Fota: flickz.co.nz.
Sapraŭdnaje siabroŭstva ludziej z roznych miroŭ
Hałoŭnaja zorka stužki — 47-hadovy Chaakin Fieniks. Vy dakładna pamiatajecie jaho pa karcinie 2019 hoda «Džokier», za jakuju akcior atrymaŭ «Oskar» jak lepšy vykanaŭca mužčynskaj roli. A viadomaść Fieniks nabyŭ jašče na pačatku 2000-ch, kali źniaŭsia ŭ «Hładyjatary» razam z Rasełam Krou.
U «Kamon Kamon» Fieniks hraje radyjožurnalista Džoni, jaki padarožničaje pa ZŠA i hutaryć ź dziećmi pra ich žyćcio i budučyniu.
U Łos-Andželesie jon sustrakajecca z Džesi, svaim dzieviacihadovym plamieńnikam. Maci chłopca Viŭ, siastra Džoni, prosić jaho pryhledzieć za Džesi, pakul jana budzie zajmacca zdaroŭjem muža — toj znachodzicca na miažy niervovaha zryvu. Adnosiny Džoni i jaho siastry — asobnaja historyja: jany nie razmaŭlali hod z taho času, jak ich maci pamierła, pakutujučy na demiencyju.
Džoni pahadžajecca na prośbu Viŭ i nakiroŭvajecca razam ź plamieńnikam u padarožža. Razam jany jeździać pa krainie, hutarać i spaznajuć adzin adnaho, pieratvarajučysia z naminalnych svajakoŭ u sapraŭdnuju siamju.
Fota: media.multikino.lt.
Film atrymaŭ dobryja vodhuki krytykaŭ i naminacyi na pryzy kinafiestyvalaŭ, u tym liku na prestyžnuju premiju Brytanskaj akademii kino i televizijnych mastactvaŭ (BAFTA). Ekśpierty acanili ihru akcioraŭ, pryčym nie tolki zornaha Fieniksa, ale i maleńkaha Vudzi Normana, jaki syhraŭ rol Džesi. Adznačajuć, što karcina, źniataja ŭ čorna-biełych kolerach, robicca bolš atmaśfiernaj i nastalhičnaj.
Nieviadomaje dzicia, jakomu pryśviečany film
Cikava, što stužka ŭklučaje ŭ siabie sapraŭdnyja intervju z amierykanskimi dziećmi ŭ roznych haradach krainy: Detrojcie, Ńju-Jorku, Novym Arleanie. Siarod ich — hutarka ź dzieviacihadovym Devante Brajantam, chłopcam z Novaha Arleana, jaki paźniej zahinuŭ u trajnym zabojstvie za miesiac da svajho dziasiataha dnia naradžeńnia.
Jak ža Brajant trapiŭ u stužku? Režysior karciny Majk Miłz u dziacinstvie šmat kamunikavaŭ z čałaviekam z Novaha Arleana. Toj raskazvaŭ Miłzu pra svoj horad i nadzialaŭ jaho ledźvie nie mistyčnymi ŭłaścivaściami, tamu hetaje miesca nabyło važnaść dla chłopca. Ciapier režysior časam uklučaje ŭ svaje stužki temu Novaha Arleana, i «Kamon Kamon» nie staŭ vyklučeńniem.
Devante Brajant. Fota: thegrio.com.
Miłz paznajomiŭsia z mastačkaj Džeki Sameł, što jakraz žyła ŭ Novym Arleanie, i damoviŭsia ź joj vykarystoŭvać jaje dom jak dekaracyi dla filma (paźniej dom navat pieratvaryŭsia ŭ vytvorčuju bazu dla stužki). Vyśvietliłasia, što mastačka pryhladaje za niekalkimi dziećmi sa svajho rajona, i adnym ź ich jakraz byŭ Devante Brajant. Tak jon i jaho dvoje siabroŭ apynulisia siarod maleńkich zorak karciny.
«Kamon Kamon» pryśviacili jaho pamiaci.
Cytata ź filma
«Što b ni zdaryłasia, idzi napierad (you have to c'mon c'mon c'mon)».
Rejtynhi na bujnych suśvietnych resursach:
IMDB — 7,6 / 10.
Rotten Tomatoes — 94%.
Padborka kamiedyj pad roznyja husty, jakija vy raniej mahli abminuć uvahaj
«Pieršy sustrečny». Ramantyčnaja kamiedyja z Dženifier Łopiez — idealny varyjant, kab prosta rassłabicca
