Biełaruski isteblišmient dobra viedaje, što publičnyja vystupy pierad žurnalistami, tym bolš na praciahu niekalkich hadzin, — vielmi niebiaśpiečnaja sprava. Pieršyja pałosy dziaržaŭnych haziet i chviliny navinaŭ na telebačańni advodziacca Łukašenku. U inšym vypadku na heta reahujuć vielmi dbajna i niervova — takija voś umovy vyžyvańnia biełaruskaha čynavienstva.
Ale ž vyklučeńnie, kali heta ŭzhodniena źvierchu.
Kali ŭvažliva prasłuchać zapis tranślacyi, to składajecca ŭražańnie, što ničoha novaha šmatlikim žurnalistam Makiej nie paviedamiŭ: zvykły nabor štampaŭ i farmulovak biełaruskaj dypłamatyi.
Fota Biełprescentra
Aproč adnaho ścisłaha, ale ž vielmi važnaha vykazvańnia, jakoje adrazu ž padchapili jak u Biełarusi, tak i na Zachadzie. Žurnalisty vyłučyli asnoŭnuju navinu, dziela jakoj, zdajecca, byŭ zadumany ŭvieś dypłamatyčny šuchier.
«Paśla vučeńniaŭ u Biełarusi nie zastaniecca nivodnaha rasijskaha vajskoŭca», — mienavita takija zahałoŭki źjavilisia jašče padčas praviadzieńnia pres-kanfierencyi.
Tak robiać, kali chočuć zabiaśpiečyć alibi, zamacavać niešta nadta važnaje, kab nie było šancaŭ paśla admovicca.
Ci supadzieńnie, što paślazaŭtra, 18 lutaha, adbudziecca sustreča Łukašenki i Pucina? Moža, i tak. Ale ž peŭny padmurak dla razmovy ŭžo padrychtavany.
Možna kanstatavać, što Zachad adnaznačna zaŭvažyŭ zajavu. Paśla zakančeńnia vučeńniaŭ ciažka budzie patłumačyć, kali niejkaja rasijskaja vajskovaja častka vyrašyć pahaścić u biełaruskaj bahnie.
Źviarnu ŭvahu na jašče dźvie cikavyja akaličnaści. Na pres-kanfierencyi prysutničała namieśnica hałoŭnaha redaktara «Narodnaj voli», jakaja zadała dva davoli vostryja pytańni. Pryčym u pieršy raz, jak padałosia, žurnalistka navat nie čakała, što joj daduć prava vystupu.
A pa-druhoje, ździviła farmuloŭka, jakuju vykarystaŭ pradstaŭnik dziaržaŭnaj haziety «SB. Biełaruś siehodnia»: «U peŭnaj častcy biełaruskaj patryjatyčnaj supolnaści nazirajecca niezadavolenaść biazzubaj, niedastatkova ahresiŭnaj pazicyjaj MZS».
Kamu jak nie vopytnamu dypłamatu viedać, što za takimi farmuloŭkami moža chavacca prazrysty namiok.
Pra toje, što pazicyi Makieja chistajucca, kažuć daŭno. Čaho tolki vartyja zaŭvahi nakont niełajalnaha dypłamatyčnaha korpusu, jaki prajaviŭ siabie ŭ 2020 hodzie.
Nu, a sam fakt taho, što syn čynoŭnika publična vykazaŭsia i syšoŭ z MZS, uvohule vyhladaje čornaj pamietaj. Na pytańni pra syna, darečy, pres-kanfierencyja Makieja i skončyłasia.
Analityki taksama nahadvajuć, što nie apošniuju rolu ŭ stracie davieru moh adyhrać prykład Kazachstana, dzie były ministr zamiežnych spraŭ źmianiŭ jełbasy.
Uładzimir Makiej zajmaje pasadu ministra sa žniŭnia 2012 hoda. Cikava, što jaho papiarednik, Siarhiej Martynaŭ, uznačalvaŭ MZS na praciahu dzieviaci hod. U Makieja idzie dziasiaty…
Čytajcie jašče:
«Adbyłasia razhiermietyzacyja mazhavoj abałonki ŭ zachodnich palitykaŭ». Uładzimir Makiej zrabiŭ šerah hučnych zajavaŭ
