Pavodle źviestak Biełaruskaj aŭtamabilnaj asacyjacyi, za 2021 hod u Biełarusi pradali 41 217 novych aŭtamabilaŭ, ź ich 4173 adzinki (kala 10 %) skłali aŭtamabili marki Renault. Pa vynikach hoda francuzski brend zaniaŭ čaćviortaje miesca pa papularnaści, sastupiŭšy tolki Lada, Geely i VW.
Bolš za 80% aŭto — rasijskaj vytvorčaści
Spynieńnie vytvorčaści aŭtamabilaŭ marki Renault ŭ Maskvie moža ŭ značnaj stupieni paŭpłyvać na prodažy aŭto ŭ Biełarusi.
«Siarod novych mašyn, jakija pradajucca ŭ Biełarusi, aŭtamabili rasijskaj vytvorčaści zajmajuć bolš za 80% rynku, biełaruska-kitajskaja Geely — bolš za 15 pracentaŭ. Na dolu techniki, impartavanaj z trecich krain, vypadaje ŭsiaho niekalki adsotkaŭ. Tamu, kali i źjavicca zabarona na ŭvoz novych aŭto ź Jeŭropy dy inšych krain u Biełaruś, dla pieravažnaj bolšaści biełaruskich dyleraŭ heta zastaniecca niezaŭvažnym. Siarod abmiežavańniaŭ na hety momant jość tolki zabarona na impart raskošnych aŭtamabilaŭ. Heta zabarona raspaŭsiudžvajecca razam na Rasiju i Biełaruś», — adznačyŭ ekśpiert.
«Deficyt aŭtamabilaŭ u Biełarusi jość, ale chutčej heta deficyt aŭtamabilaŭ pa prymalnaj canie. U šerahu pastaŭščykoŭ jość zapasy tavaru, jakich pavinna chapić minimum na miesiac-paŭtara, ale jany vystaŭlajuć ich pa takoj canie, što ich praktyčna nichto nie kuplaje.
Havoračy pra rost cen, treba razumieć, što jany značna vyraśli nie tolki ŭ rublovym ekvivalencie, ale i ŭ valutnym. U niekatorych vypadkach cana ŭ dalarach padniałasia adrazu na 30%. Tamu prodažy ciapier, možna skazać, nijakija», — padkreśliŭ surazmoŭca.
Pavodle słoŭ śpiecyjalista, akramia samich cen, klijentaŭ strymlivajuć niezrazumiełyja pierśpiektyvy, zhortvańnie kredytavańnia bankami i vysoki pracent lizinhu ŭ zamiežnaj valucie.
Vytvorcy čakajuć
«Što tyčycca prypynieńnia vytvorčaści aŭtamabilaŭ, to takija źjavy sustrakajucca nie tolki ŭ Rasii. Źviazana heta nie ź jakimi-niebudź sankcyjami, a z parušeńniem łahistyčnych łancužkoŭ. Vajna va Ukrainie spyniła peŭnyja vytvorčaści kamplektujučych dla jeŭrapiejskich zavodaŭ, tamu i ŭ Jevropie niekatoryja vytvorčaści taksama prastojvajuć.
Kali havaryć kankretna pra vytvorcaŭ, jakija majuć zavody ŭ Rasii, to mała chto ź ich zajaviŭ pra sychod z rynku. U asnoŭnym jany kažuć, što prypynili pracu. Usie čakajuć niejkaha vyrašeńnia kanfliktu va Ukrainie, stabilizacyi i mahčymaha adkatu častki sankcyj.
Ja daloki ad dumki, što zborka i vytvorčaść mašyn viadomych brendaŭ u Rasii spyniacca. Miarkuju, ciapier kancerny prosta zaniali čakalnuju pazicyju».
U teoryi, kali vytvorčaść aŭtamabilaŭ na rasijskich zavodach nie naładzicca, to na rynak mohuć pryjści novyja hulcy, jakija buduć hatovyja pastaŭlać svaju pradukcyju. U pieršuju čarhu, havorka moža iści pra kitajskich vytvorcaŭ. Adnak heta nie chutki praces. Kab pačać pastaŭlać madeli, jakija raniej nie impartavalisia na naš rynak, im nieabchodna budzie prajści praceduru siertyfikacyi. Praces atrymańnia siertyfikata adabreńnia typu transpartnaha srodku (ATTS) niachutki i dosyć zatratny.
Takoj mahčymaści ekśpiert nie vyklučaje, ale rabić niejkija surjoznyja prahnozy ŭ biahučych umovach ličyć niemetazhodnym.
«Treba razumieć, što kali rynak budzie mieć patrebu ŭ mašynach, to ich pačnuć zavozić ź inšych krain, a značyć, buduć vyrašać pytańni ź siertyfikacyjaj. Naprykład, užo jość infarmacyja, što z-za niedachopu kampanientaŭ u Rasii płanujuć vypusk hruzavych aŭtamabilaŭ ekałahičnaha standartu Jeŭra-2. Ale dziejučaje zakanadaŭstva nie dazvalaje rehistravać novy transpart z takim nizkim ekałahičnym standartam. Tamu pytańnie ich siertyfikacyi ciapier budzie vyrašacca na zakanadaŭčym uzroŭni».
Pry nieabchodnaści pasłableńni ŭ prachodžańni siertyfikacyi mohuć zakranuć i lehkavyja aŭtamabili. Tut pytańnie chutčej u tym, nakolki rynak budzie mieć patrebu ŭ pryniaćci tych ci inšych pasłableńniaŭ.
Beuška budzie ŭ trendzie
Havoračy pra najbližejšuju pierśpiektyvu, surazmoŭca ličyć, što ciapier asnoŭny ruch u aŭtabiznesie budzie źviazany z užyvanymi aŭtamabilami.
«Aŭtadylery i lizinhavyja kampanii pieraklučacca na pracu z beuškaj, u tym liku i ź Jeŭropy. Budzie raźvivacca arenda i prakat. Heta toje, na što ciapier pieryaryjentujecca naš rynak».
Havoračy ab pierśpiektyvach biełaruskaha rynku novych aŭtamabilaŭ, ekśpiert adznačaje, što navat u vypadku chutkaha zaviaršeńnia kanfliktu stabilizacyja zojmie niekalki miesiacaŭ.
«Bolšaści brendaŭ navat pa samych aptymistyčnych prahnozach tolki na naładžvańnie łahistyčnych łancužkoŭ spatrebicca nie mienš za dva miesiacy. Zrazumieła, što biznes u lubym vypadku budzie namahacca naładzić hetyja łancužki, kab narmalizavać situacyju. Adnak pra niejkuju mahčymuju stabilizacyju my zmožam pačać havaryć nie raniej, čym u mai-červieni. Hałoŭnaje, kab hetyja nanova naładžanyja šlachi nie pierapynilisia praź niejkija novyja abmiežavańni i zabarony».
Čytajcie taksama: «Dalar ličym pa 6 rubloŭ, a jeŭra pa 6,5». Što adbyvajecca na rynku aŭtazapčastak
