Što adbyłosia paśla zatrymańnia Volhi?

Jak paviedamiŭ advakat Volhi Andrej Mačałaŭ, padčas dopytaŭ Volha zajaŭlała, što ŭ dzień zatrymańnia da jaje ŭžyvałasia fizičnaja siła. Advakaty vyjavili ŭ žančyny siniaki na rukach i šyi, siniaki na jahadzicach.

«Padčas dopytaŭ u śledčaha Volha trojčy pakazvała na fakty katavańniaŭ. U HUBAZiK u jaje patrabavali razbłakavać pryłady i pieradać usie datyčnyja da jaje źviestki. Jana vyrašyła skarystacca pravam nie śviedčyć suprać siabie. Paśla hetaha, kazała maja padabaronnaja, jaje bili pa patylicy i jahadzicach, vyłomvali ruki, pryciskali hałavu da ziamli. Kali my ź joj sustrelisia, u jaje było mnostva cialesnych paškodžańniaŭ, siniaki na rukach i šyi, siniaki na jahadzicach».

Pra źbićcio žančyna paviedamiła na pieršym ža dopycie, ale śledčy heta prosta praihnaravaŭ: Volhu nie ahledzieŭ sudmiedekśpiert, jaki pavinien byŭ zafiksavać paškodžańni, na padstavie ekśpiertyzy, paśla pavinny byli acanić dziejańni siłavikoŭ, ale nijakaha raźbiralnictva ŭ vyniku nie było. Advakat Andrej Mačałaŭ, jaki prakamientavaŭ situacyju, u vyniku byŭ pazbaŭleny licenzii.

Što viadoma na hety kont z materyjałaŭ spravy, ahučanych na sudzie?

Z materyjałaŭ spravy stała viadoma, što ekśpierty ahladali Volhu ŭ izalatary tolki 6 krasavika — bolš čym praz dva tydni paśla zatrymańnia. U zaklučeńni jany paznačyli, što pry ahladzie ekśpiertam u Załatar cialesnych paškodžańniaŭ nie vyjaŭlena. Zhodna z pradastaŭlenymi miedycynskimi dakumientami, u Załatar byli siniaki siniaha koleru na levaj i pravaj jahadzicy, jakija mahli ŭtvarycca ad traŭmatyčnych uździejańniaŭ i tupoha pradmieta.

Załatar i jaje abaronca Mačałaŭ padavali zajavu na ŭzbudžeńnie kryminalnaj spravy ŭ dačynieńni da starejšaha opierupaŭnavažanaha supracoŭnika HUBAZiKa Tvieracinava pa fakcie pieravyšeńnia i złoŭžyvańnia ŭładaj abo słužbovymi paŭnamoctvami (artykuły 424 i 426 Kryminalnaha kodeksa) u suviazi z užyvańniem fizičnaj siły da Volhi. Jak vynikaje z materyjałaŭ spravy, advakat Andrej Mačałaŭ paśla zatrymańnia zapatrabavaŭ knihu ab užyvańni fizičnaj siły i śpiecyjalnych srodkaŭ u dačynieńni da zatrymanych, adnak pavodle jaje, 18 sakavika da Załatar nie ŭžyvałasia fizičnaja siła.

U vyniku 20 krasavika ŭ zaviadzieńni kryminalnaj spravy ab pieravyšeńni słužbovych paŭnamoctvaŭ supracoŭnikam HUBAZiKa było admoŭlena na padstavie adsutnaści ŭ jaho dziejańniach składu złačynstva. Śledčy kamitet vyrašyŭ, što «zajavy Załatar ab pryčynieńni joj cialesnych paškodžańniaŭ nie adpaviadajuć rečaisnaści, pakolki jany mieli miesca da jaje zatrymańnia».

Što cikava, u materyjałach spravy ŭtrymlivajecca skrynšot dopisa telehram-kanała, pryznanaha ekstremisckim, «Supracoŭniki HUBAZiKa katavali Volhu, kab prymusić jaje śviedčyć suprać siabie» ad 2 krasavika z raźmieščanym kamientaryjem byłoha advakata Andreja Mačałava, jakoha paśla pazbavili licenzii za toje, što raspavioŭ hramadstvu i ŚMI pra ŭžyvańnie katavańniaŭ u dačynieńni da Volhi. Poŭny tekst kamientaryja eks-advakata žurnalistam utrymlivajecca ŭ materyjałach kryminalnaj spravy i byŭ całkam ahučany sudździoj Anastasijaj Papko na pracesie: 

«18 sakavika hetaha hoda Volha Załatar była zatrymanaja supracoŭnikami HUBAZiKa na minskaj kalcavoj darozie. Paśla čaho jaje dastavili ŭ budynak HUBAZiKa, dzie, pa jaje słovach, da jaje ŭžyvalisia katavańni z metaj prymusić jaje da pradastaŭleńnia dokazaŭ suprać siabie. Jana, zrazumieła, u peŭny momant dała paroli, u tym liku, ad svaich mabilnych pryładaŭ, ale, mabyć, hetaha supracoŭnikam HUBAZiKa akazałasia mała i jany, pakul niezrazumieła, ci to jany paŭtorna patrabavali dać hetyja paroli, ci to jany sprabavali ŭziać u jaje adbitki palcaŭ.

Da jaje byli ŭžytyja katavańni. Ja asabista byŭ śviedkam: u jaje byli siniaki i kryvapadcioki. Jaje bili pa hałavie, jaje dušyli, jaje kłali na ziamlu i pryciskali nahami da padłohi. Adpaviedna, u jaje ŭsie jahadzicy ŭ siniakach: ja asabista heta bačyŭ i byŭ śviedkam. 

Na žal, mnie nie spadabałasia pasiŭnaja pazicyja Śledčaha kamiteta, jaki, niahledziačy na toje, što jana zajaviła heta na pieršym dopycie 19 sakavika, na siońniašni dzień, heta značyć paśla ažno dvuch tydniaŭ, da hetaha času jaje nie naviedaŭ ni sudmiedekśpiert u SIZA, ni jakim-niebudź čynam śledčy nie zafiksavaŭ hetyja paškodžańni. Paŭtarusia, Volha nieadnarazova pra heta zajaŭlała, u tym liku, i mnoj padavałasia chadajnictva śledčamu, ale pakul śledčy, pa sutnaści, nijakich mier nie pryniaŭ.

Volzie było pradjaŭlenaje abvinavačvańnie pa art. 361-1 Kryminalnaha kodeksa (stvareńnie ekstremisckaha farmavańnia). Joj pradjaŭlenaje abvinavačvańnie, jana daje pakazańni, adkazvaje na ŭsie pytańni śledčaha, ale, pry hetym, jana całkam admaŭlaje svaju vinu. My ličym, što z ulikam i pazicyi i toj infarmacyi, jakaja majecca ŭ abarony, i tych dokazaŭ, jakija my bačyli, dakładniej, nie bačyli ŭ śledstva, my ličym, što na dadzieny momant hetaje abvinavačvańnie nijak nie abhruntavanaje i, bolš za toje, jano vielmi abstraktna hučyć.

Ja spadziajusia, što ŭsio ž taki niejki zakon i razumnaja łohika voźmuć vierch i ŭsio ž taki śledstva dazvolić maci pieciarych dziaciej na čas śledstva zastavacca doma».

***

Nahadajem, Volhu Załatar zatrymali 18 sakavika, kali jana viezła 10-hadovuju dačku ŭ muzyčnuju škołu. Supracoŭniki HUBAZiKa raźviarnuli jaje mašynu i supravadzili dadomu. Tam prajšoŭ pieratrus, paśla jakoha Volhu zabrali ŭ izalatar. Na volu jana tak i nie vyjšła. Pres-słužba UUS Minabłvykankama paviedamiła, što žančynu zatrymali «za aktyŭnuju pratestnuju dziejnaść», jana była administratarkaj miascovaha dvarovaha čata i arhanizoŭvała niesankcyjanavanyja masavyja mierapryjemstvy: čajavańni, prahułki, kancerty. Ciapier Volhu sudziać pa nastupnych artykułach Kryminalnaha kodeksa: č. 1 art. 361-1 (stvareńnie ekstremisckaha farmavańnia), č. 1 i 2 art. 342 (arhanizacyja i materyjalnaje zabieśpiačeńnie dziejańniaŭ, jakija hruba parušajuć hramadski paradak), č. 1 art. 16 č. 1 art. 342 (dapamahańnie ŭ arhanizacyi dziejańniaŭ, jakija hruba parušajuć hramadski paradak). Palitzianvolenaja abvinavačvajecca, u tym liku, u stvareńni ekstremisckich farmavańniaŭ — telehram-čataŭ «Ždanovičy siońnia», «Ždanoviči 2020-kłub lubitielej piesien Coja», pryznanych ekstremisckimi praź siem miesiacaŭ paśla zatrymańnia Volhi. Žančynie pahražaje da siami hadoŭ pazbaŭleńnia voli.

Клас
0
Панылы сорам
0
Ха-ха
0
Ого
0
Сумна
0
Абуральна
0