Vydańnie adznačaje, što infarmacyja pra mahčymaje ŭvarvańnie Rasii va Ukrainu zasnavana na acenkach niekalkich ludziej z NATA i słužbaŭ biaśpieki, jakija zmahli ŭbačyć niekatoryja z mahčymych płanaŭ napadu Rasii.

Pa słovach vysokapastaŭlenaha aficera, płan zachopu Ukrainy razhladajecca Pucinym, i kančatkovaje rašeńnie jašče nie pryniata.

Krynica adznačyła, što ŭ vypadku zahadu Pucina rasijskaja armija naniasie «adnačasovuju ataku z paŭnočnaha Kryma i cieraź sieparatysckija terytoryi na ŭschodzie i poŭnačy». Ataka nibyta moža adbycca «ŭ kancy studzienia — pačatku lutaha», kali Ukraina i NATA nie adkažuć na patrabavańni Pucina.

Inšyja krynicy ŭ NATA razhladajuć ataku ŭ try etapy. Vydańnie adznačaje, što kožnaja faza taksama moža stać apošniaj u apieracyi, u zaležnaści ad reakcyi Zachadu na ŭvarvańnie.

Faza 1: Poŭdzień

Na pieršym etapie RF płanuje zavajavać poŭdzień Ukrainy, «kab zabiaśpiečyć pastaŭki ŭ Krym, a taksama adrezać Ukrainu ad mora i, takim čynam, ad pastavak», — skazaŭ Bild aficer słužby biaśpieki.

Rasija płanuje vykarystać desantnyja karabli, pierakinutyja z Bałtyjskaha mora ŭ rehijon viasnoj, «dla transpartavańnia tankaŭ i vojskaŭ z Kryma ŭ rajon Adesy», — skazaŭ vysokapastaŭleny aficer zachodniaj vyviedki.

Inšy vysokapastaŭleny vajskoviec udakładniŭ, što rasijskija płany praduhledžvajuć praviadzieńnie desantnaj apieracyi «na ŭschod ad Adesy, pamiž haradami Fantanka i Kobleva». Rasijskija vojski «rušać na paŭnočny ŭschod ad horada, paśla paviernuć naleva i prasunucca da Prydniastroŭja». Heta abłažyła b Adesu.

U toj ža čas u Chiersonskaj vobłaści ŭzdoŭž raki Dniepr buduć pravodzicca «pavietrana-desantnyja apieracyi śpiecnaza», jakija zabłakujuć masty praz samuju važnuju raku krainy i, takim čynam, spyniać zabieśpiačeńnie. Pry hetym z Kryma budzie vieścisia artyleryjski ahoń pa mocnych ukrainskich pazicyjach, što pavinna źviazać ukrainskija vojski.

U toj ža čas rasijskija tankavyja častki, iznoŭ ža pry padtrymcy vajenna-marskoha fłotu i avijacyi, buduć prasoŭvacca na zachad z akupavanaha Danbasa, zatym padzielacca i rušać z adnaho boku ŭ Zaparožža (važny vajskovy centr na poŭdni Ukrainy) i ŭ bok Kryma.

Kali heta atrymajecca, uvieś poŭdzień Ukrainy akažacca pad kantrolem Rasii i Pucin prakładzie kalidor z Rasii da miažy NATA z Rumynijaj, piša vydańnie.

Faza 2: Paŭnočny ŭschod

Paralelna ź pieršaj fazaj vajny avijacyja Pucina i balistyčnyja rakiety płanujuć asłabić vajskovy patencyjał Ukrainy pa ŭsioj terytoryi.

Kali Kreml paličyć, što ŭmovy dla hetaha vykananyja, rasijskija tankavyja častki mohuć pierajści miažu ŭ Łuhanskaj i Charkaŭskaj abłaściach i rušyć napierad da bujnych haradoŭ Dniepr i Pałtava.

«Pierš za ŭsio, jany buduć atačać harady i adklučać elektryčnaść, haz i pradukty charčavańnia. Praź niekalki tydniaŭ ruskija mohuć prasłavić siabie jak ratavalniki mirnych žycharoŭ, uvajści ŭ harady i vyratavać ukrainskaje nasielnictva ad hoładu ci śmierci», — tłumačyć adzin z aficeraŭ.

Faza 3: Kijeŭ

Na trecim etapie kramloŭskaja armija budzie nastupać na Kijeŭ z poŭnačy.

«Viadoma, heta moža adbycca ŭ pačatku vajny, kali taho zapatrabujuć abstaviny», — skazała Bild krynica.

Krynicy ŭ NATA nie ŭpeŭnienyja, ci budzie režym Łukašenki ŭdzielničać u bajavych dziejańniach ź Biełarusi. Kali Biełaruś dałučycca da ataki, Rasija moža akružyć Kijeŭ z paŭnočnaha ŭschodu i paŭnočnaha zachadu.

Paśla rasijskija vojski prasunucca «prykładna da linii Karaścień — Umań, kab adrezać pastaŭki z Zachodniaj Ukrainy. Tady možna było b čakać kapitulacyi Kijeva, to-bok i Ukrainy, pad ciskam Zachadu».

U vyniku takoha maksimalnaha płana Rasija moža zaniać kala dźviuch tracin ciapierašniaj terytoryi Ukrainy.

Inšaja krynica adznačyła: «Kali Rasija ŭvojdzie, sankcyi ŭsio roŭna buduć. Tady ŭžo niama sensu spyniacca na paŭdarozie».

«Ukraincy buduć zmahacca, ale jany nie zmohuć supraćstajać bujnoj atacy ruskich», — skazaŭ Bild vysokapastaŭleny čynoŭnik. Pavodle jaho słoŭ, uzbrojenyja siły Kijeva adyduć na zachad krainy, «kali nie buduć całkam źniščany».

Inšy aficer skazaŭ vydańniu, što amierykanskich supraćtankavych rakiet «Džavielin» nie chopić dla ŭsich rasijskich tankaŭ, a tureckija bieśpiłotniki «Bajraktar» stanuć lohkaj zdabyčaj dla rasijskich bajavych samalotaŭ.

Pavodle jaho słoŭ, dla abarony Ukrainie spatrebiacca sučasnyja zachodnija zienitnyja rakiety typu «Patryjot» i supraćkarabielnyja rakiety typu «Harpun».

«Sajuźniki ciapier pieraasensoŭvajuć pastaŭki zbroi va Ukrainu. Ale heta rašeńnie nie moža iści ad NATA, a tolki ad jaho suvierennych členaŭ», — skazaŭ vydańniu aficer zachodniaj słužby biaśpieki.

Pieradhistoryja:

Dva amierykanskija vydańni paviedamili ab pierakidvańni rasijskich vojskaŭ da ŭkrainskaj miažy: The Washington Post 31 kastryčnika napisała ab zasiarodžvańni vojskaŭ, a Politico apublikavała fota ad 1 listapada ŭ paćviardžeńnie hetaha.

11 listapada Bloomberg napisaŭ, što ZŠA paviedamili sajuźnikam ź Jeŭrasajuza ab tym, što Rasija moža płanavać ŭvarvańnie va Ukrainu, uličvajučy ŭzmacnieńnie napružanaści z-za mihrantaŭ i prablem z pastaŭkami enierharesursaŭ.

Kiraŭnik Hałoŭnaha ŭpraŭleńnia vyviedki Kirył Budanaŭ zajaviŭ, što RF rychtujecca da samaj maštabnaj ataki na Ukrainu da kanca studzienia — pačatku lutaha.

Amierykanskaja vyviedka vyjaviła, što Kreml płanuje nastup na Ukrainu na niekalkich frantach užo ŭ pačatku nastupnaha hoda z udziełam 175 tysiač vajskoŭcaŭ, paviedamiła vydańnie The Washington Post.

Rasija admaŭlaje płany ab nastupie.

Analityki razychodziacca ŭ dumkach, ci sapraŭdy Kreml hatovy raspačać paŭnamaštabnuju vajnu z Ukrainaj, ci heta psichałahičny cisk, kab vytarhavać sastupki i destabilizavać ekanomiku krainy. Nasielnictva Ukrainy ŭ čatyry razy mienšaje za rasijskaje, a ŭkrainskaja armija na paradak słabiejšaja za rasijskuju, ale jana značna ŭmacavałasia ŭ paraŭnańni z 2014 hodam, kali rasijskija siły navat va ŭmovach unutranaj niestabilnaści va Ukrainie zdoleli zaniać tolki častku Danbasa, a nie ŭsiu tak zvanuju «Navarosiju», abjekt intaresaŭ Maskvy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?