«Biełaeranavihacyju» z 15 listapada adklučajuć ad niejkaj hłabalnaj sistemy, kudy jany padajuć usie avijacyjnyja źviestki. Tamu ciapier naohuł nijakija samaloty nie buduć nad nami lotać», — takoje paviedamleńnie źjaviłasia 31 kastryčnika ŭ insajdarskim th-kanale.
Jak vidać, havorka idzie pra spynieńnie ŭzajemadziejańnia ź Jeŭrapiejskaj bazaj źviestak AIS (EAD). Ale ci sapraŭdy dla Biełarusi moža nastupić «navihacyjnaja ślepata»? «Jeŭraradyjo» na ŭmovach ananimnaści pahutaryła z ekśpiertam sa śfiery avijacyi.
— Biełaruś — siabra ICAO [Mižnarodnaj arhanizacyi hramadzianskaj avijacyi. — «Jeŭraradyjo»]. Pamiž siabrami arhanizacyi ažyćciaŭlajecca abmien aeranavihacyjnaj infarmacyjaj, ad hetaha naŭprost zaležyć biaśpieka palotaŭ. Kali raptam budzie pryniataje rašeńnie adklučyć Biełaruś ad hetaj sistemy, to ŭ pryncypie našy samaloty nie zmohuć lotać za miežy Biełarusi, — tłumačyć ekśpiert. — U ich nie budzie źviestak, nieabchodnych dla vykanańnia palotaŭ pa maršrucie, dla zachodu na pasadku. Tamu heta moža być adnoj sa strašyłak, kab pravieryć reakcyju biełaruskaha boku, ci sproba niejak nacisnuć.
I jašče: dapuścim, bort ź Miunchiena lacić praź Biełaruś u Maskvu. Nad Biełaruśsiu jaho viaduć biełaruskija dyśpietčary. Ale infarmacyjaj jany abmieńvajucca z dyśpietčarami aeradroma vyletu i aeradroma prylotu. Kali sistemu adklučać, to atrymajecca, što na karcie źjavicca čornaja plama, jakuju treba ablatać. Heta toić u sabie nastupstvy dla luboha pieravozčyka, u tym liku i ekanamična.
Prosta ŭjavicie, što samalot padychodzić da miažy Biełarusi, i treba pieradavać infarmacyju ŭ krainu prybyćcia, a suviazi pamiž imi niama. Heta zabaroniena avijacyjnymi praviłami — vykonvać paloty biez suviazi naziemnych dyśpietčarskich punktaŭ. Suviaź pavinna być pastajannaj pa ŭsim maršrucie palotu.
Paśla ŭviadzieńnia «pavietranych sankcyj» ad ES jeŭrapiejskija avijakampanii i tak praktyčna pierastali źjaŭlacca ŭ biełaruskaj pavietranaj prastory. Adpaviedna, im infarmacyja pra paloty nad Biełaruśsiu nie vielmi patrebnaja. A navošta tady, chaj i hipatetyčna, mohuć uvieści navihacyjnuju błakadu?
— Mahčyma, što takaja ideja mahła naradzicca praz toje, što jašče nie ŭsie pierastali lotać nad Biełaruśsiu. Moža być, heta nastupny krok błakavańnia, maŭlaŭ, kali da vas [pieravozčykaŭ, jakija nie padtrymali sankcyi ES. — «Jeŭraradyjo»] tak nie dachodzić, to nastupnym krokam budzie poŭnaja błakada pavietranaj prastory.
Kali Biełaruś usio ž adklučać ad jeŭrapiejskaj bazy źviestak, to čym moža abiarnucca takaja «navihacyjnaja ślepata»?
— Biełaruś stracić hrošy, jakija joj płaciać kampanii, što karystajucca aeranavihacyjnymi pasłuhami. I ź vialikaj dolaj imaviernaści dapuskaju, što biełaruski pieravozčyk nie zmoža lotać pa-za prastoraj SND, — adkazvaje mužčyna.
Paśla skandału z vymušanaj pasadkaj u Biełarusi pasažyrskaha samalota Ryanair, a taksama zatrymańniem Ramana Pratasieviča i Safii Sapieha dla avijakampanii «Biełavija» jeŭrapiejskija krainy zakryli nieba, pry hetym avijapieravozčyki ź Jeŭropy sami nie lotajuć na Biełaruśsiu. Samaloty «Biełavija» ŭ ciapierašni momant mohuć lotać tolki praz Rasiju.
