Što pahladzieć. «Ryčar» — kryminalny sieryjał, ad jakoha navat krytyki ŭ zachapleńni

Fota: ageratingjuju.com.

Heta historyja Džeka Ryčara, byłoha vajennaha i śledčaha, jaki vyrašyŭ syści sa słužby i pasprabavać žyć jak prosty hramadzianin.

Ryčar jedzie ŭ padarožža pa rodnaj krainie, jakoj niekali słužyŭ. Ale kali jon pryjazdžaje ŭ nievialiki horad u štacie Džordžyja, tam adbyvajecca pieršaje za 20 hadoŭ zabojstva. Vidavočcy śviedčać, što jany bačyli na mieście zabojstva Ryčara, i palicejskija jaho aryštoŭvajuć.

Vieteran sprabuje dakazać svaju nievinavataść, ale razumieje, što maje spravu sa zmovaj vakoł siabie. Ciapier jaho zadača — adnavić spraviadlivaść i znajści sapraŭdnaha złačyncu.

Sieryjał «Ryčar» źniali na asnovie detektyvaŭ piśmieńnika Li Čajłda. Pa hetych tvorach užo źniatyja dźvie poŭnamietražki, i ŭ abiedźviuch rol vieterana vykonvaje zorka bajevikoŭ Tom Kruz. Adnak amatary tvoraŭ Čajłda ličać, što Kruz dla hetaj roli nie nadta padychodzić, i nie ŭ apošniuju čarhu praz svoj rost. U akciora rost — 170 santymietraŭ, a knižny Ryčar — vielikan vyšynioj u 195 santymietraŭ i z vahoj u 120 kiłahramaŭ.

Ryčar: vałacuha biez rodnych i suviaziej, jaki vybłytvajecca ź niebyvałych historyj

U tym, što tyčycca źniešnaści hałoŭnaha hieroja, novy sieryjał adpaviadaje knižnaj pieršakrynicy. Ryčara hraje Ałan Ryčsan, i hledačy sieryjała navat narakali, što jon pierakačany dla Ryčara. Adnak Ałan bolš spakojny i abajalny, čym Kruz, jaho hieroj zdolny na dobryja žarty.

Heta prosty vałacuha, jaki nie maje ni siamiejnych suviaziaŭ, ni sacyjalnych abaviazkaŭ. Ryčar nie karystajecca ni telefonam, ni internetam z sacsietkami, z usich rečaŭ jon maje tolki pačak najaŭnych, pašpart i zubnuju ščotku. Jon zdolny na niadrennuju dedukcyju i vykručvajecca z usich niepryjemnaściej, u jakija traplaje.

Nazirać za jaho pryhodami viesieła, dy jon i sam atrymlivaje ad ich kajf. Dapamahło i toje, što stvaralniki sieryjała ź vialikaj uvahaj pastavilisia da knih, na bazie jakich jon stvorany. Ryčsan, naprykład, pračytaŭ usie 24 ramany pra Džeka Ryčara, kab padrychtavacca da roli.

A jašče stvaralniki sieryjała zrabili ceły śpis detalaŭ, jakija charakternyja dla knižnaha Ryčara, i jakija važna było ŭličvać u televiersii historyi. Naprykład, Džek Ryčar zaŭsiody pje tolki čornuju kavu, jon nikoli nie stavicca da žančyn drenna. Heta adnačasova vielmi prosty i vielmi składany piersanaž.

Pradstaŭniki stryminhavaj płatformy Amazon, što vypuściła novaha «Ryčara», kažuć, što

sieryjał uvajšoŭ u piaciorku samych prahladajemych za pieršyja 24 hadziny z momantu relizu ŭ ZŠA i va ŭsim śviecie.

Heta taksama adzin ź niešmatlikich aryhinalnych sieryjałaŭ płatformy z vysokim rejtynham — 4,7 z 5 mahčymych bałaŭ. U vyniku «Ryčara» praciahnuli na druhi siezon usiaho praz try dni paśla premjery pieršaha.

Krytyki ličać novy sieryjał pieršaj paśpiachovaj adaptacyjaj knih Čajłda. U recenzijach «Ryčara» nazyvajuć «vialikim viartańniem kultavaha hieroja», Guardian zhadvaje hieroja Ryčsana jak «niekaha, kim Tom Kruz nikoli nie budzie». Inšaje aŭtarytetnaje vydańnie, RadioTimes, piša, što žadańnie pasprabavać novy nakirunak dla historyi Ryčara — źniać sieryjał — moža akazacca razumnym krokam.