Fota: Michaił Klimienćjeŭ / TASS
Da kanca sakavika rasijskaje vajennaje kiraŭnictva kančatkova źmiryłasia z tym, što Kijeŭ nie atrymajecca «ŭziać małoj kryvioju», heta značyć, siłami, jakija ŭžo zadziejničanyja ŭ «śpiecapieracyi». Pra heta «Mieduzie» zajavili try krynicy, blizkija da Administracyi prezidenta (AP), i dva surazmoŭcy, blizkija da ŭrada.
Sa słoŭ krynic «Mieduzy», u pieršyja dni ŭvarvańnia i rasijskija vajskoŭcy, i sam prezident Uładzimir Pucin ličyli, što «śpiecapieracyja» projdzie davoli lohka, i nie čakali takoha supracivu z ukrainskaha boku.
Jašče ŭ kancy lutaha blizki da AP surazmoŭca «Mieduzy» byŭ upeŭnieny, što adnoj z hałoŭnych prablem dla Rasii stanie nie ŭziaćcie bujnych haradoŭ, a arhanizacyja narmalnaj pracy ich «novych administracyj».
U tym, što hetyja terytoryi (u tym liku Kijeŭ) buduć zavajavanyja, jon amal nie sumniavaŭsia. «[A voś] kadry dla kiravańnia składanaj urbanizavanaj terytoryjaj ŭziać niama adkul. Ich navat na Krym i Sievastopal nie chapiła», — razvažała tady krynica «Mieduzy».
Adnak užo na pačatku sakavika rytoryka krynic «Mieduzy» va ŭładzie pačała mianiacca. Ciapier ža, na ich dumku, najbolš «vierahodnym scenaryjem» ličycca ŭziaćcie pad poŭny kantrol vyklučna Danbasa.
Mienavita niaŭdačami na froncie piać krynic «Mieduzy» tłumačać źmiakčeńnie rasijskaj pazicyi padčas pieramovaŭ. Paśla sustrečy delehacyj Rasii i Ukrainy ŭ Stambule 29 sakavika pradstaŭnik Minabarony RF hienierał-pałkoŭnik Alaksandr Famin paviedamiŭ, što rasijskija vojski «kardynalna, u razy, skaračajuć vajskovuju aktyŭnaść na Kijeŭskim i Čarnihaŭskim napramkach». Ministr abarony Siarhiej Šajhu, u svaju čarhu, nazvaŭ «vyzvaleńnie Danbasa» hałoŭnaj metaj vajennych dziejańniaŭ.
Akramia taho, surazmoŭcy «Mieduzy» śćviardžajuć, što ŭ kancy sakavika ŭradavyja čynoŭniki pakazali Pucinu vykładki ab stanie rasijskaj ekanomiki. Zhodna z hetym dakumientam, jak vykazałasia adna z krynic, «choć niejak narmalna žyć kraina pad takimi sankcyjami nie zmoža».
«[Va ŭradzie] iduć narady pa roznych halinach prykładna adnaho źmiestu: na starych zapasach pratrymacca možna niekalki miesiacaŭ. Što budzie potym, kali nie buduć źniatyja choć niejkija sankcyi, niezrazumieła nikomu. Dakładniej, zrazumieła, što ŭsio budzie vielmi drenna. Pačnucca infrastrukturnyja prablemy, prablemy z transpartam», — pieraličvaje składanaści blizkaja da fiederalnaha kabinieta ministraŭ krynica «Mieduzy».
Adrazu try krynicy, blizkija da AP, padkreślivajuć: Pucin jašče nie pryniaŭ kančatkovaha rašeńnia ab tym, što rabić dalej. Pa słovach adnaho ź ich, ciapier na prezidenta «akazvajuć upłyŭ roznyja hrupy i ludzi», a sam jon «chacieŭ by pahladzieć na niešta padobnaje da hramadskaj dyskusii» pra vajnu va Ukrainie.
Hetaja «hramadskaja dyskusija» maje na ŭvazie, što Pucin hatovy vysłuchać i tych, chto nastojvaje na miry z Ukrainaj, i tych, chto vystupaje za praciah paŭnamaštabnaj vajny.
«Za pieramovy nastrojenyja tapić ludzi, blizkija da palityčnaha błoka Kramla, na heta buduć skiravanyja mahutnaści ŭ internecie. Partyja vajny — naprykład, heta kiraŭnik Čačni Ramzan Kadyraŭ, śpikier Dziarždumy Viačasłaŭ Vałodzin. Jany miarkujuć, što za boj da pieramohi sam Pucin, tamu jak by iduć za im», — kamientuje blizkaja da AP krynica.
Pry hetym u samoj administracyi prezidenta ciapier aścierahajucca, što «mahčymaje pieramirje z Ukrainaj udaryć pa rejtynhu Pucina».
«Hramadzianie akazalisia pierahretyja prapahandaj. Dapuścim, prymajecca rašeńnie spynicca na terytoryi Danbasa. A što tady z «nacystami»? My bolš suprać ich nie vajujem? Ludziam stolki ubivajuć hetaje słova, što ja nie ŭjaŭlaju, jak biez strataŭ dla rejtynhu ŭłady možna spynicca na Danbasie», — zajaŭlaje adzin z palittechnołahaŭ, jakija supracoŭničajuć z Kramlom.
Blizkaja da AP krynica «Mieduzy» pryvodzić inšyja prapahandysckija štampy — chutkaje «ŭziaćcie Kijeva» i chutki «parad na Chryščaciku».
«I što paśla hetaha skazać? Što Kijeŭ brać pieradumali? A čamu? Tak, sapraŭdnych, pierakananych prychilnikaŭ vajny da kanca nie tak šmat, ale heta vielmi hučnaja častka hramadstva, jana ŭžo pačała šumieć [paśla pieramovaŭ u Stambule]», — tłumačyć jon, namiakajučy na šmatlikija aburanyja kamientary «patryjotaŭ» paśla rašeńnia ab «skaračeńni aktyŭnaści» na kijeŭskim kirunku.
Jak raniej raskazvała «Mieduza», ź siaredziny sakavika administracyja prezidenta sprabuje z dapamohaj sacyjałahičnych apytańniaŭ vyśvietlić, jak rasijanie na samaj spravie staviacca da vajny — i što ciapier turbuje žycharoŭ krainy.
Surazmoŭca «Mieduzy», znajomy z vynikami hetaha daśledavańnia, adznačaje, što, pavodle źviestak AP, da niadaŭniaha momantu rejtynhi Pucina na fonie «śpiecapieracyi» raśli. Ale što budzie dalej — niezrazumieła, i spravakuje ci nie mahčymaja «admova» ad ŭziaćcia Kijeva pratesty z boku praŭładnaha elektaratu — taksama.
«Siarod ich [prychilnikaŭ vajny] jość «kanapavyja patryjoty», jakija na słovach — za, ale na vulicy za praciah bajavych dziejańniaŭ nie pojduć. Jašče adna častka jadra padtrymki «apieracyi» — žančyny 40+. Jany za, ale kali zadajecca pytańnie: «A ci hatovyja vy adpravić vajavać adnaho z členaŭ siamji?» — jany adrazu zajaŭlajuć, što nie hatovyja», — spasyłajecca krynica «Mieduzy» na vyniki zakrytych sacyjałahičnych daśledavańniaŭ.
Surazmoŭca dadaje, što čaściej za ŭsio ŭ jakaści pryčyn padtrymki vajny rasijanie nazyvajuć «pahrozu z Zachadu»: «Toje, pra što im i raskazvajuć pa TB».
Na hetym fonie, pavodle infarmacyi krynic «Mieduzy», u AP prajšła narada, na jakoj abmiarkoŭvalisia stratehii taho, jak rastłumačyć rasijanam mahčymyja pieramovy ab miry z Ukrainaj. Adnak «dziejsnych stratehij dla tłumačeńnia nie znajšłosia». «U topku paravoza nakidali stolki vuhalu, jaho adrazu spynić nie atrymajecca», — skazaŭ, pavodle infarmacyi» Mieduzy», na naradzie adzin z palittechnołahaŭ.
Składanaść, pavodle acenki AP, zaklučajecca i ŭ tym, što niekatoryja rasijskija prapahandysty adkryta patrabujuć praciahu vajny. «Naprykład, televiadučy Uładzimir Sałaŭjoŭ źmiašaŭ z hrazioj Miadzinskaha».
Inšaja častka prapahandystaŭ «nie razumieje, jak im zdać nazad, kab nie stracić tvar». Dźvie krynicy «Mieduzy», blizkija da AP, padkreślivajuć, što rasčaravańnie «patryjatyčnaj hramadskaści» moža być vielmi vialikim: «Umoŭna, dla ich heta jak prahlad sieryjała sa spojlerach: u apošniaj sieryi voźmuć Kijeŭ. A tut u siaredzinie sieryjała niejkija pieramovy — i ŭžo, zdajecca, nijakaha Kijeva».
U suviazi z hetym va ŭnutrypalityčnym błoku rychtujucca da niepaźbiežnaha padzieńnia rejtynhaŭ ułady paśla zakančeńnia vajny i pahłybleńnia ekanamičnaha kryzisu. Asabliva — u bujnych haradach, u pieršuju čarhu ŭ Maskvie i Sankt-Pieciarburhu.
Pavodle źviestak zakrytych apytańniaŭ AP, vajnu ŭ hetych haradach ciapier padtrymlivajuć nie bolš za pałovu žycharoŭ. Na hetym fonie, pa śćviardžeńni krynic «Mieduzy», blizkija da ŭłady palittechnołahi atrymali zadańnie padumać pra «novuju ideałohiju dla krainy», pra «niejkuju novuju nacyjanalnuju ideju».
«U niejkim vyhladzie mir usio roŭna budzie, i ludzi buduć zadavać pytańni: a dla čaho heta było? Kijeŭ nie ŭziaty, bolšaść sankcyj nie źniataja, žyć pry ich drenna. Navošta ŭsio heta tryvać? Hetuju pusteču treba budzie zapoŭnić, kab jaje nie zapoŭniŭ niechta jašče».
