Avijakampanija śćviardžaje, što ŭ jehipieckaj pavietranaj prastory spracavała supraćpažarnaja sihnalizacyja i ekipaž pryniaŭ rašeńnie paprasić pasadki. Pasažyry ž padkreślivajuć, što palot prachodziŭ u štatnym režymie i nadzvyčajnych situacyj u jaho chodzie nie było.
U Jehipcie vidavočna viedali, što na borcie znachodziŭsia Sałam:
jašče da vyletu z Chartuma jaho dapytali sudanskija śpiecsłužby, a jehipcianie paśla pasadki samalota metanakiravana zanialisia hramadzianami Jehipta, jakija znachodzilisia ŭ samalocie.
I kali za astatnimi pasažyrami nieŭzabavie prybyŭ novy samalot i jany adpravilisia ŭ Stambuł, to Sałama jehipcianie adviali i kamientaroŭ z nahody jaho losu nie dajuć.
Sprava Sałama vonkava vielmi nahadvaje spravu Ramana Pratasieviča, ale jość niuansy. Analityk Alaksandr Frydman, jaki pilna sočyć za situacyjaj, z hetaj nahody piša ŭ svaim telehram-kanale:
«Chasam Sałam ci nie viedaŭ pra spravu Pratasieviča, ci nie pryniaŭ jaje ŭsurjoz. Palot nad terytoryjaj Jehipta budzie mieć dla jaho fatalnyja nastupstvy: partał EgyptWatch śćviardžaje, što vajskovy trybunał zavočna prysudziŭ Sałama ŭ sakaviku 2020 hoda da pažyćciovaha źniavoleńnia.
Jehipieckija pravaabaroncy dziviacca, čamu takaja niaznačnaja cikavaść suśvietnaj hramadskaści da padziej u Łuksory: jana sapraŭdy nie idzie ni ŭ jakoje paraŭnańnie z ažyjatažam vakoł historyi z rejsam Ryanair u Miensku.
Pryčyny kryjucca jak u dziaržavie, jakaja ažyćciaviła hetuju śpiecapieracyju, tak i ŭ asobie Chasama Sałama, a taksama i ŭ avijakampanii, i ŭ pavodzinach Turcyi.
1) Prymusovaja pasadka samalota ŭ Afrycy, dy jašče z boku režymu z kiepskaj reputacyjaj, nie źjaŭlajecca dla jeŭrapiejcaŭ i amierykancaŭ siensacyjaj.
Inšaja sprava — prymusovaja pasadka samalota ź jeŭrapiejskimi hramadzianami ŭ centry Jeŭropy;
2) Chasam Sałam — radykalny isłamist, jakoha ŭ Jehipcie abvinavačvajuć u terarystyčnaj dziejnaści, a ruch Chasm, adnym ź lideraŭ jakoha źjaŭlajecca jehipcianin, ZŠA ličać terarystyčnaj arhanizacyjaj.
Raman Pratasievič - zusim inšaja fihura;
3) Badr Airlines — maleńkaja pryvatnaja avijakampanija.
Ryanair — adna z samych viadomych avijakampanij płaniety;
4) samalot z Pratasievičam nakiroŭvaŭsia ŭ Vilniu i mienavita Litva padniała skandał vakoł prymusovaj pasadki samalota ŭ Miensku. Sudanski samalot lacieŭ u Stambuł, ale
Turcyja (pa niezrazumiełych pakul pryčynach) nie prajaŭlaje cikavaści da spravy Sałama».
