Vydańnie pryvodzić nastupnyja ličby. Za pieršyja 10 miesiacaŭ minułaha hoda impart Estonii ź Biełarusi bolš čym udvaja pieravysiŭ ahulny abjom impartu ŭ 2020 hodzie i skłaŭ 522 młn jeŭra. Heta bolš čym na piatuju častku pieravyšaje papiaredni pik u 2018 hodzie.

Impart Litvy pavialičyŭsia na 50% u paraŭnańni z 2020 hodam, dasiahnuŭšy 1 miljarda jeŭra (na tracinu bolš za papiaredni maksimum 2015 hoda). Dachody Łatvii vyraśli na dźvie traciny z 2020 hoda da 407 młn jeŭra. Heta ŭsiaho na 2% nižej za pik 2011 hoda.

Na dumku ekśpiertaŭ, rezkaje pavieličeńnie ahalaje napružanaść, ź jakoj sutykajucca krainy Bałtyi pamiž ekanamičnymi mahčymaściami i ich hieapalityčnaj rytorykaj.

«Jość unutranyja ekanamičnyja hulcy — navat dziaržaŭnyja karparatyŭnyja struktury — jakija buduć vykarystoŭvać usie mahčymaści, kab znajści sposaby abychodzić sankcyi jak maha daŭžej»,

— skazaŭ Tomas Jermałavičus, kiraŭnik daśledavańniaŭ Mižnarodnaha centra abarony i biaśpieki Estonii.

Krainy Bałtyi stali samymi hučnymi hałasami ŭ NATA za rašučuju palityku suprać Biełarusi, ale ekanamičnyja mierkavańni vyklikajuć ŭnutrypalityčnuju napružanaść.

Jermałavičus ličyć, što łahistyčnyja i transpartnyja apieratary va ŭsich troch krainach Bałtyi zaŭsiody buduć vykarystoŭvać mahčymaści dla dadatkovaha zarobku, kali nie budzie cisku z boku ŭradaŭ, pakolki mnohija ź ich mieli ciesnyja adnosiny ź biełaruskimi dziaržaŭnymi pradpryjemstvami.

Ale Vidmantas Janulevičus, prezident Litoŭskaj Kanfiederacyi pramysłoŭcaŭ, zajaviŭ, što, choć krainy Bałtyi pavinny vykonvać sankcyi, było b hłupstvam błakavać uvieś impart, tym bolš što rehijon źviazany z Kitajem i Centralnaj Azijaj praź Biełaruś.

«Samaje hałoŭnaje — spynić režym Łukašenki, a nie narod Biełarusi. Kali my [Litva] nie budziem ažyćciaŭlać hety tranzit tavaraŭ, to jany prosta pierajeduć u inšuju krainu», — skazaŭ jon.

Adna z prablem zaklučajecca ŭ tym, što sankcyi ZŠA i JEZ u dačynieńni da Biełarusi nie zaŭsiody pierasiakajucca, i amierykanskija zabarony nie dziejničajuć u krainach Bałtyi praz adsutnaść pramych ekanamičnych suviaziaŭ z ZŠA, niahledziačy na toje, što jany źjaŭlajucca ich samym važnym hieapalityčnym chaŭruśnikam.

Jermałavičus kaža, što situacyja padymaje pytańnie: ci hatovyja krainy Bałtyi pryniać ekanamičnyja vydatki, źviazanyja ź ich aficyjnaj palityčnaj pazicyjaj i impieratyvami rehijanalnaj biaśpieki?

Ministerstva zamiežnych spraŭ Estonii zajaviła, što impart ź Biełarusi byŭ tranzitnym tavaram i byŭ staranna pravierany na adpaviednaść sankcyjnym śpisam. Ministerstva zamiežnych spraŭ Litvy adznačyła, što ŭ JEZ niama pravavych padstaŭ dla prymianieńnia sankcyj, uviedzienych treciaj krainaj. A ministerstva zamiežnych spravaŭ Łatvii zajaviła: «Luby biahučy handal [ź Biełaruśsiu] u ciapierašni čas ažyćciaŭlajecca ŭ adpaviednaści z uviedzienymi režymami sankcyj».

Impart ź Biełarusi ŭ try krainy Bałtyi ŭklučaje pradukcyju drevaapracoŭki, uhnajeńni i naftu.

Jermałavičus skazaŭ, što heta byŭ horki ŭrok dla krain Bałtyi, pakolki «miaža chibnaści ŭ ciapierašnich hieapalityčnych umovach vielmi vuzkaja».

Jon dadaŭ: «Jany nie pavinny marnavać svoj kaštoŭny palityčny kapitał i aŭtarytet, nazapašany ŭ Vašynhtonie, dziela niekalkich sotniaŭ miljonaŭ jeŭra, jakija ich biznes moh by zarablać kožny hod, praciahvajučy pracavać ź Biełaruśsiu».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?