Zanatavali asnoŭnaje ź jaje intervju jutub-kanału «Skažy Hardziejevaj». 

Mielnikava adznačaje, što jašče ŭ śniežni, kali z usioj Rasii pierakidvalisia vojski da miažy z Ukrainaj, zrazumieła, sprava idzie da vajny:

«Zanadta šmat vajskoŭcaŭ, zanadta vialikaja linija. Kali b jany chacieli tolki ŭ Danbas, usio b abmiežavałasia tolki Rastoŭskaj vobłaściu, jak heta było ŭ 2014-m», — dzielicca jana.

Mielnikava kaža, što jašče padčas Pieršaj čačenskaj vajny baćki pryjazdžali ŭ častki i zabirali adtul svaich dziaciej — niechta davaŭ chabar, niechta ŭciakaŭ praź dzirki ŭ płocie. Mienavita tak jana raić rabić i ciapier tym baćkam, čyje dzieci telefanavali i kazali, što ich viazuć da miažy z Ukrainaj. Adnak ciapier ludzi bajacca tak rabić.

«Anivodnaja sukina dačka i anivodny sukin syn — nichto nikudy nie pajechaŭ», — emacyjna kaža Mielnikava.

Taksama jana adznačaje, što ŭkrainskija vajskoŭcy sapraŭdy dobra staviacca da vajennapałonnych, źviartaje ŭvahu na toj fakt, što amal usie rasijskija pałonnyja kažuć pra toje, što nie viedali, kudy jeduć. Na dumku Mielnikavaj, heta moža aznačać, što rasijskim vajskoŭcam sapraŭdy mahli nie začytvać zahad ab nastupie na Ukrainu.

Pravaabaronca adznačaje, što ludzi, jakija źviartajucca pa dapamohu ŭ Kamitet sałdackich maci, bajacca nazyvać imiony svaich dziaciej i numary častak, dzie jany niasuć słužbu, a biez aficyjnaha zvarotu jany ničoha nie mohuć zrabić.

Maŭčać navat tyja, chto straciŭ blizkich. Svajaki sałdataŭ čakajuć ad pravaabaroncaŭ cuda, a cudy nie zaŭsiody atrymlivajucca, adznačaje Mielnikava.

Jana taksama źviartaje ŭvahu na toje, što ciapierašniaja vajna bolš žorstkaja ŭ paraŭnańni z vajnoj u Čačni:

«Kolki tam dzion prajšło, a ŭžo takija straty, takija razbureńni… Užo paśpieli pahražać jadziernaj zbrojaj. Voś tut ja napałochałasia, bo namier zanadta kankretny i niama ničoha, što mahło b spynić čałavieka, jaki choča kinuć rakietu ź jadziernaj bojehałoŭkaj».

Adkazvajučy na pytańnie pra mahčymyja straty rasijskich vajskoŭcaŭ, Mielnikava kaža:

«U mianie niama acenki, bo ŭ mianie jość śpisy, jakija daje ŭkrainski bok, i ja schilnaja vieryć hetym śpisam, bo jany paimiennyja».

Jana taksama adznačaje, što rasijski bok nie kaža publična, dzie znachodziacca ŭkraincy, jakija trapili ŭ pałon, i dzie zachoŭvajuć cieły zahinułych sałdat ZSU.

«Našy nie majuć zvyčki źbirać cieły zahinułych i nie zaŭsiody padbirajuć paranienych — tańniej napisać «źnik bieź źviestak».

Raspaviadajučy pra pałkoŭnika Kavincova, piłota ciažkaha bambardziroŭščyka, źbitaha nad Hruzijaj u 2008 hodzie i źnikłaha bieź źviestak, Mielnikava cytuje słovy, skazanyja kamandavańniem žoncy, što sprabavała daviedacca pra los svajho muža:

«Ty naohuł zatknisia, inakš my zabiarem u ciabie kvateru, strachoŭku tabie nie vypłacim».

Pravaabaronca padkreślivaje, što havorka nie pra prostaha sałdata, a pra vyšejšaha aficera, kamandzira bambardziroŭščyka, jaki moža nieści jadziernuju zbroju, vajskoŭcaŭ z padobnaj kvalifikacyjaj nie bolej za 40 čałaviek na ŭsiu Rasiju.

Jašče ŭ časy Harbačova Kamitet sałdackich maci damohsia taho, kab vajskoŭcy mieli abaviazkovuju strachoŭku. Na siońniašni momant vypłaty siemjam zahinułych składajuć 12 miljonaŭ rasijskich rubloŭ (kala 120 000$ pa ciapierašnim kursie).

Mielnikava adznačaje, što Rasija adpraviła na vajnu «ŭsich, chto patrapiŭ pad ruku», miarkujučy pa ŭsim, navat tych sałdat terminovaj słužby, jakija pastupili ŭ čaści letaś u śniežni.

Mielnikava kaža, što vielmi baicca za ŭkrainskich vajskoŭcaŭ, jakija trapili ŭ pałon da rasijskich sałdat, i vykazvaje spadzieŭ, što ich nie trymajuć u Łuhansku.

12 bajcoŭ Rashvardyi z Krasnadarskaha AMAPu admovilisia jechać va Ukrainu. Jany paličyli zahad pierasiakać miažu niezakonnym

Siońnia adbyŭsia pieršy paŭnavartasny abmien pałonnymi pamiž Rasijaj i Ukrainaj

«My razumieli, što heta budzie adrazu paśla Alimpijady». Hałoŭred rasijskaj «Novaj haziety» tłumačyć łohiku Pucina

Клас
0
Панылы сорам
0
Ха-ха
0
Ого
0
Сумна
1
Абуральна
0