Pavodle Śviatłany Cichanoŭskaj, 2020-y byŭ hodam, kali biełarusy pračnulisia, a 2021-y staŭ hodam samych žorstkich i praciahłych represij u historyi sučasnaj Biełarusi. Ale demakratyčnyja siły zmahli zachavać adzinstva i enierhiju.

«Heta byŭ ciažki hod. Režym usio jašče ŭ Minsku. Ale jaho pamyłki pakazvajuć, nakolki režym niaŭpeŭnieny ŭ sabie», — ličyć Cichanoŭskaja.

U płanach ofisa na nastupny hod — praciahvać dziejničać kansalidavana z usimi demakratyčnymi siłami, zaviaršyć i pradstavić svoj prajekt Kanstytucyi, uzmacniać mižnarodny cisk dla pryciahnieńnia sistemy Łukašenki da adkaznaści za represii.

Cichanoŭskaja raźličvaje, što mižnarodnaja dapamoha stanie bolš hnutkaj i dasiahalnaj dla ludziej na miescach.

«Ja hladžu ŭ nastupny hod z aptymizmam. Jak skazaŭ moj muž, revalucyja — heta praces. I sam pa sabie jon nie źniknie. Vynik zaležyć ad nas usich».

Aleś Alachnovič, pradstaŭnik Cichanoŭskaj pa ekanomicy, kaža, što ŭ nastupnym hodzie jany źbirajucca pracavać pa troch kirunkach: ekanamičny cisk na sistemu Łukašenki, padtrymka biełaruskaha hramadstva ŭnutry krainy i ŭ vyhnańni, ekanamičnyja reformy.

«Vyhladaje, što sankcyi pakul nie pracujuć, ale heta nie praŭda. Ułady nie źmianšajuć represii, ale ekanamičny cisk prymušaje ich rabić pamyłki (toj ža mihracyjny kryzis). Jany stanoviacca taksičnymi dla svaich partnioraŭ — Kitaja, naprykład», — zaŭvažaje ekanamist. Ofis adsočvaje situacyju, kab skaracić mahčymaści abychodu sankcyj.

Pytańnie, jak padtrymać biznes unutry krainy. Adzin z varyjantaŭ — ES moža libieralizavać handal pasłuhami ź Biełaruśsiu. Spraścić umovy ŭ adnabakovym paradku, kab našy pryvatnyja łahistyčnyja kampanii, IT-firmy mahli pastaŭlać svaje pasłuhi na jeŭrapiejski rynak.

Padobnyja precedenty ŭžo byli: u 2009 hodzie dla Zachodnich Bałkanaŭ, pa handli praduktami.

«Kab padtrymać mały i siaredni biznes, asobnych rabotnikaŭ, možna arhanizavać ličbavuju płatformu dla zamiežnych pradpryjemstvaŭ, jakija mohuć najmać biełaruskich ekśpiertaŭ pa markietynhu, daktaroŭ i hetak dalej», — prapanuje Alachnovič.

Sioleta Jeŭrakamisija abviaściła pra płan padtrymki demakratyčnaj Biełarusi na sumu ŭ try miljardy jeŭra.

«Upieršyniu taki płan abiacany nie Łukašenku, a hramadstvu. Heta istotnyja hrošy, ich chopić na niekalki hod reformaŭ», — kaža Alachnovič.

Na dumku pradstaŭnika NAU Uładzimira Astapienki, mižnarodnaja supolnaść dla dapamohi biełarusam moža vykarystoŭvać takija instrumienty, jak dypłamatyčnaja izalacyja aficyjnaha Minska, sankcyi i padtrymka ŚMI i hramadzianskaj supolnaści.

Nie ŭsie ŭ demakratyčnych siłach padzialajuć aptymizm adnosna najbližejšaj budučyni.

«Represii mohuć praciahvacca nastupny hod. Treba damahacca vyzvaleńnia palitviaźniaŭ i spynieńnia zapužvańnia ludziej. Ja miarkuju, hetaha składana dasiahnuć u nastupnym hodzie i nam daviadziecca dumać na bolš doŭhuju pierśpiektyvu», — vykazaŭsia člen Kaardynacyjnaj rady Andrej Jahoraŭ.

Što čakaje Biełaruś praz hod? Čatyry scenary — z čornymi lebiedziami i biez

Stanisłaŭ Šuškievič: U mianie jość aptymizm

Клас
0
Панылы сорам
0
Ха-ха
0
Ого
0
Сумна
0
Абуральна
0