«Ja moh by adkazać hetaksama, jak kaliści skazaŭ moj dobry siabra i starejšy brat Uładzimir Pucin: kaho biełaruski narod abiare, toj i budzie prezidentam, — zajaviŭ Łukašenka sioleta padčas 9-hadzinnaj pres-kanfierencyi. — Jakuju ja pazicyju pry hetym budu zajmać, ja nie vyznačyŭsia, ščyra kažučy. Ja dumaju pra heta, naturalna, heta ž nie viečnaja pasada. Ja čałaviek, jaki ŭsiu maładość na heta pakłaŭ, časam ja chaču prosta spakojna pažyć, ale paśla pačynaju pahłyblacca ŭ hetyja rozdumy i razumieju, što spakojnaha žyćcia ŭ mianie ŭžo nie budzie da śmierci».
Palityk, zapatrabavany pry luboj uładzie
Tak havorać pra Michaiła Miaśnikoviča. Jašče jaho nazyvajuć vopytnym i aściarožnym aparatčykam. Jon pačynaŭ karjeru ŭ kamunalnaj haspadarcy, byŭ hałoŭnym inžynieram «śpiechaspadarki» ŭ Minsku, jakoj naležali ŭradavyja mohiłki.
Chutka padaŭsia ŭ palityku — chutka zaniaŭ kirujučuju pasadu ŭ Minskim haradskim Saviecie narodnych deputataŭ, dalej była praca ŭ ministerstvie ŽKH i Kamitecie pa ekanomicy i płanavańni. Raspad Savieckaha sajuza jon sustreŭ na pasadzie vice-premjera.
Michaił Miaśnikovič
Miaśnikovič byŭ u kamandzie Viačasłava Kiebiča, kiravaŭ jahonym štabam, ale kali na vybarach pieramoh Łukašenka, chutka pierajšoŭ na jahony bok. Choć niekatoryja paplečniki Łukašenki pryhadvali, što Miaśnikovič jašče da vyniku hałasavańnia, kali było ŭžo zrazumieła, u kaho bolšyja šancy, pakazaŭ svaju łajalnaść budučamu prezidentu.
Cikava, što ŭ 1994-m u Łukašenki spytali, što jon budzie rabić «z samym bahatym čałaviekam krainy Michaiłam Miaśnikovičam». Toj adkazaŭ, što jon atrymaje «pa zasłuhach». Miaśnikoviča nazyvali pieršym biełaruskim miljanieram, jaki zarabiŭ na rytualnych pasłuhach.
Miaśnikovič hod adpracavaŭ vice-premjeram u Łukašenki, a paśla šeść hod kiravaŭ jahonaj Administracyjaj. Na hety čas vypaŭ histaryčny refierendum 1996 hoda, paśla jakoha značna pašyryli paŭnamoctvy prezidenta. Taksama Michaił Miaśnikovič zaśpieŭ na pasadzie prezidenckija vybary ŭ 2001, niepryznanyja biełaruskaj apazicyjaj i Zachadam (Łukašenka, pa padlikach CVK, tady nabraŭ 75,65%).
Asnoŭny kankurent Łukašenki, prafsajuzny lidar Uładzimir Hančaryk u intervju ŭzhadvaŭ, što ŭ Maskvie, kudy jon jeździŭ na pieramovy adnosna mahčymaha pierajemnika prezidenta, razhladali kandydaturu Michaiła Miaśnikoviča. «Ja pamiataju, jakuju charaktarystyku jamu tady dali: daśviedčany, chitry, aściarožny. Ja z hetym całkam zhodny».
Litaralna praz try dni paśla vybaraŭ Miaśnikovič vyzvaliŭ kresła kiraŭnika Administracyi i na dzieviać hod syšoŭ kiravać Nacyjanalnaj akademijaj navuk, hety čas možna nazvać svojeasablivaj ssyłkaj. Status prafiesara jon atrymaŭ praź niekalki hod.
Pra Miaśnikoviča nie zabyli — adrazu paśla prezidenckich vybaraŭ 2010 hoda jaho na čatyry hady pryznačajuć premjer-ministram.
Vybary prachodzili na fonie masavych aryštaŭ i siłavoha padaŭleńnia pratestaŭ, bolšaść apazicyjnych kandydataŭ byli zatrymanyja jašče da skančeńnia hałasavańnia. U vyniku piać kandydataŭ byli asudžanyja pa kryminalnych artykułach, bolš za 30 palitviaźniaŭ atrymali pakarańnie pa spravie «Płošča-2010».
Sankcyi, značna słabiejšyja za ciapierašnija, vymusili režym pajści na sastupki — usich palitviaźniaŭ daterminova vyzvalili, mnohija tak i nie padpisali prašeńnie ab pamiłavańni.
Na čas premjerstva Miaśnikoviča taksama prypaŭ ekanamičny kryzis u 2011-m, kali adbyłasia rekordnaja devalvacyja rubla. Čerhi za valutaj, praduktami i pobytavaj technikaj nahadvali «hałodnyja 90-ja», dachody nasielnictva skaracilisia da ŭzroŭniu 2005 hoda, zarobki ŭ Biełarusi stali nižej, čym u Kyrhyzstanie i Małdovie. Top-čynoŭniki, i Miaśnikovič razam ź imi, admaŭlali prablemu. «Na valutnym rynku krainy jość peŭnyja prablemy, ale ekanamičnaha kryzisu ŭ Biełarusi niama», — zajaŭlaŭ premjer-ministr.
U pačatku 2015-ha Miaśnikoviča na čatyry hady adpravili kiravać vierchniaj pałataj parłamienta. Michaiła Miaśnikoviča možna nazvać doŭhažycharom na palityčnaj arenie. Apošnija hady jon staršynia kalehii Jeŭrazijskaj ekanamičnaj kamisii. Łukašenka, kali prapanoŭvaŭ jamu novuju pasadu, adznačyŭ, što «heta pad siłu tolki vam».
Jašče adna cikavaja detal — da Miaśnikoviča jon źviartajecca na «vy», što byvaje nie časta ŭ jahonaj kamunikacyi z čynoŭnikami. Ciapierašniaja pasada Miaśnikoviča vybarnaja, na čatyry hady.
Biełaruskija deputaty vyrašyli ŭzmacnić kryminalnuju adkaznaść za zaklik da sankcyjaŭ, kažuć, heta stavić pad pahrozu biełaruskuju ekanomiku. Tym časam Michaił Miaśnikovič zajaŭlaŭ, što «sankcyi stvorać umovy dla padjoma nacyjanalnych ekanomik».
«Biełaruś, a nie Biełarusija»
Michaił Miaśnikovič staŭ premjer-ministram paśla Siarhieja Sidorskaha, jaki pazbaviŭsia pasady adrazu paśla vybaraŭ-2010. Jak adznačaŭ tady palityčny ahladalnik Alaksandr Fiaduta, «za niełajalnaść, jakuju jon navat nie paśpieŭ prajavić».
Siarhiej Sidorski
Sidorski pratrymaŭsia ŭ kreśle premjera rekordnyja dla Biełarusi siem hod. I stvaraŭ uražańnie prychilnika chacia b pavolnych reformaŭ — zaklikaŭ čynoŭnikaŭ skaračać raschody, hladzieć, jak raźvivajecca cyvilizavany śviet i paŭtarać najlepšyja praktyki. Sam byŭ z pracoŭnymi vizitami ŭ jeŭrapiejskich krainach.
Siarhiej Sidorski davoli časta źjaŭlaŭsia na publicy razam sa svajoj žonkaj Ludmiłaj — i na kulturnych mierapryjemstvach, i na spartovych matčach. Heta karcinka rezka kantrastavała z partretami Łukašenki.
Nie tolki biełaruskija, ale i rasijskija analityki adznačali dobryja ŭzajemaadnosiny Sidorskaha z Pucinym. Cikavaja detal — na pasiedžańni z rasijskimi čynoŭnikami publična papraviŭ ministra ekanamičnaha raźvićcia RF. «Naša kraina nazyvajecca Biełaruś, a nie Biełarusija», — zaŭvažyŭ premjer-ministr.
Na publiku vyjšaŭ prynamsi adzin kanflikt Łukašenki i Sidorskaha. Premjer-ministr źviarnuŭsia z prośbaj adsunuć na hod terminy pahašeńnia kredytaŭ dla pradpryjemstvaŭ, u jakich nie było hrošaj, maŭlaŭ, za kožnym zavodam stajać ludzi. «Ja palityk i pavinien dumać pra ludziej, a vy pavinny dumać pra ekanomiku i finansy», — asadziŭ jaho Łukašenka.
Sidorskaha charaktaryzujuć jak niadrennaha administratara, ale adznačajuć, što jamu nie chapiła śmiełaści, kab prasunuć realnyja reformy. Prapanovy ssunuć Łukašenku jamu pastupali nieadnarazova, ale jak čałaviek namienkłatury Sidorski zastaŭsia pry svaim.
Niekatoryja čas paśla premjerstva pra karjeru palityka ničoha nie paviedamlałasia, zatym na šeść hod jon staŭ členam kalehii pa pramysłovaści i ahrarnym kompleksie JEEK. Pa apošnich zhadkach, Sidorski pracavaŭ u Jeŭrazijskim banku raźvićcia.
Samy demakratyčny premjer
Siarhiej Rumas vyhladaŭ adnoj z samych kampramisnych fihur, jakaja mahła b zadavolić bolšuju častku hramadstva, raskołataha palityčnym kryzisam u 2020 hodzie. Urad pad jahonym kiraŭnictvam ličyŭsia samym prahresiŭnym — Rumas vystupaŭ za reformy, palapšeńnie ŭzroŭniu žyćcia biełarusaŭ, ekanamičnuju niezaležnaść Biełarusi. Tak, jon nastojvaŭ, što «darožnyja karty» z Rasijaj buduć padpisanyja, tolki kali buduć uličanyja intaresy Biełarusi.
Siarhiej Rumas
U top zadač, jakija jon staviŭ na pieršyja dva hady svajho premjerstva, uvachodziła raźvićcio pradprymalnickaha asiarodździa i stvareńnie kamfortnych umoŭ viadzieńnia biźniesu, farmiravańnie IT-krainy i maštabnaja ličbavizacyja ekanomiki, praviadzieńnie efiektyŭnaj biudžetna-finansavaj i padatkovaj palityki, nizki ŭzrovień inflacyi, udaskanalvańnie inviestycyjnaj palityki i h.d.. Ale varta praŭdziva hladzieć na vynik: mnohija prapanovy Rumasa adpaviadali rynkavaj ekanomicy, mała što ŭdałosia realizavać.
Za paru miesiacaŭ da vybaraŭ Rumasa adpraŭlajuć u adstaŭku. Łukašenka spačatku abviaściŭ, što premjer sychodzić u biznes: «Jon mnie prosta skazaŭ: ja chaču zaniacca biznesam, chaču zarabić hrošy, niemałyja hrošy, ja mahu ich zarabić. Nie dumaju, što Rumas źjedzie z krainy i paviazie hetyja hrošy, jon ich układzie tut u ekanomiku».
Ale nieŭzabavie jamu nieadnarazova prylatali tumaki, maŭlaŭ, usie prapanovy rynačnikaŭ (vidavočny namiok na kamandu Rumasa), ledź nie pahubili krainu.
Rumas, jak i Sidorski, byŭ zanadta zaŭvažnym palitykam — jon taksama źjaŭlaŭsia na publicy z žonkaj, bijahrafii jahonaj siamji moh pazajzdrościć luby palityk.
16 žniŭnia 2020-ha, kali ŭ Biełarusi sabrałasia samaja masavaja akcyja pratestu, žonka Rumasa apublikavała fota ź im na fonie mora demanstrantaŭ. Adnak sam były čynoŭnik, jak nie pryciahvali jaho da prezidenctva, pra svaje palityčnyja ambicyi ničoha nie zajaŭlaŭ.
Sioleta były premjer pakinuŭ Biełaruś. Zimoj zatrymali jahonych siabroŭ, ź jakimi jon pracavaŭ, kali byŭ bankiram. Paviedamlałasia, što doma ŭ jahonaj siamji pravodziŭsia pieratrus.
U kastryčniku źjaviłasia infarmacyja, što Siarhiej Rumas uvajšoŭ u skład Naziralnaj rady «Raśsialhasbanka», dzie jaho dobra viedajuć jašče pa pracy ŭ Biełarusi, kali jon uznačalvaŭ «Biełahraprambank».
«Hatovy prezident», za jakuju nie prahałasujuć
Natalla Kačanava — samaja vysokapastaŭlenaja žančyna ŭ biełaruskaj uładzie. Jana stała ŭvasableńniem toj žančyny ŭ palitycy, jakaja zadavalniaje ŭłady: kožny dzień jana demanstruje, što hatova hety režym adstojvać i zhładžvać, kali spatrebicca, usie vuhły.
Natalla Kačanava
«Na maim prykładzie možna pierakanacca: lubaja žančyna moža dasiahnuć samych nievierahodnych viaršyniaŭ i ŭ prafiesii, i ŭ žyćci», — kaža jana pra siabie.
Natalla Kačanava sapraŭdy spačatku nie vyznačałasia ničym admietnym: navat va ŭniviersitet jana pastupiła pa spartovaj kvocie (dobra hulała ŭ valejboł) na samuju niezapatrabavanuju śpiecyjalizacyju — vadazabieśpiačeńnie i kanalizacyja. «Na pieršym kursie ja nie bačyła siabie nikim», — raskazvała čynoŭnica ŭ intervju.
Pačynała, jak prosty dyśpietčar na vodakanale.
«Mnie zaŭsiody ŭsio padabałasia, — pryhadvała maładość Kačanava. — Ja nikoli nie dumała niadkul sychodzić … Kali była ŭ dekrecie, mnie prapanavali pierajści na pradpryjemstva ŽKH. Ja i pajšła. Nu i da čaho ja imknułasia? Dy ni da čaho. Dla mianie nikoli nie stajała takaja meta, dasiahnuć jakich-niebudź vyšyń u karjery».
Natalli pašancavała, što jaje zaŭvažyŭ mer Połacka Uładzimir Tačyła, ź jakim i źviazvajuć pieršyja karjernyja pośpiechi Kačanavaj — jana pryjšła ŭ harvykankam. Tačyła ŭ vyniku pahareŭ na karupcyi, choć da turmy nie dajšło — Łukašenka pamiłavaŭ jaho jašče da suda.
Tym časam Natalla Kačanava stała meram Navapołacka. Heta pryznačeńnie źviazvajuć ź inšym upłyvovym čynoŭnikam — Alaksandram Kosincam, jaki na toj čas byŭ vice-premjeram.
Praź niekalki hod Kačanava vyrasła da vice-premjera pa sacyjalnych pytańniach. Łukašenka prama zajaviŭ: za jaje prasili siłaviki i paručyŭsia śpikier nižniaj pałaty parłamienta Uładzimir Andrejčanka. Jon, jak i papiarednija «paručalniki» Kačanavaj — ź Viciebščyny. Takim čynam, jana stała pieršaj (i pakul adzinaj) u historyi Biełarusi žančynaj vice-premjeram, a nieŭzabavie ŭznačaliła Administracyju prezidenta.
Kačanava stvaraje vobraz čynoŭnika, blizkaha da naroda — moža vysłuchać prostych ludziej, paabiacać razabracca ŭ prablemie, navat kali heta prablema nie jaje ŭzroŭniu. I navat paprasić prabačeńnia ad imia ŭłady, što nadzvyčaj redka zdarajecca siarod čynoŭnikaŭ.
Cikava, što mienavita Kačanavaj daviałosia razhrabać mnohija kasiaki pravaachoŭčaj i sudovaj sistemy: heta jana prasiła prabačeńnia ŭ cyhanoŭ, jakich niespraviadliva pakryŭdziła milicyja, heta jana sustrakałasia z rodnymi asudžanych za narkotyki, jakija niazhodnyja z žorstkaj palitykaj dziaržavy, i heta jana jeździła ŭ kałoniju, kab uhavaryć palitźniavolenuju Natallu Chierše paprasić pamiłavańnie ŭ Łukašenki.
U haračy pieradvybarčy čas Kačanava aktyŭna jeździła pa krainie i navat sprabavała sustrecca z pradstaŭnikami apazicyi. Ale kanstruktyŭnaj razmovy nie vyjšła — čynoŭnica paŭtarała zajezdžanyja naratyvy ŭłady pra stabilnaść i zapałochvańni, pra alternatyŭnych kandydataŭ, jakija nibyta chočuć razvalić krainu.
Ź pierachodam u Saviet respubliki prysutnaść i ŭpłyŭ Kačanavaj nikolki nie źmienšyŭsia, jana pa-raniejšamu prysutničaje na klučavych mierapryjemstvach, praciahvaje tury pa krainie z prahramaj u abaronu Łukašenki.
Niahledziačy na takuju blizkaść da naroda, mienavita z Kačanavaj źviazvajuć mnohija reputacyjnyja pravały Łukašenki, najpierš u palitycy pa baraćbie z karanavirusam. Nie padkazać u patrebny momant, jak havaryć ź ludźmi, jakaja situacyja ŭ krainie nasamreč z zachvorvańniem i jak narod reahuje na zajavy pra toje, što virus možna lačyć u łaźni i harełkaj — heta zadača, jakaja z treskam pravalenaja, i nie tolki pres-sakratarom Natallaj Ejsmant.
Ale ŭ čym Natalli Kačanavaj nasamreč niama roŭnych — u kamplimientach, jakija jana ščodra adsypaje Łukašenku: «Samy hałoŭny prykład dla nas — heta naš prezident. Ja ŭvieś čas dziŭlusia i dziŭlusia. I na chakiei, kali ja prysutničała na matčach, ciapier voś na Kaladnym turniry … I jon mianie ŭvieś čas dzivić. Svajoj fizičnaj formaj. Tamu što čałaviek pavinien być zdarovym: i duchoŭna, i cialesna…
U niekatorych momantach u mianie navat ślozy vystupali na vačach, tamu što ja adčuvała ščyraść hetaha čałavieka… Ja baču, nakolki mudryja rašeńni ŭ kiraŭnika našaj dziaržavy, nakolki ŭvohule taja palityka, jakaja pravodzicca ŭ našaj krainie, absalutna pravilnaja i vyvieranaja».
I choć imia Kačanavaj hučyć siarod mahčymych pierajemnikaŭ (adzin z asnoŭnych punktaŭ — łajalnaść — jana dakładna harantuje), uličvajučy seksisckija pohlady Łukašenki, składana ŭjavić, što jon pahodzicca z takoj kandydaturaj.
Voś što jon kazaŭ na hety kont: «Natalla Ivanaŭna, za ciabie taksama nie prahałasavali b, choć ty vopytnaja ŭžo, hatovy prezident. U nas Kanstytucyja nie pad žančynu. I ŭ nas hramadstva nie saśpieła dla taho, kab hałasavać za žančynu. Tamu što ŭ nas pa Kanstytucyi prezident vałodaje mocnaj uładaj. U nas prezident — nie Litva. Tam była Dala Hrybaŭskajte, pryjšła, paŭśmichalisia, pasiadzieła i pajšła. Ni za što nie adkazvaje, tamu što tam parłamienckaja respublika. U nas — nie. Prezidentam budzie mužyk, ja ŭ hetym absalutna pierakanany».
Dypłamat, jakoha naŭrad ci zaćvierdzić Rasija
Prafiesijny dypłamat Uładzimir Makiej sprabavaŭ uvajści ŭ historyju jak budaŭnik mastoŭ pamiž Biełaruśsiu i Zachadam.
Uładzimir Makiej
U 2020-m mnohija čakali ad jaho, što jon padtrymaje žadańnie narodaŭ da pieramienaŭ — Makiej časta źjaŭlaŭsia na publicy ŭ ampłua demakratyčnaha palityka (choć jamu i pryhadvali zajavy paśla razhonu Płoščy-2010, kali jon zajmaŭ pasadu kiraŭnika Administracyi Łukašenki). Jon padtrymlivaŭ biełaruskuju movu i kulturu, tak aktyŭna razdavaŭ intervju, što naviersie jaho prasili prytarmazić — u Administracyi nie lubiać, kali pra inšych čynoŭnikaŭ zhadvajuć zanadta časta.
Reakcyja Makieja na nadziei biełarusaŭ nahadvała adkaz futbalista Aršavina rasčaravanym fanatam: «Vašyja čakańni — vašyja prablemy». Spačatku aściarožna, a paśla ŭsio bolš ahresiŭna ministr staŭ abaznačać viernaść Łukašenku.
Adna z samych emacyjnych zajavaŭ była ŭ abaronu małodšaha syna, jakomu, pa słovach Makieja, dasyłali niepryjemnyja kamientary ŭ sacsietkach. Čynoŭnik paabiacaŭ pierahryźci horła za ślozy 11-hadovaha chłopčyka. I kaniečnie, u historyju biełaruskaj dypłamatyi ŭvojduć emacyjnyja pres-relizy z abvinavačvańniami ŭ bok ES i ZŠA, nivodny taki opus nie moh źjavicca biez zhody Makieja.
Asnoŭny arhumient ministra zamiežnych spravaŭ u abaronu isnujučaj ułady — harantyja niezaležnaści Biełarusi. Pry hetym apošnim časam jamu ŭsio čaściej davodzicca pierakonvać usich navokał, što naš samy nadziejny partnior — heta Rasija.
Masavaha adtoku dypłamataŭ paśla vybaraŭ nie adbyłosia, ale kožny sychod byŭ hučnym, u tym liku kali ministerstva pakinuŭ i starejšy syn Makieja, choć napramuju z vybarami adstaŭku nie źviazvali. Paźniej ža jon raskrytykavaŭ skandalnuju zajavu MZS adnosna palityki ZŠA.
Ale samaja vialikaja paraza dla Makieja — aktyŭnaja pazicyja Paŭła Łatuški, jaki ŭ apošnija hady choć i byŭ kiraŭnikom teatra, ale pabudavaŭ karjeru dypłamata i rekamiendavaŭ jaho pierad Łukašenkam Uładzimir Makiej. A svajo kresła ministr usio jašče ŭtrymlivaje.
Na apošniaj pres-kanfierencyi Łukašenka nibyta publična supakoiŭ jaho, što ŭ pravinach Łatuški jon nievinavaty.
Sproba damovicca z Zachadam, ale ciapier užo kułuarna i sa skrypam, pa-raniejšamu zastajecca misijaj ministra zamiežnych spravaŭ. Jon publična papiaredžvaŭ, što ŭzmacnieńnie sankcyj pryviadzie da taho, što ŭ Biełarusi pierastanie isnavać hramadzianskaja supolnaść. I jak paćvierdžańnie svajoj łajalnaści dadavaŭ, što «ŭ hetaj situacyi heta budzie abhruntavanym».
Makieja časta nazyvajuć mahčymym pierajemnikam Łukašenki, adnak jahonuju prazachodniuju pazicyju zaŭsiody krytykavali ŭ Rasii, tamu naŭrad ci Kreml pahadziŭsia b z takoj rakiroŭkaj. Pasadu ministra zamiežnych spravaŭ jon zajmaje ŭžo dziaviaty hod. U adnym ź intervju jon padkreśliŭ, što ŭ svajoj karjery «nikoli nie zajmaŭsia aparatnymi hulniami».
Premjer, jakoha aśvistali rabočyja
Samym vierahodnym pierajemnikam apošnim časam nazyvajuć dziejučaha premjer-ministra Biełarusi Ramana Hałoŭčanku. Jahonaja kandydatura kudy bolš zadavolić i Kreml (Hałoŭčanka skončyŭ Maskoŭski dziaržaŭny instytut mižnarodnych adnosin MZS RF, vyznačajecca mocnymi prarasijskimi zajavami), i siłavikoŭ, ź jakimi jon ščylna pracavaŭ u Saviecie biaśpieki, Hienieralnaj prakuratury i vajenna-pramysłovym kamitecie, i ekanamičny i pramysłovy błok (Hałoŭčanka šmat hod pracavaŭ dypłamatam, taksama zajmaŭsia pastaŭkami zbroi za miažu). Da taho ž, Hałoŭčanku nazyvajuć prateže Viktara Šejmana, adnaho z samych nadziejnych paplečnikaŭ Łukašenki.
Raman Hałoŭčanka
Adna z pakazalnych historyj, jak premjer-ministr razmaŭlaŭ u žniŭni 2020-ha z rabočymi Traktarnaha zavoda, jakija ŭzbuntavali suprać biaźmiežža ŭłady. Vopytny dypłamat pakazaŭ poŭnuju niazdolnaść spakojna i ŭzvažana havaryć z prostymi ludźmi. Na kankretnyja pytańni jon adkazvaŭ zavučanyja frazy pra toje, što ŭ 90-ja ŭsio było horš. Čym heta skončyłasia? Premjera prosta aśvistali.
Adnak jahonyja dypłamatyčnyja i vajskovyja pośpiechi ŭ Arabskim śviecie i z Kitajem dazvalajuć Łukašenku nie sumniavacca ŭ nadziejnaści takoha kandydata. Apošni hod na pasadzie premjera, jakimi b surjoznymi nie byli pretenzii da Łukašenki, nie źmienšyŭ łajalnaści Hałoŭčanki.
Adnak pytańnie, ci budzie ŭvohule ŭ Łukašenki pierajemnik, tak i zastajecca adkrytym. Heta dla jaho, jak my čuli, «samaje składanaje pytańnie».
