Z «asablivym trapiatańniem» zachoŭvaje aŭtohraf Łukašenki
Valeryi Taratyncy — 26. U prakuraturu jana pryjšła čatyry hady tamu, adrazu paśla Akademii kiravańnia pry prezidencie. U halinovym časopisie adznačałasia, što z takoj źniešnaściu jana lohka mahła pabudavać karjeru madeli, ale Valeryja ź dziacinstva cikaviłasia kryminałam.
Valeryja Taratynka. Fota: pac.by
«Kali mnie było hadoŭ siem, maci spytała, kim ja chaču stać u budučyni, — uzhadvała jana. — Nie zadumvajučysia, adkazała: «Prakuroram!» Usio tamu, što ŭ dziacinstvie była vialikaj prychilnicaj sieryjała «Tajamnicy śledstva». Ja časta hladzieła z baćkami naviny, asabliva padabalisia siužety, u jakich ludzi ŭ pahonach davali kamientary pa kryminalnych spravach».
Ciapier Valeryja sama achvotna razdaje takija kamientary. Za apošni hod jana źjaŭlałasia na telebačańni čaściej, čym mnohija daśviedčanyja prakurory za ŭsio svajo prafiesijnaje žyćcio. U adroźnieńnie ad kaleh, jana nie prosta nie saromiejecca kamiery, a zaŭsiody imkniecca być u kadry.
Valeryja (u centry) na bali vypusknikoŭ. Fota: pac.by
Bijahrafija Valeryi Taratynki nahadvaje viadomuju frazu «spartsmienka, kamsamołka i prosta pryhažunia». Škołu dziaŭčyna skončyła z załatym miedalom, univiersitet — z čyrvonym dypłomam.
Jana achvotna ŭdzielničała i pieramahała ŭ studenckich konkursach z pramovami da 70-hodździa pieramohi ŭ vajnie i da Jeŭrazijskich hulniaŭ u Minsku, mieła ŭdziačnaść ad Łukašenki za pośpiechi ŭ vučobie, atrymlivała dypłom na konkursie pieramoŭščykaŭ, jaki pravodziŭ centr viadomaha jurysta i miedyjatara Lilii Ułasavaj, jakaja ŭ 2020-m za svaje pohlady stała palitźniavolenaj.
U 2017 hodzie Valeryja brała ŭdzieł u bali vypusknikoŭ u Pałacy niezaležnaści. Zachavalisia kadry, dzie jana paziruje pravaruč ad Łukašenki. U intervju jana pryhadvała, što «z asablivym trapiatańniem» zachoŭvaje jahony aŭtohraf z pažadańniami ŭdačy i kachańnia.
Pa spravie ab karupcyi prasiła «apaznać stravy» z restarana
Pa słovach prakurorki, najbolš cikaviać jaje spravy ab karupcyi.
«Davodzicca sutykacca z vysokakvalifikavanymi abvinavačvanymi i śviedkami, jakija majuć dobruju adukacyju, peŭny status u hramadstvie, — tłumačyła jana. — Heta abaviazvaje hruntoŭna rychtavacca da kožnaha sudovaha pasiadžeńnia».
Valeryja Taratynka, adpracavaŭšy ŭ prakuratury ŭsiaho dva hady, atrymała salidnuju spravu — abvinavačvańnie byłoj načalnicy farminśpiekcyi Minzdaroŭja Ludmile Ravuckaj, jakuju sudzili za atrymańnie chabaraŭ i machlarstva. U sudzie Taratynka zapomniłasia tym, što padrabiazna vyvučała, chto i čym karmiŭ Ravuckuju ŭ restaranach.
Valeryja Taratynka ŭ sudzie
«Limanad imbirny, čabureki, šašłyk, file łasosia, sparža, kałduny, kačka, trus. Prašu vas apaznać stravy», — pieraličvała jana padčas dopytu.
Dla byłoj čynoŭnicy abvinavaŭca zapatrabavała siem hod kałonii, sudździa zrezała adzin hod — Ravuckaja i pa siońnia adbyvaje pakarańnie ŭ homielskaj kałonii.
«U mianie jość ćviordaje praviła, — apisvała svajo prafiesijnaje kreda Taratynka, — jakija b emocyi ja nie adčuvała ŭ adnosinach da ŭdzielnikaŭ pracesu, kirujusia vyklučna zakonam».
Sprava za nadpis «Nie zabudziem», jaki «źnievažaje hramadzian»
Ale sapraŭdy viadomaj Valeryja stała paśla spravy «ab cyničnych nadpisach» — takoje nie pakažuć u jaje lubimych rasijskich sieryjałach.
8 śniežnia 2020 hoda troje minčukoŭ byli asudžanyja za nadpis «Nie zabudziem» na Puškinskaj, dzie byŭ zabity Alaksandr Tarajkoŭski. Abvinavaŭcam była Valeryja Taratynka, praŭda, paśla jaje zamianiła Alina Kaśjančyk, u jaje na toj momant užo byŭ dośvied pa anałahičnaj spravie «ab cyničnych nadpisach» na asfalcie.
Abvinavačanyja za nadpis «Nie zabudziem». Fota: spring96.org
Sprava, jakuju Taratynka pradstaŭlała ŭ sudzie, ad pačatku razvalvałasia. Tekst abvinavačvańnia varty cytavańnia:
«Umyšlenno nanies na trotuarnuju plitku ciničnuju nadpiś, oskorblajuŝuju čuvstva hraždan, diemonstrirujuŝuju prieniebriežienije k nravstviennym ciennostiam, napravlennuju na pričinienije vrieda obŝiestviennomu poriadku i obŝiestviennoj nravstviennosti śledujuŝieho sodieržanija: NIE ZABUDIEM!»
Taratynka pryjšła na praces z abvinavačvańniem ab uronie bolš čym u 10 tysiač rubloŭ.
Adnak «Harramaŭtadar» acaniŭ uron usiaho ŭ 256 rubloŭ, takaja suma nie padpadaje pad złačynstva. Daviałosia źniać abvinavačvańnie ŭ naŭmysnym źništažeńni majomaści, jakoje było spačatku, zastaŭsia adzin artykuł — chulihanstva.
25-hadovy Uładzisłaŭ Hulis atrymaŭ dva hady pazbaŭleńnia svabody (raniej mieŭ sudzimaść), 42-hadovy Dzianis Hrachanaŭ i 25-hadovy Ihar Samusienka — paŭtara hoda «chimii», pravaabaroncy pryznali fihurantaŭ palitviaźniami.
Sud za aplavuchu Azaronku
Jašče adzin hučny praces u skarboncy prakurorki Taratynki — sprava pierakładčycy Volhi Kałackaj, jakuju sudzili za toje, što jana dała aplavuchu prapahandystu Ryhoru Azaronku.
Incydent zdaryŭsia nieŭzabavie paśla śmierci Ramana Bandarenki. Volha ŭbačyła na prypynku hramadskaha transpartu Azaronka, jaki čaplaŭsia da ludziej z pytańniami kštałtu: «Jak vy možacie smutkavać ab śmierci Bandarenki, kali navat nie viedajecie jahonaje imia pa baćku?»
«Ja była hłyboka aburanaja i abražanaja tym, što svaimi rytaryčnymi pytańniami jon staviŭ pad sumnieŭ ščyraść smutku ludziej», — kazała Volha ŭ sudzie.
Pierakładčyca Volha Kałackaja ŭ sudzie
Sam prapahandyst zajaviŭ, što źviartaŭsia z zajavaj, kab Kałackuju nie pryciahvali da kryminalnaj adkaznaści, paŭtaryŭ heta chadajnictva i ŭ sudzie.
Ale abvinavaŭca Valeryja Taratynka stajała na svaim: «Kałackaja ŭ hramadskim miescy biespadstaŭna, adkryta supraćpastaŭlajučy siabie hramadstvu, naŭmysna naniesła ŭdar pa tvary Azaronka».
Za chulihanstva pierakładčycy, jak i zajaŭlała prakurorka, dali dva hady «chatniaj chimii».
Taksama Valeryja Taratynka była abvinavaŭcam pa spravie mienčukoŭ, jakija chacieli spynić amapaŭcaŭ, kab tyja nie zatrymlivali i nie źbivali ludziej padčas adnaho z maršaŭ u kastryčniku 2020-ha.
Paciarpiełymi pryznali siem amapaŭcaŭ, abvinavačanyja atrymali ad 4 da 5 hod kałonii.
I jašče adzin palityčny praces — 5 hod minčuku Alaksandru Rajentavu, jakoha asudzili za stvareńnie telehram-kanała i supraciŭ milicyi. U sudzie ŭźnikli pytańni da zapisu, jaki pradstaviła abvinavačvańnie: abarona zajaviła pra mantaž videa i huku.
Była abvinavaŭcaj — stała paciarpiełaj
Valeryja Taratynka vystupaje ŭ sudach nie tolki jak abvinavaŭca, ale i jak paciarpiełaja. Užo niekalki čałaviek byli pryciahnutyja da adkaznaści za kamientary, jakija pakinuli pad dopisami pra jaje.
Pieršy abvinavačany — invalid treciaj hrupy Maćviej Chudaješka. U sudzie jon paprasiŭ prabačeńnia, Valeryja zajaviła, što ich prymaje i spadziajecca, što jon zrabiŭ vysnovy. Fihurant atrymaŭ dva hady «chatniaj chimii».
Druhaja abvinavačanaja — sanitarka ŭ ankadyspansiery Hanna Bahačova. U sudzie jana zajaviła, što nielha budavać karjeru na palityčna matyvavanych spravach. Paciarpiełaja zajaviła pra maralnyja pakuty — tryvohu, kryŭdy i źniavahu. Sanitarka atrymała paŭtara hoda «chatniaj chimii» i pavinna zapłacić prakurorcy tysiaču rubloŭ.
Jak paśpiachovuju vypusknicu, Valeryju zaprašajuć vystupać pierad studentami Akademii kiravańnia Fota: pac.by
Valeryja Taratynka kaža, što sa žniŭnia minułaha hoda joj rehularna prylatali paviedamleńni z pahrozami i źniavahami, ale jana «pieraniesła heta davoli stojka»:
«Pastupajučy na słužbu ŭ orhany prakuratury, ja razumieła, što rana ci pozna mahu z hetym sutyknucca. Upeŭnienaja, kali takija niepryjemnyja pasłańni mohuć vybić z kalainy, to čałavieku pieršapačatkova nie varta było vybirać prafiesiju prakurora.
Ja pryniesła prysiahu, tamu nie maju maralnaha prava dać słabinu, spałochacca. U advarotnym vypadku ja pavinna vyzvalić miesca tamu, chto stanie na abaronu zakonnaści i pravaparadku i nie budzie sprabavać samaŭchilicca».
Muž pracuje sudździoj i nie adstaje ad žonki
Muž Valeryi taksama skončyŭ Akademiju kiravańnia, jamu 27 hod. Mikałaj Bahamiakaŭ byŭ paśpiachovym studentam — atrymlivaŭ stypiendyju sa śpiecfondu, pieramahaŭ na konkursach dla maładych navukoŭcaŭ.
Sudździa Mikałaj Bahamiakaŭ
Spačatku pracavaŭ u prakuratury, ale ŭ 2020-m atrymaŭ pryznačeńnie ŭ sud Frunzienskaha rajona. Tak što Valeryja sustrakajecca z mužam nie tolki doma, jana pradstaŭlaje abvinavačvańnie ŭ tym samym sudzie.
Mikałaj pracuje pa kryminalnych i administratyŭnych spravach, na jaho rachunku bolš za sto sutak administratyŭnaha aryštu pa spravach za palityčnuju pazicyju.
«Dla mianie jon prykład taho, jakim pavinien być prafiesijny juryst, — kaža pra muža Valeryja. — Dla nas jurysprudencyja nie tolki śfiera dziejnaści, ale i siamiejnaje chobi».
