Usio pačałosia na pačatku 2017 hoda. U pieršaha fihuranta doma znajšli dźvie dozy marychuany vahoj 0,71 hrama i 9,33 hrama.

Pieršuju dozu, jak ukazana ŭ materyjałach spravy, jon nabyŭ dla siabie. Druhuju ž dozu 16 studzienia 2017 hoda zbyŭ druhomu fihurantu. Toj patrymaŭ u siabie narkotyk adzin dzień, i 17-ha taksama staŭ padazravanym pa kryminalnaj spravie. 

Dziejańni pieršaha mužčyny śledčyja kvalifikavali pa č. 1 art. 328 KK (zachoŭvańnie narkotyka biez mety zbytu) i č. 3 art. 328 KK (raspaŭsiudžvańnie narkotyka asobaj, jakaja ŭžo ździejśniła złačynstva pa art. 328 KK — zachoŭvańnie dla siabie 0,71 hrama marychuany).

Dziejańni druhoha mužčyny kvalifikavali pa č. 2 art. 328 KK (niezakonnaje nabyćcio i zachoŭvańnie narkotyku z metaj zbytu).

12 maja 2017 hoda pieršy fihurant atrymaŭ 11 hod pazbaŭleńnia svabody, druhi — 7 hod. Pry hetym ni śledstva, ni sud nie viedajuć, dzie pieršy fihurant kupiŭ narkotyk, pry jakich abstavinach usio adbyvałasia, sam mužčyna admaŭlaŭ svaju vinu. 

Prajšło dva hady, i ŭ 2019 hodzie sud skaraciŭ terminy dla asudžanych: pieršamu — da 9 hod źniavoleńnia, druhomu — da 5 hod. Ale na hetym raźbiralnictva nie skončyłasia.

Jašče praz dva hady sprava dajšła ŭžo da Viarchoŭnaha suda, dzie namieśnik staršyni vynies pratest. Vyśvietliłasia, što ŭ asnovie prysuda lažać materyjały, pavodle jakich pieršy fihurant ździejśniŭ złačynstva ŭ stanie narkatyčnaha apjanieńnia, a heta abciažarvaje vinu.

Sam fihurant i jaho advakat na sudzie hety fakt admaŭlali, mužčyna kazaŭ, što prymaŭ karvałoł, i tamu ŭ bijałahičnych materyjałach mahli znajści rečva «fienabarbitał». Sud hety arhumient praihnaravaŭ, chacia ŭ materyjałach spravy jość adkaz z Kamiteta sudovych ekśpiertyz, što marychuana nie ŭtrymlivaje ŭ svaim składzie fienarbitału, a voś u skład karvałoła hetaje rečyva akurat uvachodzić. Bolš za toje, u akcie ahladu nie ŭkazana prykmiet apjanieńnia fihuranta.

Jašče adzin važny momant: śledčyja pradjavili abvinavačvańnie pieršamu fihurantu pa dvuch častkach art. 328, nibyta znojdzienaja ŭ jaho marychuana — heta byli dźvie roznyja dozy, nabytyja ŭ rozny čas, što dazvalaje kazać, što druhaja pakupka i zbyt — heta ŭžo paŭtornaje złačystva, jakoje ciahnie adkaznaść ad 8 da 15 hod źniavoleńnia (č. 3 art. 328 KK).

Ale nasamreč śledstvu i sudu nie viadomyja ni čas, ni miesca, ni abstaviny, pry jakich abvinavačany nabyvaŭ narkotyk, tamu niemahčyma śćviardžać, što heta było paŭtornaje, a nie adzinkavaje złačynstva (č. 1 art. 328 KK praduhledžvaje pakarańnie da 5 hod «chimii» abo ad 2 da 5 hod źniavoleńnia). Za zachoŭvańnie narkotykaŭ biez mety zbytu (č. 1 art. 328 KK), pavodle źviestak MUS, pazbaŭleńnie voli pryznačajuć 20% asudžanych.

U vyniku Viarchoŭny sud pryjšoŭ da vysnovy, što spravu treba nakiravać na novy razhlad. Uvieś hety čas, čaćviorty hod, užo asudžanyja fihuranty praciahvajuć znachodzicca za kratami.

Pa stanie na 2019 hod, u miescach źniavoleńnia było amal šeść tysiač asudžanych za raspaŭsiudžvańnie narkotykaŭ. Bolš za dźvie tysiačy dadałosia ŭ 2020-m hodzie, jašče 881 — u pieršaj pałovie 2021-ha.

Apraŭdaŭčyja prysudy pa art. 328 KK zdarajucca nadzvyčaj redka, ale ŭsio ž byvajuć. Tak, u 2020 hodzie sud apraŭdaŭ žychara Breckaj vobłaści, u jaho na pracy znajšli kala 2,5 hram rečyva, jak śćviardžałasia, z marychuanaj. Abvinavačany zajaŭlaŭ, što ŭsprymaŭ heta jak śmiećcie, ekśpiertyza paćvierdziła, što z hetaj sumiesi niemahčyma vydzialić narkotyk, u vyniku čałaviek zastaŭsia na svabodzie. Tady raźbiralnictva pa spravie raściahnułasia na dva hady.

Čytajcie taksama: «Nie było narkotykaŭ! Jamu prosta dapamahli pamierci ŭ milicyi». Siabra, jaki źbieh z krainy, raspavioŭ pra Dźmitryja Uschopava

Клас
0
Панылы сорам
0
Ха-ха
0
Ого
0
Сумна
0
Абуральна
0