Fota: alexeynovikov / depositphotos.com
Dakumient unieśli 26 sienataraŭ na čale z Robiertam Mieniendesam, kiraŭnikom Kamiteta pa mižnarodnych spravach ad Demakratyčnaj partyi, paviedamlaje Reuters.
— Hety zakon absalutna jasna daje zrazumieć, što Sienat ZŠA nie budzie siadzieć skłaŭšy ruki, pakul Kreml pahražaje paŭtornym uvarvańniem va Ukrainu, — zajaviŭ sienatar Robiert Mieniendies.
Siarod praduhledžanych mieraŭ — zabarona na ŭjezd u ZŠA i zamarozka amierykanskich aktyvaŭ prezidenta, premjer-ministra, ministra zamiežnych spraŭ i ministra abarony Rasiei, a taksama kamandujučych roznymi typami vojskaŭ. Patrapić pad sankcyi mohuć i inšyja asoby, jakich Bieły dom paličyć datyčnymi da ahresii suprać Ukrainy.
Ciaham paŭhoda Minfin, Dziarždepartamient i raźviedka ZŠA musiać taksama apublikavać detalovy dakład ab majomaści Uładzimira Pucina, jahonych svajakoŭ i nabližanych da jaho biznesoŭcaŭ. Da ŭsich ich taksama mohuć być užytyja sankcyi.
Akramia taho, ciaham 30 dzion paśla ŭvodu rasijskich vojskaŭ prezident ZŠA budzie abaviazany ŭvieści sankcyi suprać jak minimum troch najbujniejšych rasiejskich bankaŭ.
Sankcyi prapanujecca ŭvieści i suprać rasijskaha źniešniaha doŭhu dy hazapravoda «Paŭnočny patok — 2».
Akramia hetaha, ZŠA hetym zakonam abaviazvajucca pavialičyć vajennuju dapamohu Ukrainie.
