Łaziernaja zbroja, ustalavanaja na bajavoj mašynie Stryker u Fort-Sił, štat Akłachoma. Fota: US ARMY/ZUMA PRESS

Łaziernaja zbroja, ustalavanaja na bajavoj mašynie Stryker u Fort-Sił, štat Akłachoma. Fota: US ARMY/ZUMA PRESS

ZŠA rychtujucca zmahacca z voraham, jakoha niadaŭna mała chto ŭsprymaŭ surjozna: amatarskimi bieśpiłotnikami, jakija kaštujuć usiaho niekalki sotniaŭ dalaraŭ, ale mohuć nieści vybuchoŭku. Novaja supraćdronavaja technika nahadvaje zbroju z navukovaj fantastyki — łaziernyja harmaty i mikrachvalevyja błastary.

Pavodle słoŭ kiraŭnika Centralnaha kamandavańnia ZŠA, hienierała marskoj piachoty Kieneta Makienzi, nievialikija tannyja bieśpiłotniki — najbolš surjoznaja novaja taktyčnaja pahroza, ź jakoj sutyknulisia amierykanskija vajskoŭcy za apošnija 15 hadoŭ. Chutkaje raźvićcio niedarahich bieśpiłotnych latalnych aparataŭ, abo BPŁA, dazvalaje ciapier terarystyčnym hrupam i rehularnym armijam ažyćciaŭlać ataki małymi srodkami.

«Ja krajnie zaniepakojeny hetym», — pryznaŭsia letaś u krasaviku hienierał Makienzi na słuchańniach u Kamitecie pa ŭzbrojenych siłach Pałaty pradstaŭnikoŭ Kanhresa ZŠA. «Nam jašče treba budzie prajści doŭhi šlach, kab vyjści na rašeńnie pa hetaj prablemie, tamu što vy siońnia možacie pajści ŭ hipiermarkiet i kupić dron, i vy možacie vielmi lohka vykarystoŭvać jaho jak zbroju».

I «Isłamskaja dziaržava», i jemienskija paŭstancy-chusity čaplali vybuchoŭku na zvyčajnyja «mirnyja» bieśpiłotniki i nakiroŭvali ich na tanki praciŭnika, a taksama na naftapierapracoŭčyja zavody, marskija party i hramadzianskija aeraporty. Drony jany kuplali ŭ internecie abo źbirali sami z asobnych detalaŭ.

Šyickija apałčency ŭ Iraku, jakich padtrymlivaje Iran, stali masava vykarystoŭvać ataki bieśpiłotnikami ŭ 2021 hodzie. Jany nanieśli ŭdary pa ambasadzie ZŠA ŭ Bahdadzie i rezidencyi premjer-ministra Iraka. U lipieni ŭ Aravijskim mory drony atakavali kamiercyjnaje sudna — na im zahinuli dva čałavieki z ekipažu, a taksama saudaŭski karaleŭski kompleks u Er-Ryjadzie. Niadaŭna ŭzbrojenyja bieśpiłotniki sprabavali atakavać aeraport Bahdada i amierykanskija avijabazy ŭ Iraku.

Abłomki bieśpiłotnika, źbitaha ŭ Iraku kala avijabazy, dzie raźmiaščajucca amierykanskija vojski. Fota: INTERNATIONAL COALITION/ASSOCIATED PRESS

Abłomki bieśpiłotnika, źbitaha ŭ Iraku kala avijabazy, dzie raźmiaščajucca amierykanskija vojski. Fota: INTERNATIONAL COALITION/ASSOCIATED PRESS

«Zbroja-z-hipiermarkietaŭ» ciapier ujaŭlaje saboj vialiki vyklik dla ZŠA. Amieryka ŭkładaje miljardy ŭ pieradavyja sistemy, ad miehasučasnych rakiet da hihanckich avijanoscaŭ, bo zasiarodžanaja na pahrozie patencyjnaj vysokatechnałahičnaj vajny z armijami Kitaja ci Rasii. Ataka vialikaj kolkaściu bieśpiłotnikaŭ pakazvaje, što tradycyjnaja abarona ad pavietranych napadaŭ — rakiety koštam niekalki miljonaŭ dalaraŭ kožnaja — tut nieefiektyŭnaja. Ataki dronaŭ na Saudaŭskuju Araviju z boku Irana i hrupovak, jakija jon padtrymlivaje, prymusili ŭsich źviarnuć uvahu na finansavy bok prablemy. Er-Ryjad źbivaŭ drony rakietami «ziamla-pavietra» Patriot, a taksama padymaŭ na pierachop źniščalniki. I kožny ŭźlot źniščalnika kaštuje doraha, i kožnaja rakieta dla «Petryjata» kaštuje kala 3 miljonaŭ dalaraŭ. U Saudaŭskaj Aravii ŭžo nie chapaje rakiet-pierachopnic.

ZŠA imknucca raspracavać srodki abarony, adpaviednyja novym vyklikam, ale jakija b kaštavali niadoraha. Pohlad skiravany najpierš na łaziery i mikrachvalavyja pryłady, bo tyja siłkujucca elektryčnaściu, što tanna, i mohuć chutka parazić vialikuju kolkaść nievialikich dronaŭ.

Amierykancy ŭžo pryniali na ŭzbrajeńnie roznyja novyja sistemy, ad pryład dla padaŭleńnia sihnału, jakija vyhladajuć jak zbroja z «Palaŭničych za pryvidami» abo «Zornych vojnaŭ», da łaziernych harmat, ustalavanych na bajavych mašynach. Ale armija pakul nie zmahła razharnuć hetyja sistemy ŭ vialikaj kolkaści, i ni adna z takich sistem jašče nie pajadnoŭvaje mahčymaści adsočvańnia i nacelvańnia na roznyja typy bieśpiłotnikaŭ adpaviednaj zbrojaj, najbolš prydatnaj dla ich paražeńnia. Ciapier Pientahon pracuje nad hetym pytańniem.

Nievialikija bieśpiłotniki laciać nizka, pavolna i mohuć rezka mianiać kurs, padmanvajučy kłasičnyja radary, aryjentavanyja na vialikija, chutkasnyja samaloty abo rakiety.

Akramia taho, kali drony nahružanyja vybuchoŭkaj, prostaje źbivańnie ich u pavietry moža pahražać ludziam i abjektam na ziamli. A kali drony atakujuć vialikimi hrupami, jany zdolnyja prabić navat składanuju sistemu abarony. Kab lepš identyfikavać i adsočvać bieśpiłotniki, vajskoŭcy imknucca abjadnać dadzienyja z roznych krynic: radaraŭ, kamier i radyjočastotnych skanieraŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?