Fota: Reuters
«Treba skazać jasna: heta — vajna»
«24 lutaha, kali vajna pačałasia, my byli z maim mužam — jon taksama tut pracuje na Pieršym kanale, apierataram — u Miłanie, kab rabić repartaž pra tydzień mody. […] Kali ŭsio pačałosia, ja tut ža patelefanavała ŭ Maskvu, spytała, ci pavinna ja pierastać [zdymać pra modu] i viarnucca. Mnie skazali: nie, prytrymlivajemsia płana, praciahvajem. Tak što jašče tydzień my praviali pamiž fashion-shows, modaj [dniom] i nočču — pierad ekranami, hledziačy na toje, što adbyvajecca tam [va Ukrainie]».
«Dla mianie nie było pytańnia, ci praciahvać. I nie było pytańnia, ci nazyvać toje, što adbyvajecca, «miratvorčaj apieracyjaj». Heta — vajna. Treba skazać jasna: heta — vajna».
«Jak straus, chavała hałavu ŭ piasok»…
Ahałakava pryznała, što da hetaha «išła na mnohija kampramisy ŭ svaim prafiesijnym žyćci», «jak straus, chavała hałavu ŭ piasok»… Raspaviała, što jašče ŭ 2005 hodzie, kali zajmała prestyžnuju pasadu viadučaj Pieršaha kanała, paprasiła pieravieści jaje na pasadu ŭłasnaha karespandenta ŭ Paryžy. Dumała, što takim čynam budzie mienš sutykacca z vykanańniem prapahandysckich zadač. Tak było zusim niadoŭha, a z 2014 hoda ŭsio značna pahoršyłasia.
«Ja bolš nie była ŭ schovancy ad prapahandy», «ja pavinna była šukać tolki niehatyŭnyja naviny» — pra Złučanyja Štaty, a potym — pra Francyju, kudy znoŭ viarnułasia».
Što da rasijskich padziejaŭ, «my dajšli da taho, što ŭ televizary, u navinach, my bačym historyju tolki adnaho čałavieka ci hrupy ludziej, jakija jaho atačajuć […]; u našych navinach niama krainy, u našych navinach niama Rasii».
Bolšaść supracoŭnikaŭ — suprać prapahandy, ale «jany ŭ zakładnikach»
Žanna zapeŭnivaje, što bolšaść supracoŭnikaŭ Pieršaha kanała — suprać prapahandy, ale jany «nie mohuć» kinuć joju zajmacca — «u tych, chto suprać, jość siemji, u ich jość staryja baćki, jakim, mahčyma, patrabujucca darahija leki, u ich jość dzieci, jakija chodziać u muzyčnyja škoły i spartovyja siekcyi, u ich jość ipateka, jakuju jany pavinny zakryvć — jany apynulisia ŭ zakładnikach».
«I potym, viedajecie, my, ruskija, vielmi šmat byli biednymi — nie adzin raz», — padkreśliła eks-supracoŭnica Pieršaha kanała, nahadaŭšy i pra savieckuju biednaść, i pra defołt 1998-ha, i ciažkaści kryzisu 2008-ha.
«Vy vyrakajecie [Rasiju] na haleču i razbureńni»
Ahałakava zajaviła, što «tatalnyja sankcyi», jakimi «Zachad abkłaŭ Rasiju», «najpierš udaryli pa siarednim kłasie — pa ludziach, jakija zaŭsiody padzialali demakratyčnyja kaštoŭnaści».
«Vy hublajecie svaich sajuźnikaŭ u hetaj historyi», — sa škadavańniem adznačyła Žanna, padkreśliŭšy: «Vy vyrakajecie vialikuju krainu, u jakoj 140 miljonaŭ čałaviek, na haleču i razbureńni».
«Mnie nichto nie zapłaciŭ. Ja nie špijon»
«Ja viedaju, što ŭ Rasii mianie abvinavaciać u tym, što ja špijon, — skazała Ahałakava. — Mnie nichto nie zapłaciŭ. Ja nie špijon. I ja nie pracuju ni na kaho, akramia majoj krainy».
Žanna taksama padkreśliła, što vyrašyłasia na sychod ź Pieršaha, tamu što ŭ jaje, u adroźnieńnie ad kaleh, «vyjhryšnaja pazicyja»: «Ja tut, u Francyi, u adnosnaj biaśpiecy».
«I hetaja naša sustreča maje tolki adnu metu — ja chaču, kab u Rasii mianie pačuli, ja chaču, kab tam navučylisia adroźnivać prapahandu i šukali inšyja krynicy infarmacyi, ja chaču, kab ludzi pierastali być zambavanymi», — praciahnuła eks-supracoŭnica Pieršaha kanała.
Spadziajusia, rasijski narod sam zrazumieje, u jakuju pastku patrapiŭ
Na pytańnie bałharskaj žurnalistki pra toje, što Ahałakava moža skazać ludziam, jakija pavieryli prapahandzie ŭ tym, što śmierci tysiač mirnych žycharoŭ va Ukrainie heta nibyta «fake news», eks-supracoŭnica Pieršaha adkazała:
«Čamu hety nievierahodny ŭzdym nacyjanalizmu ŭ Rasii? Čamu ciapierašniaja ŭłada maje […] bolš za pałovu padtrymki nasielnictva ŭ Rasii? Ułada hulała ŭ vielmi adčuvalnuju hulniu. Dla kožnaha ruskaha vyniki Druhoj suśvietnaj vajny — heta asabistaja drama. My stracili 27 miljonaŭ čałaviek…»
«Tamu, kali ŭ Rasii vymaŭlajuć słova «nacyzm», u nas adna reakcyja — heta treba źniščyć», — zajaviła Ahałakava.
Ale padkreśliła: «Ruskim nie dali inšaj infarmacyi — pra toje, što vielmi pravyja partyi va Ukrainie navat nie prajšli ŭ parłamient. Pra toje, što ŭ 2021 hodzie na tych samych sprečnych terytoryjach na Danbasie byli zabityja 8 čałaviek. Nie 8 tysiač, nie 8 sotniaŭ, 8 čałaviek — u sutyknieńniach z ukrainskimi vojskami».
«Vosiem zahinułych — heta taksama šmat, heta taksama trahiedyja, ale heta inšyja ličby», — skazała jana.
«Heta manipulacyja, heta chłuśnia, heta vializny padman. I heta vializnaja trahiedyja, ź jakoj my nie zmožam vyjści dziesiacihodździ. Što b ciapier ni adbyvałasia. Navat kali vajna spynicca prama ciapier, dziesiacihodździ maja kraina budzie ciarpieć».
Na pytańnie, jak ludzi «pierastanuć zambavacca», kali bolš amal niama niezaležnych ŚMI, kali zakon zabaraniaje samo słova «vajna», Ahałakava adkazała:
«Vydatnaje pytańnie… Ja nie viedaju [na jaho adkazu]. Ja nie palityk, viadoma, ale jość dva sposaby… Albo rasijskaja ŭłada sama ŭsio spynić i viernie nazad, adstupić nazad chacia b na piać hadoŭ. Ale ja baču heta niemahčymym… Druhoje — toje, što rasijski narod sam zrazumieje, u jakuju pastku jon patrapiŭ. Ale što budzie dalej, ja nie ŭjaŭlaju. Ja bajusia i taho, i inšaha varyjantu».
«Vajna — la vašych dźviarej»
Na pytańnie, čamu jana ŭsie hetyja hady maŭčała, a vyrašyła vykazacca tolki ciapier, Žanna Ahałakava skazała:
«Tamu što vajna — la vašych dźviarej. Nie prymajcie situacyju lehkadumna… Heta nie spynicca voś tak. Heta nie spynicca…»
«Prabačcie nam». Byłaja prapahandystka NTV Lilija Hildziejeva — pra zvalnieńnie, adjezd z Rasii i pracu na dziaržkanale
