Ilustracyi da svaich dopisaŭ fihurant kryminalnaj spravy znachodziŭ prosta ŭ internecie, paviedamlała MUS. Na jaho staroncy možna było ŭbačyć fota, videa i teksty, dzie padtrymlivajucca idei Treciaha rejcha, a taksama inšych režymaŭ, jakija simpatyzavali Hitleru.
Cikavaść da nacysckaj ideałohii ŭ žychara Viciebska źjaviłasia jašče ŭ junactvie, z 16 hod jon staŭ źbirać materyjały dla svajoj kalekcyi, jakuju pačaŭ publikavać u sacsietkach z 2018 hoda. Da fota nacystaŭ jon dadavaŭ dopisy pra ich hieraizm, byli ŭ jaho i vyjavy kałabarantaŭ, naprykład, armii Ułasava.
Mužčyna nie mieŭ prablem z zakonam, raniej nie byŭ sudzimy. Z adukacyi ŭ jaho — skončanaja siaredniaja škoła. Apošnija hady žyŭ u Rasii, pierabraŭsia tudy na zarobki.
Svaje pohlady jon nie chavaŭ i tam — chadziŭ u kiepcy z emblemaj adnoj z dyvizij SS, jakaja zajmałasia achovaj kancłahieraŭ. Zatrymali jaho, kali jon pryjechaŭ na radzimu.
U viciebskaj kvatery, u svaim pakoi, fihurant kryminalnaj spravy zrabiŭ tematyčnuju ścianu pamiaci, dzie visieli partrety Hitlera i Himlera, ściažok sa svastykaj.
Spravaj zajmalisia apieratyŭniki HUBAZiK, jakija ŭ intervju haziecie «Na stražie» śćviardžajuć, što byli ŭ zatrymanaha i ŭkrainski, i biełaruski ściahi, adnak u ilustracyi da materyjału hetyja «znachodki» nie demanstrujucca, u adroźnieńnie ad svastyki, partretaŭ nacystaŭ.
Cikava, što da 2021 hoda dziejnaść abvinavačanaha nie była ŭ poli zroku pravaachoŭnikaŭ, choć jaho dopisy byli adkrytyja, źbirali niamała łajkaŭ.
Try hady jon vykładvaŭ dopisy, jakija ŭschvalajuć nacyzm, naźbirałsia bolš za 130 publikacyj, a pryjšli za im letaś. U žniŭni 2021-ha jahonaja staronka była pryznanaja ekstremisckimi materyjałami.
Viadoma, što fihurant byŭ znajomy ź viciebskimi skinchedami, ale nie znajšoŭ ź imi ahulnaj movy, trymaŭsia asobna ad usich.
Jak rodnyja reahavali na jahonyja pohlady? Maci asudžała, babula, jak ubačyła ŭ pakoi partrety nacystaŭ, pierastała prychodzić u hości. Pradzied mužčyny vajavaŭ suprać niemcaŭ.
U svaju abaronu zatrymany sprabavaŭ kazać, što vykładvaŭ u sacsietki infarmacyju z adkrytych krynic, taksama śćviardžaŭ, što prosta zachoŭvaŭ infarmacyju, nikomu jaje nie dasyłaŭ, a značyć, pa jaho łohicy, nie zajmaŭsia raspaŭsiudžvańniem.
Adznačym, što pa zakonie pieraśledujecca nie tolki raźmiaščeńnie takoj infarmacyi ŭ sacsietkach, a navat repost takich dopisaŭ. I pakolki infarmacyja praciahvaje znachodzicca ŭ adkrytym dostupie, niavažna, kolki hod tamu była publikacyja ci repost, ličycca, što jana ŭsio jašče dastupnaja šyrokamu kołu.
Spačatku dziejańni žychara Viciebska kvalifikavali jak raspalvańnie varožaści na nacyjanalnaj hlebie (art. 130 KK), raniej mienavita pa hetym artykule pryciahvali da adkaznaści prychilnikaŭ nacysckaj ideałohii.
Adnak letaś u kryminalnym kodeksie źjaviŭsia novy artykuł — 130-1, jaki praduhledžvaje adkaznaść za reabilitacyju nacyzmu. Hetaja sprava stała pieršaj u Biełarusi, rasśledavańniem zajmacca Hienieralnaja prakuratura. Abvinavačanamu pahražaje štraf, abo aryšt, abo «chimija» da 5 hod, abo pazbaŭleńnie svabody na toj ža termin.
Pavodle siłavikoŭ, prychilniki nacyzmu niačasta traplajuć u pole ich zroku. Adzin z prykładaŭ — sprava Stanisłava Hančarova, jaki vajavaŭ na Danbasie, jaho sudzili, u tym liku, za raspalvańnie varožaści na nacyjanalnaj hlebie.
Čytajcie jašče:
U Viciebsku vynieśli žorstki prysud Teror-mašynie
Try hady ŭ kałonii ŭzmocnienaha režymu: vyniesieny prysud «baciušku sa svastykaj»
