Kamandujučy śpiecpadraździaleńniem Korpusa vartavych isłamskaj revalucyi Kasiem Sulejmani, a taksama namieśnik kiraŭnika irakskaha šyickaha apałčeńnia Abu Machdzi al-Muchandzis byli zabityja ŭ noč na 3 studzienia 2020 hoda ŭ vyniku apieracyi z užyvańniem bieśpiłotnika, praviedzienaj ZŠA ŭ rajonie mižnarodnaha aeraporta Bahdada.
U Vašynhtonie Sulejmani i al-Muchandzisa ličyli datyčnymi da arhanizacyi napadu na ambasadu ZŠA ŭ Bahdadzie 31 śniežnia 2019 hoda. I Tramp tady kazaŭ, što Sulejmani byŭ «terarystam numar adzin u śviecie».
U adkaz Iran tady nanosiŭ udary pa amierykanskich bazach u Iraku. I zajaŭlaŭ, što Najvyšejšaja rada nacyjanalnaj biaśpieki Irana padrychtavała 13 varyjantaŭ pomsty ZŠA.
Zdavałasia b, Tramp užo hod nie pry ŭładzie, ale ŭ Iranie pra tuju situacyju pamiatajuć i sprabujuć dać choć by simvaličny adkaz. U čaćvier na sajcie Viarchoŭnaha lidara Isłamskaj Respubliki byŭ apublikavany animacyjny rolik. U im pakazana, jak chakier u kamuflažnaj formie iranskaha ŭzoru kiruje bajavym robatam, jaki ruchajecca pa vulicach Fłarydy ŭ kirunku rezidencyi Trampa z amierykanskim ściaham na vysokim fłahštoku.
Robat pranikaje na terytoryju, dzie Tramp hulaje ŭ holf ź inšymi palitykami. Chakier adpraŭlaje na telefon Trampa paviedamleńnie na anhlijskaj movie: «Zabojca Sulejmani i toj, chto addaŭ zahad, zapłaciać za heta». Pakul achviara čytaje tekst, «likvidatar» daje kamandu bieśpiłotniku, naciskajučy na «pusk».
Paśla taho administracyja Twitter zabłakavała adzin z akaŭntaŭ Chamieniei, dzie źjaviłasia heta videa, jak paviedamlajecca, nazaŭždy.
