Fota: «Homielskaja praŭda»
Banda aktyŭna dziejničała ŭ Homieli z 1990-ch i była adnoj z najbujniejšych u Biełarusi. Usiaho śledčyja dakazali bolš za 100 złačynstvaŭ, učynienych «marozaŭcami», u tym liku kala 20 zabojstvaŭ. Lidaraŭ hrupoŭki Siarhieja Marozava, Ihara Dančanku i Valeryja Harbataha prysudzili da vyšejšaj miery pakarańnia. Usiaho było asudžana bolš za 40 čałaviek. Niekatoryja členy bandy ŭciakli za miažu.
Siarhieja Dzierbianiova (pa mianušcy Dzierbień) — adnaho ź lidaraŭ bandy — znajšli va Uładzivastoku praz 15 hadoŭ i ekstradziravali ŭ Biełaruś.
Dzierbianioŭ byŭ adnym z najbližejšych paplečnikaŭ Marozava i kiravaŭ «słužbaj biaśpieki» bandy.
Jaho pramoj zadačaj stała likvidacyja kankurentaŭ. U padnačaleńni ŭ Dzierbianiova znachodzilisia kilery, niekatoryja da hetaha času znachodziacca ŭ vyšuku.
19 studzienia Homielski abłasny sud pryznaŭ jaho vinavatym u naŭmysnym zabojstvie dvuch i bolš asob, učynienym z asablivaj žorstkaściu, z metaj schavać inšaje złačynstva asoby, jakaja raniej ździejśniła naŭmysnaje zabojstva.
Jaho prysudzili da 15 hadoŭ pazbaŭleńnia voli ŭ papraŭčaj kałonii ŭzmocnienaha režymu.
Taksama jon abaviazany vypłacić paciarpiełaj 30 tysiač rubloŭ u jakaści kampiensacyi maralnaj škody, paviedamlaje «Homielskaja praŭda».
Staršy prakuror adździeła prakuratury Homielskaj vobłaści Julija Kanapielkina adznačyła, što pakarańnie pryznačanaje pavodle Kryminalnaha kodeksu Biełarusi, jaki dziejničaŭ na momant učynieńnia złačynstva. Jano maksimalna mahčymaje.
Nahadajem, takija ž terminy niadaŭna atrymali błohiery Ihar Łosik i Uładzimir Cyhanovič. A na 18 hadoŭ adpravili za kraty błohiera Siarhieja Cichanoŭskaha.
