U Minsku adnušku možna źniać za 250 dalaraŭ, u Kijevie za 400. Paraŭnoŭvajem košty arendy ŭ nas i ŭ susiedziaŭ

Minsk. «Košty na niešta ŭtulnaje i z meblaj startujuć ad 250 dalaraŭ»

Vitalii Kryčeŭskaj 21 hod, jana zdymaje adnapakajovuju kvateru ŭ Minsku niedaloka ad stancyi mietro «Piatroŭščyna». Za arendu jana płacić 250 dalaraŭ u ekvivalencie.

«Viadoma, jość varyjant zdymać pakoj, ale ja b nie skazała, što heta budzie našmat tańniej. Narmalny pakoj u narmalnym domie abydziecca prykładna ŭ 150 dalaraŭ, — raskazvaje dziaŭčyna. — Ale heta vam pryjdziecca dzialić asabistuju prastoru z kimści jašče.

U mianie muraški pa skury ad takoha, ja zanadta zaležnaja ad taho, kab mianie pa viečarach nie čapali. Cana arendnaha žytła pačynajecca ad 200 dalaraŭ (500 biełaruskich rubloŭ), ale źniać niešta ŭtulnaje i z meblaj možna tolki ad 250. Biez kamunałki».

Heta i inšyja foty — z ułasnaha archiva hierojaŭ publikacyi

Dom, u jakim žyvie Vitalija, novy, vakoł jaho taksama idzie budoŭla. Vokny kvatery vychodziać na darohu. Ale da hetaha, pa słovach dziaŭčyny, jana pryzvyčaiłasia.

«Bolš za ŭsio mnie padabajecca, što ŭ kvatery ŭsio dosyć minimalistyčna: prastorny žyły pakoj, vialikaja kuchnia, kalidor i abjadnany sanvuzieł, — kaža jana. — U kuchni nievialiki stoł, plita i pasudamyjnaja mašyna, u kalidory — šafa-kupe, u pakoi — łožak i tumba z televizaram. Jość vialikija vokny. Mnie całkam chapaje, ničoha dadavać nie chaču, atrymlivaju asałodu ad prastory».

Vitalija kaža, što z koštam na kvateru joj mocna pašancavała, bo kvatery z pasudamyjkaj u Minsku redkaść i košty na ich startujuć ad 300 dalaraŭ.

«Viedaju vypadki, kali ŭ novabudoŭlach, choć jany i daloka ad centra, ceny zadzirajuć da niabiosaŭ: dvuma pavierchami nižej u maim domie mužčyna zdaje takuju ž adnapakajoŭku biez mebli ŭ pakoi za 400 dalaraŭ. Heta kašmar!» — kaža jana.

«Znajści žyllo samomu ŭ Minsku dosyć ciažka, — praciahvaje jana. — Bo amal usie abjavy pierachoplivajuć ahienty. Za svaje pasłuhi jany biaruć kala 50 dalaraŭ. Ale i heta nie harantyja taho, što žyllo znojdziecca, bo časta za hetyja hrošy jany akazvajuć «infarmacyjnyja pasłuhi».

Što tyčycca kamunałki, to Vitalija płacić ahułam kala 60 rubloŭ. Heta biez apłaty internetu.

«Na arendu kvatery sychodzić kala pałovy majho zarobku. A jašče treba na niešta žyć. Zrešty, kuplać žyllo jašče daražej, tamu zastajecca adzin varyjant: bolš pracavać», — zaklučaje jana.

Ahienctva nieruchomaści «Tvaja stalica» adznačaje, što siarednija košty na kvatery ŭ Minsku nastupnyja: adnapakajoŭka — 220 dalaraŭ, dvuchpakajoŭka — 270, trochpakajoŭka — 330.

Kijeŭ. «Za miesiac — 8500 hryvień. Heta biez kamunałki»

22-hadovaja Hanna Komłač zdymaje kvateru razam z chłopcam. Jany niadaŭna pierajechali ź Minska ŭ Kijeŭ. Žyllo šukali dosyć chutka, tamu daviałosia źviartacca da ryełtara. Va Ukrainie situacyja vielmi padobna da Biełarusi: ryełtary taksama zapoŭnili rynak i dosyć časta chavajucca za «zvyčajnymi» abjavami.

«Dobraha ryełtara nam padkazali siabry. Zvyčajny košt za pasłuhi — pałova ad miesiačnaj arendy, — raskazvaje dziaŭčyna. — Času vialikaha na pošuki nie było, tamu my zajechali ŭ pieršuju ž kvateru, jakuju nam prapanavali. Heta adnapakajoŭka pobač ź mietro, što było našym hałoŭnym pažadańniem. Praŭda, nie ŭ centry horada, a na ŭskrainie: my žyviom niedaloka ad stancyi mietro «Hierojaŭ Dniapra».

Infrastruktura tut dobraja: šmat handlovych centraŭ, jość zialonaja zona, pošta, apteka. Za miesiac — 8500 hryŭnia (kala 323 dalary). Heta biez kamunałki. Ale ŭ nas jość usio patrebnaje: mebla, technika.

Za kamunałku my ŭdvuch z maładym čałaviekam płacim 1500 hryvień (heta kala 138 rubloŭ, ci 57 dalaraŭ). Praŭda, pakul biez aciapleńnia. A voś košty na internet paradavali: 100 hryvień, ci 9 biełaruskich rubloŭ.

«Na arendu žytła my tracim prykładna čaćviortuju častku zarobku. Dla Ukrainy heta ličycca narmalnym. I my taksama dumajem, što ceny zrazumiełyja i dapuščalnyja», — kaža jana.

Pry hetym, u lipieni ŭ Kijevie fiksavali rekordnyja košty na arendnaje žyllo. Pa danych partała finance.ua, siaredni košt adnapakajovaj kvatery ŭ vieraśni składaŭ 426 dalaraŭ, dvuchpakajoŭki — 552.

Maskva. «Adnapakajoŭku zdymaju za 45 tysiač rasijskich rubloŭ»

21-hadovy Vasil Kalcoŭ pierajechaŭ u Maskvu ŭ 2018 hodzie, kali pastupiŭ va ŭniviersitet. Chłopiec nie zachacieŭ žyć u internacie, tamu pačaŭ šukać kvateru. Pieršy čas žyŭ u siabroŭ. Potym praz znajomych znajšoŭ pakoj, a potym źniaŭ kvateru niedaloka ad Kutuzaŭskaha praśpiekta.

«Kvatera adnapakajovaja, kaštuje 45 tysiač rasijskich rubloŭ u miesiac (630 dalaraŭ). Kamunalnyja pasłuhi abychodziacca prykładna ŭ 4-5 tysiač rasijskich rubloŭ (57-70 dalaraŭ) na čałavieka», — adznačaje jon.

Vasil kaža, što pakidaŭ zakład u pamiery miesiačnaj arendy. Taksama, zvyčajna, u Maskvie zaklučajuć damovu ab arendzie. Ale chłopiec žyvie bieź jaje.

«Ad majoj kvatery da centra dabiracca kala 15 chvilin, na mietro 20-25. Ale ŭ Maskvie možna nie raźličvać na darohu biez zatoraŭ, tamu lepš mieć hadzinu ŭ zapasie zaŭsiody, — raskazvaje jon. — Pobač u mianie jość skvier z darožkaj dla biehu. Nievialiki handlovy centr, mietro kala doma. Tolki adna prablema — heta parkoŭka, čaściakom niama dzie pryparkavać aŭtamabil i prychodzicca stavić daloka ad doma».

Kali b nie paščaściła, to daviałosia b źviartacca da ryełtaraŭ. Ich pasłuhi ŭ Maskvie dosyć časta roŭnyja miesiačnaj arendzie.

«Zaŭsiody pryjemniej viedać haspadara kvatery, — kaža Vasil. — Bo na doškach abjaŭ možna patrapić na ašukancaŭ, čornych ryełtaraŭ abo na zavyšany košt toj ci inšaj kvatery. Jość, viadoma, i vyklučeńni, ale dobryja kvatery pa pryvabnym cenach zdymajuć małankava, tamu, kali jość čas i žadańnie, možna pašukać kvatery na sajtach».

Partał moskva.naydidom.com paviedamlaje, što siarednija košty na arendu adnapakajovych kvatery składajuć 36,1 tysiačy rasijskich rubloŭ, ci 513 dalaraŭ, dvuchpakajovyja abyducca ŭ 75 tysiač rasijskich rubloŭ, ci 1066 dalaraŭ, a trochpakajovyja možna źniać za 129 tysiač, ci 1830 dalaraŭ.

Varšava. «Dvuchpakajovaja kvatera z usimi vypłatami ŭ 455 dalaraŭ»

Irynie Hłaholevaj 45. Razam z mužam i synam jana pierajechała ŭ Varšavu ŭ lipieni 2021 hoda. Žančyna kaža, što ŭ asnoŭnym usie kvatery ŭ Polščy zdajucca praz ahientaŭ. Ich pasłuhi kaštujuć 1500 złotych (380 dalaraŭ). Hrošy jany biaruć, pieravažna, z tych, chto šukaje kvateru.

«My vyrašyli pasprabavać samastojna znajści žyllo, — raskazvaje žančyna. — Heta było vielmi niaprosta. Na toj momant rynak całkam naležaŭ «haspadaram». A heta značyć, što, mienavita jany vyrašali, kaho zasialić da siabie «ŭ pałac», a kaho pakinuć ni z čym.

Na toj momant košty jakraz viarnulisia na dakavidny ŭzrovień — da 2019 hoda. Kvatera-studyja, ci kavalerka, kaštavała tady 1500 złotych (380 dalaraŭ), dvuchpakajovaja — 2500 złotych (632 dalary).

My nie šukali žyllo prosta ŭ samym centry, a źniali ŭ spalnym rajonie Viasoła. Jon niedaloka ad pracy. Palaki ceniać hety rajon za malaŭničaść i ekałahičnaść. U nas tut jość zialonaja zona, try škoły, dziciačyja sady, paliklinika, pošta, kramy, u tym liku bujny handlovy centr, pobač prypynak hramadskaha transpartu, haradskaja elektryčka.

Da samaha centra Varšavy maksimum 25 chvilin na aŭtobusie. Kuchniu my z dazvołu haspadaroŭ padzialili časovaj ścianoj. Takim čynam u syna źjaviłasia asobnaja «biarłoha», a ŭ nas try pamiaškańni. Takoje ščaście zdarajecca nie časta».

Što tyčycca koštu, to haspadar navat źniziŭ jaho na 400 złotych. U vyniku kvatera «paciahnuła» na 1800 złotych, ci 455 dalaraŭ.

«Pa mierkach Polščy košt nie šalony, — kaža Iryna. — Kamunałka pačynajecca ad 400 złotych (253 biełaruskija rubli) i zaležyć ad vašaj lubovi da vannaj i śviatła, — kaža Iryna. — Damovu my zaklučyli na hod, tut na mienšy termin znajści vielmi ciažka.

Pakidali zakład — pałovu štomiesiačnaha koštu. Ale zvyčajna haspadary prosiać u pamiery miesiačnaj abo dvuchmiesiačnaj arendy».

Miarkujučy pa źviestkach sajta bankier.pl, siamji Irynie paščaściła. Bo ŭ žniŭni biahučaha hoda adnapakajovyja kvatery i nievialičkija dvuchpakajoŭki kaštavali zbolšaha 500 dalaraŭ za miesiac, dvuchpakajoŭki možna znajści za 700, a trochpakajoŭki — za 1100.

Vilnia. «Za dvaich atrymlivajecca 220-250 jeŭra z kamunałkaj»

Vadzim Ivanoŭ — student. Jon pastupiŭ va ŭniviersitet u Litvie i pierajechaŭ u Vilnius pierad pačatkam navučalnaha hoda. Pošukam žytła chłopiec zaniaŭsia za miesiac da zapłanavanaha pierajezdu.

U Vilni ŭ Vadzima žyvuć znajomyja, tamu prahlad kvatery chłopcu zładzili dystancyjna, nie źviartajučysia da pasłuh ahientaŭ. U Vilniu ahientam zvyčajna płaciać tyja, chto zdaje kvateru. Zredku ŭ abjavach možna ŭbačyć dopisy pra toje, što jość adnarazovaja kamisija.

«Adnak z kankretnym varyjantam za miesiac ja nie zmoh vyznačycca, — kaža chłopiec. — Užo paśla pierajezdu, zasialiŭšysia na niekalki dzion u haścinicu, ja sam pajechaŭ na prahlady kvater. Samyja zručnyja rajony, akramia centra, dla mianie byli Antakalnis, Žyrmunaj, Šnipiškies, Šeškine, Fabijoniškies i Naŭjamieścis», — kaža chłopiec.

U vyniku Vadzim zasialiŭsia ŭ dvuchpakajovuju kvateru ŭ rajonie Naŭjamieścis. Žyvie ŭ joj razam ź siabram.

«Za dvaich atrymlivajecca 220-250 jeŭra z kamunałkaj (256-290 dalaraŭ). Ale kamunalnyja pasłuhi ŭ Litvie, jak i va ŭsioj Jeŭropie, u najbližejšy aciaplalny siezon mocna vyrastuć, tamu składana pakul acanić, jakaja budzie suma, — kaža małady čałaviek. — U nas kvatera 50 kvadratnych mietraŭ, dva izalavanyja pakoi, asobny sanvuzieł, vialikaja kuchnia i bałkon. Niedachop mebli ci techniki my chutka vyrašyli z dapamohaj Ikea.

Da centra horada ŭsiaho paŭhadziny pieššu. Ź inšych rajonaŭ, dzie za takija ž hrošy byŭ by lepš ramont, u siarednim 40 chvilin na hramadskim transparcie. Mnie prahułki pa Vilni prynosiać značna bolšaje zadavalnieńnie, asabliva ŭ kavidny čas».

«Asnoŭnyja košty ciapier roznyja: jość kvatery za 300-400 jeŭra (350-465 dalaraŭ), ale heta nie ŭ centry i ramont tak sabie. U pryncypie, možna i tańniej, ale ramont budzie zusim nijaki, — raskazvaje jon. — Za 500-600 jeŭra (580-700 dalaraŭ) možna znajści žytło ŭ centry, z narmalnym ramontam.

Dobryja dvuchpakajoŭki ŭ centry ad 700 jeŭra (815 dalaraŭ). Tut zaležyć ad vašych hustaŭ i situacyi. Kali zusim niama hrošaj, a žyć niedzie treba, to dosyć tanna možna źniać kvateru, jakaja zdajecca dla budaŭnikoŭ».

Pa danych renkuosilietuva.lt, u Vilniusie siarednija ceny na kvatery znachodziacca ŭ miežach 200-400 jeŭra ŭ miesiac za adnapakajovuju kvateru i, adpaviedna, u siarednim kala 340-600 jeŭra za dvuchpakajovuju kvateru. Košty mohuć zaležyć ad mikrarajona: naprykład, arenda adnapakajovaj kvatery z dobrym ramontam u centry Vilni moža dasiahać i 500-600 jeŭra ŭ miesiac, dvuch- i trochpakajovaj — 650-1000 jeŭra ŭ miesiac.

Ryha. «Zdymajem za 200 jeŭra ŭ samym centry»

Ženie 33 hady. Razam z mužam i sabakam u Ryhu jany pierajechali viasnoj biahučaha hoda. Spačatku pierabrałasia dziaŭčyna, a potym dałučyŭsia muž.

«Nie było zrazumieła, ci zmoža jon heta zrabić praz kavidnyja abmiežavańni, a potym jašče zdaryłasia historyja z samalotam, na jakim lacieŭ Raman Pratasievič, i konsulstva začyniłasia, — raskazvaje jana. — Karaciej, mnie była patrebna damova na try miesiacy i dazvoł žyć z žyviołaj.

U maim vypadku znajści kvateru było ciažka, tamu što my byli z sabakam. A tak kvater tut šmat, i znajści niešta nieskładana. Pry čym pa koštach nie daražejšych za minskija».

Ženia razhladała roznyja rajony, navat hladzieła kvatery ŭ rajonie Maskačy. Heta adzin z samych marhinalnych rajonaŭ łatvijskaj stalicy.

«Kali ja tam była druhi raz, na mianie napaŭ bomž. Heta jak trapić u dzievianostyja. Tam zdajucca kvatery i navat pradajucca vielmi tanna. Naprykład, za 20 tysiač jeŭra možna nabyć studyju z dobrym ramontam, — raskazvaje dziaŭčyna. — Viadoma, lepš hladzieć kvateru na miescy, a nie dystancyjna. Pa fotazdymkach ciažka ŭjavić, jak vyhladaje kvatera na samaj spravie.

Možna šukać samastojna, ale na maje zvanki časta adkazvaŭ makler. Heta jak ahient, ale jon akazvaje pasłuhu tamu, chto zdaje. To-bok makler biare hrošy z arendatara. Jon moža ŭziać i 80 jeŭra, a moža i našmat bolš. Zvyčajna heta zaležyć ad koštu kvatery ŭ kožnym kankretnym vypadku.

U vyniku svaich pošukaŭ Ženia źniała kvateru ŭ samym centry Ryhi. Heta adnapakajoŭka sa starym ramontam. Kaža, što šukała niešta prostaje, kab spakojna možna było žyć z sabakam.

«My płacim 200 jeŭra (233 dalary) u samym centry Ryhi. Apošni miesiac z aciapleńniem my zapłacili 65 jeŭra (184 biełaruskija rubli) kamunalnych pasłuh. Da hetaha było 50 jeŭra (141 biełaruski rubiel).

Vid z voknaŭ na histaryčnuju častku horada. Ale ŭ domie niama lifta, a ŭ nas šosty pavierch, tamu padymacca ciažka, niahledziačy na toje, što žyvu tut užo piaty miesiac. Dom darevalucyjny, u nas navat u pakoi jość piečka, ale joj nielha karystacca».

Pa słovach Ženi, arenda standartnaj adnapakajoŭki ŭ Ryzie składaje 180-250 jeŭra (210-240 dalaraŭ), dvuchpakajoŭki — 230-350 (270-407 dalaraŭ), trochpakajoŭki — kala 300-450 (350-465 dalaraŭ). Što tyčycca centra, to tut adnapakajoŭki kaštujuć ad 200 da 600 jeŭra (232-700 dalaraŭ), ale za 400 užo zdajuć z dobrym ramontam. Dvuchpakajoŭki startujuć ad 400 i vyšej (ad 466 dalaraŭ).

«Rynak žylla ŭ Ryzie vielmi raznastajny, tut možna źniać usio: ad sabačaj budki da apartamientaŭ u elitnym navabudzie. Šmat kvater u draŭlanych damach ź piečkami. Šmat kvater z prybiralniaj u padjeździe. Tamu padvieści vynik, što i kolki kaštuje, davoli składana», — adznačaje jana.

Pa danych partała kominvest.com, adnapakajovyja kvatery ŭ Ryzie zdajucca prykładna za 200-300 jeŭra. Dvuchpakajovaja kvatera ŭ novabudoŭli ŭ spalnym rajonie Ryhi moža zdavacca ŭ miežach 350-500 jeŭra. U siarednim dobraja novaja trochpakajovaja kvatera z meblaj i parkoŭkaj arandujecca za 500-600 jeŭra ŭ miesiac, kali heta spalny rajon horada. 

***

Zhodna sa źviestkami sajtaŭ nieruchomaści, my skłali tablicu prykładnych koštaŭ na arendu. Pakul tańniejšaja arenda, akazvajecca, usio ž u Minsku. Ale, viadoma, varta hladzieć na toje, jaki pracent zarobku sychodzić na apłatu žylla ŭ Biełarusi i ŭ susiednich krainach. 

Nashaniva.com