Fota: belchonock / depositphotos.com
Mužčynu zatrymali pavodle č. 1 art. 139 KK (Zabojstva), 16 miesiacaŭ jon pravioŭ u IČU i SIZA, ale jahony ŭdzieł u złačynstvie dakazany nie byŭ. Sud Šarkaŭščynskaha rajona mužčynu ŭ vyniku apraŭdaŭ, a Viarchoŭny sud padtrymaŭ hetaje rašeńnie.
U pastanovie suda było adznačana, što čałaviek maje prava «na pakryćcio maralnaj i majomasnaj škody, pryčynienaj jamu niezakonnymi dziejańniami orhana, jaki viadzie kryminalny praces». I jon vyrašyŭ z hetaha prava skarystacca.
Na momant zatrymańnia mužčyna mieŭ pastajannaje miesca pracy. Paśla vyzvaleńnia jaho tam adnavili. Mužčyna paličyŭ, kolki za 503 pracoŭnyja dni, jakija pravioŭ u turmie, jon nie atrymaŭ zarobku, a taksama dadaŭ da hetaj sumy hrošy, vydatkavanyja na advakata. Usiaho atrymałasia bolš za 15,4 tysiačy rubloŭ.
Sud Šarkaŭščynskaha rajona pahadziŭsia sa spraviadlivaściu patrabavańniaŭ i pryniaŭ pastanovu spahnać ź dziaržavy na karyść pazoŭnika sumu 15,4 tysiačy rubloŭ. Akramia taho, dziaržava abaviazvajecca pakryć jamu vydatki pa apłacie jurydyčnaj dapamohi — jašče 650 rubloŭ.
Takim čynam, čałavieku, jaki prasiadzieŭ za kratami 16 miesiacaŭ i akazaŭsia nievinavaty, pavinny zapłacić krychu bolš za 16 tysiač rubloŭ. Choć hetaje rašeńnie jašče moža być abskardžana ŭ Viciebskim abłasnym sudzie.
