U biełaruskich turmach adbyvajuć pakarańnie 346 rasijan, jašče 109 znachodziacca pad aryštam u SIZA, zajavili RBK u pasolstvie Rasii ŭ Biełarusi. Hetyja źviestki konsulskija supracoŭniki rasijskaj dypmisii pradstavili ŭ adkaz na zapyt u studzieni hetaha hoda. Pry hetym u adkazie paznačana, što infarmacyja apošni raz abnaŭlałasia 1 lipienia 2021 hoda.
Pieraśled jak minimum 11 rasijan źviazany z hramadzianskim supraćstajańniem, jakoje raspačałosia ŭ žniŭni 2020 hoda, raspaviali RBK ŭ Maskoŭskaj Chielsinskaj hrupie. Siamiora ź ich užo atrymali prysudy i adbyvajuć pakarańnie ŭ biełaruskich kałonijach:
Ihar Kapanajka atrymaŭ 1 hod i 6 miesiacaŭ pazbaŭleńnia voli za abrazu pradstaŭnika ŭłady (art. 369 KK RB) i chulihanstva (č. 1 art. 339). Kapanajka — 56-hadovy aficer zapasu. Jaho asudzili za toje, što jon zaliŭ mantažnaj pienaj dźviery supracoŭnicy milicyi.
Alaksandr Hiedžadze — 3 hady kałonii za arhanizacyju i padrychtoŭku dziejańniaŭ, jakija hruba parušajuć hramadski paradak, albo aktyŭny ŭdzieł u ich (art. 342). 35-hadovaha Hiedžadze asudzili za toje, što jon pieravoziŭ na karšerynhavaj mašynie šyny, ź jakich potym nibyta pratestoŭcy budavali barykady.
Andrej Novikaŭ — 2 hady i 6 miesiacaŭ (pa art. 342) i niezakonnaje pierasiačeńnie dziaržaŭnaj miažy (art. 371). Novikaŭ byŭ vałancioram u kamandzie Śviatłany Cichanoŭskaj.
Dźmitryj Papoŭ — 16 hadoŭ (prachodziŭ pa spravie Siarhieja Cichanoŭskaha, maderavaŭ sacsietki «Krainy dla žyćcia», asudžany pa niekalkich artykułach. Jaho zatrymali jašče ŭ červieni 2020 hoda.
Jaŭhien Piatroŭ — 1 hod za abrazu Łukašenki (art. 368). 22-hadovaha Piatrova asudzili za tekst rep-pieśni ŭłasnaha sačynieńnia.
Iryna Vikcholm — 1 hod i 6 miesiacaŭ za paklop u dačynieńni da prezidenta (č. 2 art. 367). 58-hadovuju Vikcholm asudzili za tvit, u jakim jana nazvała prymusovuju pasadku łajniera Ryanair «aktam dziaržaŭnaha avijapiractva».
Jahor Dudnikaŭ — 11 hadoŭ za raspalvańnie varožaści abo varožaści (č. 3 art. 130) i zakliki da dziejańniaŭ, nakiravanych na pryčynieńnie škody nacyjanalnaj biaśpiecy Biełarusi (č. 3 art. 361). 21-hadovy Dudnikaŭ administravaŭ telehram-kanał «AHSB», pryznany terarystyčnym.
Čakaje suda Safija Sapieha — dziaŭčyna Ramana Pratasieviča.
U SIZA znachodzicca 33-hadovy Andrej Padniabienny, jaho padazrajuć u ździajśnieńni teraktu (art. 289). Padniabiennaha zatrymali 5 listapada minułaha hoda. Pavodle śledstva, jon prakałoŭ šyny niekalkich dziasiatkaŭ tralejbusaŭ u Homieli i padpaliŭ milicejskuju mašynu.
Mienš za ŭsio viadoma pra 22-hadovaha Antona Łysova. Jaho zatrymali niadaŭna, u kastryčniku minułaha hoda, z tych časoŭ jon znachodzicca ŭ SIZA. Jon padazrajecca ŭ naŭmysnym źniščeńni abo paškodžańni čužoj majomaści, učynienym arhanizavanaj hrupaj, albo jakoje paciahnuła pa nieaściarožnaści śmierć čałavieka abo inšyja ciažkija nastupstvy, albo jakoje paciahnuła pryčynieńnie škody ŭ asabliva bujnym pamiery (č. 3 art. 218). Pavodle hetaha abvinavačańnia jamu pahražaje da 12 hadoŭ pazbaŭleńnia voli. Bolš pra jaho spravu praktyčna ničoha nie viadoma, u tym liku dzie i što jon źniščyŭ albo paškodziŭ.
