Pra historyju Iryny čytajcie: «Jana viarnułasia ŭ Biełaruś, bo sumavała pa radzimie». Chto takaja Iryna Ščasnaja, jakoj pahražaje kałonija za viadzieńnie telehram-kanałaŭ

Składanaści

U kałonii Iryna Ščasnaja pracuje švačkaj — jana robić detali adzieńnia dla rabotnikaŭ «MAPIDa» (budaŭničaje pradpryjemstva RB). Adzin tydzień Iryna pracuje ŭ pieršuju źmienu, a ŭ nastupny — u druhuju.

U svaich listach Iryna paviedamlała, što joj było ciažka ŭlicca ŭ režym. Bo ŭ im adsutničaje volny čas: akramia pracy jość roznyja dziažurstvy i prafiłaktyčnyja hutarki sa źniavolenymi, jakija treba naviedvać. Taksama niama mahčymaści pabyć adnoj: u atradzie i na pracy — usiudy i zaŭsiody jaje atačajuć ludzi (źniavolenyja, kanvairy, achoŭniki).

Składanymi źjaŭlajucca i bytavyja ŭmovy. Naprykład, u duš dziaŭčat vodziać tolki adzin raz u tydzień. Jość i prablemy z charčavańniem: choć kormiać niadrenna, adnak Iryna nie jeść miasa (akramia kurycy) — a ŭ porcyjach jano časta prysutničaje.

«Kali vyjdu adsiul, to nikoli nie budu jeści miasa!!!», — napisała jana ŭ adnym sa svaich listoŭ.

Źniavolenyja atrymlivajuć pieradačy — adnak dzialicca imi adzin z adnym, častavać kahości i častavacca samomu stroha zabaroniena. Za heta možna atrymać spahnańnie, až da štrafnoha izalatara.

Radaści

Na terytoryi kałonii žyvie šmat katoŭ (adnak u ruki jany nie dajucca). Irynu heta vielmi raduje: na voli jana dapamahała žyviołam, a doma ŭ jaje jość kot i koška. U adnym z svaich listoŭ Iryna napisała:

«Heta estetyčnaja asałoda — nazirać za katami, asabliva za maleńkimi kacianiatami».

Siamja

Iryna Ščasnaja vielmi pieražyvaje za svaju siamju. Svajho 11-hadovaha syna jana nie bačyła ŭžo hod. Paśla zatrymańnia Iryny jaje muž razam z synam źjechaŭ u inšuju krainu. Iryna była hetamu rada — bo heta harantuje biaśpieku.

Pieražyvaje palitvźniavolenaja dziaŭčyna i za baćku, bo toj surjozna chvareje na ankałohiju. Jon prajšoŭ doŭhaje lačeńnie, i Iryna baicca, što, mahčyma, da jaje niesvoječasova dachodziać naviny pra stan jaho zdaroŭja.

Padtrymka

Iryna vielmi ŭdziačnaja za ciopłyja słovy i padtrymku, jakija joj akazvajuć nieznajomyja ludzi ŭ listach. Z mnohimi ź ich jana pierapisvajecca na pastajannaj asnovie. Ź niekatorymi zaviazałasia pierapiska jašče z časoŭ znachodžańnia ŭ SIZA. Dziaŭčyna nie čakała, što ŭ Biełarusi jość stolki nieabyjakavych ludziej, jakija mohuć tak mahutna padtrymać svaim słovam.

Momant

Na minułym tydni Iryna ŭbačyła pieršy śnieh. Jana išła na pracu ŭ pieršuju źmienu — i ranicaj, u ciemry razhledzieła śniažynki.

Iryna na imhnieńnie zabyłasia, što jana ŭ kałonii: ciomnaje nieba, na ich fonie śniažynki, jakija apuskajucca na tvar — u toj momant jana adčuła kavałačak svabody i ščaścia. Ale potym Iryna apamiatałasia — i pajšła na pracu.

Padtrymajcie palitźniavolenuju Irynu Ščasnuju listami salidarnaści!

Adras dla listoŭ: PK №4. 246035, h. Homiel, vuł. Antoškina, 3

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?