3-ha lutaha ŭ pasiołak Čyrvonaja Słabada milicyjanty pryjechali zatrymlivać 38-hadovaha Dzianisa Jakuboviča, jaki na toj momant naviedvaŭ baćkoŭ. MUS paviedamiŭ, što Jakubovič byŭ u vyšuku jak abvinavačany pa kryminalnaj spravie.
Ale Dzianis i jaho 65-hadovy baćka Uładzimir akazali supraciŭleńnie milicyjantam. Baćka ŭdaryŭ adnaho ź ich prykładam palaŭničaj strelby i trojčy streliŭ u pavietra. U vyniku ich usio ž zatrymali, ciapier abodvum pahražaje da siami hadoŭ za hvałt u dačynieńni da siłavikoŭ.
«Naša Niva» źviazvałasia z maci Dzianisa Jakuboviča, byłoj školnaj dyrektarkaj, ale žančyna admoviłasia ad kamientaryjaŭ.
Ciapier źjaviłasia videa kanfliktu.
Na zapisie bačna, što zatrymlivać Dzianisa Jakuboviča pryjšli troje siłavikoŭ u cyvilnym. Dvoje zajšli ŭ dvor doma, adzin zastaŭsia čakać za płotam. Vyhladaje, što jany nie pradstaŭlalisia: bo Jakubovič patrabuje ŭ ich pakazać dakumienty, a žanočy hołas za kadram lamantuje: «Vyklikajcie milicyju!».
Taksama bačny starejšy Uładzimir Jakubovič sa strelbaju ŭ rukach. Jon šturchaje ludziej u cyvilnym, napraŭlaje na ich zbroju. U niejki momant jon robić streł u pavietra. Dzianis Jakubovič šturchajecca z adnym z «haściej», u niejki momant jany valacca na ziamlu.
Paśla kanflikt pierachodzić u słoŭny.
Potym Dzianis Jakubovič začytvaje adkaz na skarhu, jakuju jon napisaŭ u suviazi ź niepravamiernymi dziejańniami śledčaha. U adkazie paviedamlajecca, što skarha razhladajecca. U suviazi z čym napisanaja skarha — nieviadoma.
