«Praz hod paśla falsifikavanych vybaraŭ abstanoŭka ŭ Biełarusi zastajecca sumnaj. Režym Łukašenki praciahvaje sistematyčnyja sproby zahłušyć usie niezaležnyja hałasy ŭ krainie — niezaležnuju presu, pravaabaroncaŭ i hramadzianskuju supolnaść», — adkryła debaty jeŭrakamisar pa ŭnutranych spravach Ilva Jochansan. Jana nahadała, što ŭ Biełarusi bolš za 700 palitviaźniaŭ i ich kolkaść tolki raście.

Litoviec Andrus Kubilus, jaki vystupaŭ ad imia Jeŭrapiejskaj narodnaj partyi, prapanavaŭ «nieadkładna vynieści dziejańni Minska na razhlad Mižnarodnaha kryminalnaha suda na padstavie Čykahskaj kanviencyi (ab mižnarodnaj hramadzianskaj avijacyi), Manrealskaj kanviencyi (ab unifikacyi praviłaŭ mižnarodnych pavietranych pieravozak) i Kanviencyi suprać katavańniaŭ (AAN)».

Hetuju ideju padtrymaŭ šerah deputataŭ ź inšych frakcyj. U pryvatnaści, sacyjał-demakrat z Partuhalii Izabel Santuš. Pavodle jaje, Łukašenka pavinien adkazvać pierad Mižnarodnym kryminalnym sudom. Toje ž vykazaŭ i deputat ad partyi «Zialonyja» ad Niamieččyny Siarhiej Łahadzinski. «Dokazy dla hetaha majucca», — dadaŭ jon.

U Jeŭraparłamiencie taksama abmierkavali prablemu ź mihrantami.

Ilva Jochansan paviedamiła, što sioleta na miežach pamiž Biełaruśsiu i ES zarehistravanyja ŭžo bolš za 6000 «nierehularnych» mihrantaŭ, tady jak u minułym — kala 150. Pavodle jaje słoŭ, hetyja ludzi — pieravažna vychadcy ź Iraka, Konha, Kamieruna i Siryi.

Biełaruś nie źjaŭlajecca krainaj, jakaja znachodzicca pad mihracyjnym ciskam. «Naohuł, ludzi šukajuć prytułku (ratujučysia) ź Biełarusi, a nie ŭ Biełarusi», — padkreśliła Jochansan.

Jochansan miarkuje, što prybyćcio mihrantaŭ arhanizuje dziaržaŭny turapieratar «Centrkurort». Ich sielać u dziaržaŭnych hatelach, a potym viazuć u mikraaŭtobusach da miežaŭ Łatvii, Litvy i Polščy. Takija dziejańni ŭładaŭ Biełarusi Jochansan nazvała «niezakonnym pieramiaščeńniem mihrantaŭ praź miažu, spansavanaj dziaržavaj». Choć, pa jaje słovach, u apošnija tydni kolkaść mihrantaŭ «rezka ŭpała».

Litoŭski jeŭradeputat ad libieralnaj palityčnaj hrupy «Abnavić Jeŭropu» Piatras Aŭštravičus nazvaŭ vykarystańnie mihrantaŭ «maštabnymi hibrydnymi napadami» suprać Litvy, Łatvii i Polščy. A datčanin Pieter Kufud z pravapapulisckaj frakcyi «Identyčnaść i demakratyja» doŭha chvaliŭ Varšavu, Vilniu i Ryhu za toje, što tyja abaraniajuć svaje miežy, kali ES «nie zaŭvažaje svaich abaviazacielstvaŭ».

Zusim inšuju pazicyju zaniali levyja frakcyi. Sacyjał-demakrat z Partuhalii Pedra Markieš miarkuje, što, niahledziačy na vykarystańnie mihrantaŭ aficyjnym Minskam, heta nie apraŭdvaje taho, jak z hetymi mihrantami abychodziacca na miežach ES, nahadaŭšy ab hibieli niekalkich mihrantaŭ u pamiežnaj zonie pamiž Biełaruśsiu i Polščaj.

Ispanski «levy» Manu Pinieda zajaviŭ, što jamu ciažka havaryć ab situacyi z pravami čałavieka ŭ Biełarusi, kali «na miežach Polščy, Łatvii i Litvy panuje biesparadak». Jon abvinavaciŭ hetyja try krainy ŭ hrubym parušeńni mižnarodnaha prava.

Polski sacyjał-demakrat Robiert Biedrań ličyć, što aficyjnamu Minsku ŭdałosia destabilizavać uschodniuju miažu ES i takim čynam vystavić urad u Varšavie «karysnym idyjotam». U jakaści dovadu Biedrań nazvaŭ hibiel mihrantaŭ na miažy. Heta vyklikała škvał krytyki ŭ jeŭradeputataŭ z kirujučaj u Polščy partyi «Prava i spraviadlivaść». Joachim Brudziński zajaviŭ, što «karysnymi idyjotami» pryniata nazyvać pradstaŭnikoŭ mienavita levych sił. U adkaz Vaščykoŭski zaklikaŭ zału nie źviartać uvahu na «chłuśniu polskaj apazicyi».

Niemka Tery Rajntkie ad «Zialonych» adznačyła, što hałoŭnaj zbrojaj dyktataraŭ źjaŭlajucca nie ślozatačyvy haz abo aŭtamaty ich siłavikoŭ, a zabyćcio:

«Takija ludzi, jak Łukašenka, chočuć, kab my stracili cikavaść. Jany chočuć, kab pa skančeńni miesiacaŭ my zabylisia, adviarnulisia i bolš nie hladzieli na toje, što adbyvajecca ŭ Biełarusi».

Jeŭradeputat nahadała ab 11-hadovym turemnym terminie Maryi Kaleśnikavaj.

«Kali heta varjactva nie spynić, joj [Kaleśnikavaj] budzie 50 hadoŭ, kali skončycca jaje turemny termin», — skazała Rajntkie i paabiacała, što Jeŭraparłamient nie zabudzie pra Biełaruś.

«Paradak dnia idzie napierad, ale, na žal, dla [palityčnych] źniavolenych u Biełarusi žach zastajecca realnym… My nie možam adviarnucca ad hetaha», — padtrymaŭ jaje rumyn Drahaš Tudarakie z hrupy «Abnavić Jeŭropu».

Клас
0
Панылы сорам
0
Ха-ха
0
Ого
0
Сумна
0
Абуральна
0