Kaciaryna Zareckaja kaža, što adsutnaść padatku na pieršuju kvateru — lhota, jakoj bolš u śviecie niama.
— My vyvučyli zakanadaŭstvy roznych dziaržaŭ. Takaja lhoty (h. zn. mahčymaść nie płacić padatak za pieršuju kvateru) niama ni ŭ adnoj krainie, — padkreśliła jana.
Pa słovach Zareckaj, pakolki zakonaprajekt ab źmienach u Padatkovy kodeks, raspracoŭščykam jakoha źjaŭlajecca Minfin, jašče nie pryniaty, kazać ab kančatkovym rašeńni pakul rana.
Zaraz padatak na nieruchomaść płaciać tyja, chto vałodaje dvuma i bolš kvaterami. Kolki kankretna ŭ ich abjektaŭ nieruchomaści — takoj statystyki niama. Ale bolš čym dvuma vałodajuć bolš za 215 tys. padatkapłacielščykaŭ Biełarusi.
Zakonaprajektam praduhledžana, što z 1 studzienia 2022 hoda fizičnyja asoby, jakija majuć va ŭłasnaści abo jakija pryniali pa spadčynie žyłyja pamiaškańni ŭ šmatkvaternym abo błakavanym žyłym domie (doli ŭ pravie ŭłasnaści abo ŭ spadčynie na majomaść), stanoviacca płacielščykami padatku na nieruchomaść.
Suma, jakaja padlahaje vypłacie, vyznačajecca zychodziačy z raźlikovaha koštu 1 m2 typavoha budynka na 1 studzienia, ahulnaj płoščy žyłoha pamiaškańnia i staŭki padatku ŭ pamiery 0,1 %.
Tak, naprykład, padatak na nieruchomaść na standartnuju kvateru płoščaj 60 m2 u hod składzie ad 27 rubloŭ u rajcentrach i da 48,6 rubla ŭ Minsku. Heta supastaŭna z padatkovaj nahruzkaj na ŭładalnikaŭ žyłych damoŭ.
Kolki ž atrymaje biudžet dadatkovych hrošaj? Navat kali paličyć pa vysokim minskim taryfie, to atrymajecca 73 młn rubloŭ. Ci jość sens dziela takich hrošaj uładam ryzykavać reštaj svaich prychilnikaŭ, nieviadoma.
Ministerstvu achovy zdaroŭja z «reziervovaha fondu prezidenta» vydzielać 140 młn rubloŭ. Šmat heta ci nie?
