacihadovaha syna Vasilina addała ŭ Taškiencie ŭ pryvatny dziciačy sadok. Varyjanty ź dziaržaŭnymi nie razhladali. 

«Pryvatny sadok kaštuje 2 miljeny sumaŭ (827 rubloŭ). U apłatu ŭvachodzić ježa, zaniatki, roznyja siekcyi. Ja jašče ŭ mini-sadok źviartałasia, tam možna addavać dzicia na try hadziny na dzień. Jon kaštuje 1 miljon sumaŭ (342 rubli) u miesiac. Jość jašče pasłuhi niani na hadzinu, kaštuje 120 tysiač sumaŭ (34 rubli). Sami ludzi tut šmat razmaŭlać pa-rusku, u sadku dzieci taksama. Tamu moŭnych prablem niama». 

Minskaja siamja pierajechała ŭ Čechiju pa zaprašeńni na pracu, a im admovili praź biełaruski pašpart

«Atrymlivaju zarobak nižejšy za siaredni, ale ŭzrovień žyćcia vyras». Biełarus adkazaŭ ajcišniku, jaki «nie vytrymaŭ pakutaŭ u Polščy»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?