Valancina Miadźviedź.

Valancina Miadźviedź.

Kali Valancinu Miadźviedź prysudzili da 2 hadoŭ «chatniaj chimii», jana musiła aficyjna ŭładkavacca na pracu. Raniejšaja, ź jakoj jana žyła, nie padychodziła. Žančyna pracavała cyrulnicaj i ličyłasia samazaniataj, što pa praviłach «chatniaj chimii» nie ŭličvałasia. A sami słužby vykanańnia pakarańniaŭ, kali davieryć hetuju spravu im, šluć zvyčajna ŭ kałhasy.

Taki varyjant nie zadavalniaŭ samu žančynu. U jaje na rukach była dačka, sastarełyja baćki, a aprača taho musiła dapamahać i siastry ŭ Polščy. Jana musiła zarablać hrošy. Tym bolš što sud jašče pastanaviŭ vypłacić «paciarpiełamu» 1 500 rubloŭ — z kožnaha zarobku žančyny ŭtrymlivali kala 50 rubloŭ.

U takoj situacyi na dapamohu pryjšoŭ stary znajomy Andrej Čyž, zasnavalnik i ŭłaśnik firmy «Nieakamień», jakaja zajmajecca vyrabam pomnikaŭ. Jon pryniaŭ žančynu na pracu da siabie, niahledziačy na mnohija niazručnaści. I zaklučyŭ damovu ab hnutkim hrafiku pracy, pavodle jakoj žančyna, jakaja pracavała na čverć staŭki, mahła zastupać na pracu nie a 8-j hadzinie, jak joj było pradpisana, a a 6-j. Paśla ž jana, vyzvaliŭšysia raniej, pracavała cyrulnicaj. 

I ŭsio b, moža, było dobra, kab nie podłaść «paciarpiełaha» milicyjanta. 

Praź niejki čas Liško, jakomu, jak jamu zdałosia, štomiesiac prychodziła zamałaja suma, pačaŭ vyśviatlać, dzie i jak pracuje Valancina — i daviedaŭsia, što ŭ aficyjny čas pracy žančyna pracuje nie ŭ pakazanym miescy, a cyrulnicaj.

U vyniku Miadźviedź abvinavacili ŭ tym, što, «dziejničajučy z karyślivych pamknieńniaŭ, jakija vyjaŭlalisia ŭ imknieńni ažyćciaŭlać bolš apłačvanuju pracoŭnuju dziejnaść», jana nibyta schiliła Čyža aformić falšyvyja dakumienty. I abodva pajšli pad sud.

Čyža abvinavacili ŭ tym, što «z karyślivaj zacikaŭlenaści, jakaja vyjaŭlałasia ŭ imknieńni atrymać materyjalnuju vyhadu ŭ vyhladzie zarabotnaj płaty Valanciny Miadźviedź i dadatkovych vypłat ź jaje boku, a taksama ź inšaj asabistaj zacikaŭlenaści, što vyjaviłasia ŭ žadańni akazać pasłuhi svajoj znajomaj Miadźviedź, jakaja imknułasia ažyćciaŭlać bolš apłačvanuju pracoŭnuju dziejnaść u svoj pracoŭny čas u PHUP «Nieakamień», skłaŭ i vydaŭ va KVI Biarozaŭskaha rajvykankama zaviedama niepraŭdzivy tabiel vykarystańnia pracoŭnaha času».

Nijakija arhumienty abarony ŭ sudzie, naturalna, pryniatyja pad uvahu nie byli. 23 sakavika sud Biarozaŭskaha rajona pryznaŭ Andreja Čyža i Valancinu Miadźviedź vinavatymi ŭ ździajśnieńni złačynstvaŭ pavodle č. 1 art. 427 KK «Słužbovaja padrobka».

Andreja Čyža pakarali štrafam u pamiery 350 bazavych vieličyń — 11 200 biełaruskich rubloŭ. Valancinie Miadźviedź z ulikam sukupnaści prysudaŭ u vyniku pryznačyli 3 hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»). Heta značyć, što da papiaredniaha prysudu žančynie dadali jašče 1 hod «chatniaj chimii».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?