Natallu Chierše, hramadzianku Šviejcaryi, pieraviali ŭ mužčynskuju mahiloŭskuju turmu z homielskaj žanočaj kałonii 27 vieraśnia.
Natalla była asudžanaja na dva z pałovaj hady kałonii. Hod tamu, 19 vieraśnia 2020 hoda, jana na žanočym maršy sarvała bałakłavu z amapaŭca.
24 vieraśnia sud Čyhunačnaha rajona Homiela razhledzieŭ spravu «Ab pieravodzie ŭ papraŭčuju ŭstanovu inšaha typu i źmianieńni ŭmoŭ režymu» Natalli Chierše. Stała viadoma, što jaje pieravodziać u turmu. Chacia žanočych turmaŭ u krainie niama.
Brat palitźniavolenaj Hienadź Kaśjan skazaŭ, što stavicca da takoha rašeńnia suda jak da katavańnia:«Absalutna niezakonnaje rašeńnie i katavańnie ŭ vyhladzie ŭmovaŭ utrymańnia. To-bok začyniajuć u kletku, chočuć takim čynam dasiahnuć svajoj mety: kab napisała pamiłavańnie ci pryznała svaju vinu».
Viadoma, što Natallu Chierše trojčy ŭhavorvali napisać zajavu ab pamiłavańni na imia Łukašenki, ale jana kateharyčna admoviłasia rabić heta. Svajoj viny jana nie pryznaje.
Padčas źniavoleńnia Chierše ŭžo była ŭ štrafnym izalatary (ŠYZA) i pamiaškańni kamiernaha typu (PKT) za admovu šyć formu dla siłavikoŭ.
A naprykancy vieraśnia stała viadoma, što hramadzianski muž Natalli razarvaŭ ź joju stasunki.
«U Šviejcaryi ŭ jaje było cudoŭnaje žyćcio, ale jana ličyła, što ciapier musić być na radzimie». Chto takaja Natalla Chierše, jakuju pasadzili za sarvanuju bałakłavu
