Takajeŭ niehatyŭna aceńvaje adklučeńnie internetu padčas pratestaŭ u Kazachstanie. «Infarmacyjna my prajhrali», — skazaŭ jon. Ale tady, pa jaho słovach, było nie da hetaha. «My ŭsie razumnyja zadnim rozumam, tady nie dumali, što pra nas skažuć». Pry hetym «fejki lilisia rakoj».
Takajeŭ paćvierdziŭ, što heta jon daŭ zahad stralać na paražeńnie.
«Ja pavinien adkryta pryznać, ludzi aścierahalisia brać na siabie adkaznaść, nie było adzinaha ałharytmu. Paśla Žanaaziena byli pryniatyja zakony, jakija skoŭvali pravaachoŭnikaŭ va ŭžyvańni zbroi», ‒ skazaŭ Takajeŭ.
Tamu jon pryniaŭ rašeńnie ŭziać na siabie adkaznaść. «Ja dypłamat, ja viedaŭ nastupstvy, ja viedaŭ, što budzie takaja reakcyja. Ale biaśpieka dziaržavy ‒ na pieršym miescy».
Takajeŭ raspaviadaje, što na Kazachstan napali ŭzbrojenyja bandyty, i pa-raniejšamu nastojvaje na ich kolkaści ŭ 20 000.
«Bandyckaja akcyja praciahvałasia nie adnu hadzinu. Navat departamient palicyi adbivaŭsia dźvie nočy. Bandytaŭ było vielmi šmat. Išli z troch bakoŭ, chvalami. Błokpasty byli źmiatyja», ‒ skazaŭ jon. Pry hetym, zhodna z Takajevym, bandyty byli pad uździejańniem narkotykaŭ, nie adčuvali bolu, «navat kali im pačali stralać pa nahach».
Chto za ŭsim hetym staić, zaraz rasśledujuć. Ale vielmi mnohija bajeviki, pavodle Takajeva, paśpieli pakinuć Ałmaty.
«Heta była terarystyčnaja apieracyja, spłanavanaja bajevikami z-za miažy», ‒ upeŭnieny Takajeŭ.
«Aeraport byŭ zachopleny dla taho, kab zabiaśpiečyć prachod praź jaho hramadzian, jakija prylacieli z adnaho centralnaazijackaha horada. Heta byli padrychtavanyja bajeviki, jakija prylacieli pad vyhladam hastarbajteraŭ. Ich praviali praz pamiežnyja stojki, zapuścili ŭ horad i prystupili da kiraŭnictva apieracyi».
Apieracyja była spłanavanaja, jaje metaj byŭ zachop ułady.
Takajeŭ zhodny, što ŭsie vypadki niezakonnaha ŭžyvańnia zbroi pavinny rasśledavacca. Dla rasśledavańnia stvorana hramadskaja kamisija, «ja heta vitaju», skazaŭ Takajeŭ.
Pa jaho słovach, suprać mirnych pratestoŭcaŭ zbroja nie ŭžyvałasia.
Na pytańnie žurnalista, dzie byŭ Nazarbajeŭ i ci išoŭ ź im handal, Takajeŭ adkazaŭ:
«Nijakaha handlu i razmovy ab pryvilejach nie było. Była razmova ab statusie kiraŭnika Savieta Biaśpieki. Ja pastaviŭ pytańnie, što zaraz źviarnusia da nacyi i skažu, što zjaŭlajusia kiraŭnikom Savieta Biaśpieki», ‒ raspavioŭ jon.
Takajeŭ skazaŭ, što vystupaje za refarmavańnie palityčnaj sistemy ŭ krainie.
«Maja misija jak prezidenta ‒ dasiahnuć pośpiechaŭ u transfarmacyi palityčnaj sistemy i hramadstva. Treba vychoŭvać palityčnuju kulturu. U parłamiencie pavinna być niekalki mocnych partyj. Ja b chacieŭ, kab u hady majho prezidenctva heta zdaryłasia», ‒ skazaŭ jon.
Na pytańnie, jak doŭha jon budzie prezidentam Kazachstana, Takajeŭ adkazaŭ, što nie bolš za dva terminy. Nijakaha pierapisvańnia Kanstytucyi nie budzie.
Na pytańnie, što ciapier jon pavinien Pucinu za pryjezd vojskaŭ ADKB, Takajeŭ skazaŭ, što navat razmovy pra heta nie było.
«ADKB ‒ naša ahulnaja arhanizacyja, stvoranaja ŭ 1992 hodzie. Ja źviartaŭsia »da samoha siabie«. Vykarystańnie miratvorčaha kantynhientu ADKB było zakonnym. Miratvorcy nie zrabili ni adnaho strełu. Jany zabiaśpiečvali tył. I zhulali psichałahičnuju zapužvajučuju rolu dla bandytaŭ. Heta byŭ abjadnany kantynhient, tam była nie tolki Rasieja».
