Ja dumaju, što KDB treba demanstravać aktyŭnaść, i jany čaplajucca za kožnuju nahodu. Pakolki realnaj zmovy i sprobaŭ pravieści dziaržpieravarot niama, jany ich vynachodziać. Vidavočna, jany ŭčapilisia za hetuju nahodu ź pieradstrajkavym stanam, kab raskrucić novuju špijonskuju zmovu. Tut jany abvinavačvajuć rabočych u tym, što tyja nibyta chacieli pieradavać sakrety na Zachad svaim kurataram.
Čamu heta robiać specsłužby? Tamu što heta stała ich pracaj — vyrablać takija voś raskrytyja sakrety, zmovy i aperacyi zachodnich vorahaŭ. Nia ŭpeŭnieny, što heta mieła pad saboj niejkija realnyja padstavy, tamu što ahulnaje ŭsprymańnie pieradstrajkavaha stanu było vielmi skieptyčnaje, bo nichto nia bačyć pieradumovaŭ na biełaruskich pradpryjemstvach dla taho, kab adbyłasia novaja chvala zabastovak.
Niama nijakich prykmietaŭ, kab zabastoŭka ciapier była na paradku dnia. Tych, chto byŭ da hetaha schilny, u žniŭni-vieraśni zvolnili ci navat vycieśnili z krainy. Adpaviedna, aktyŭ vielmi paradzieŭ za hety čas. Ź inšaha boku, ja ŭjaŭlaju dźvie patencyjnyja padstavy dla strajku: ekanamičnuju i palityčnuju. Palityčnaja — kali ludzi pratestujuć suprać niejkaj aburalnaj padziei, što było ŭ 2020 hodzie: katavańni, falsyfikacyja vybaraŭ. Tady ludzi vyjšli na niekatorych zavodach na pratesty i strajki. Ciapier ža padobnych pryčyn niama, tryhieraŭ dla strajkavaha ruchu ja nia baču.
Ź inšaha boku, ekanamična siońnia niekatoryja biełaruskija pradpryjemstvy znachodziacca ŭ surjoznym stanie, ale pavalna pa krainie my nia bačym katastrafičnaha abvału, kryzisu, jaki byŭ by dastatkovym, kab ludzi pakidali svaje instrumenty, pavychodzili z cechaŭ, ryzyknuli svaim dabrabytam i pajšli pratestavać. Tamu pakul abo toje, abo inšaje nia źmienicca, ja nia baču pieradumoŭ da zdyryhavanaha z-za biełaruskaj dyjaspary strajku.
Zvyčajna, kali arhanizacyju pryznajuć ekstremisckaj, ludzi bajacca mieć ź joju spravu. Dakładniej, takaja zadumka. Ja nia viedaju, nakolki chto sapraŭdy hetaha baicca. Zdajecca, u vypadku z «Rabočym rucham» ryzyki jak byli vielizarnyja da pryznańnia jaho ekstremisckim, tak i zastalisia. Uvohule, ułady ličać, što, pryznaŭšy niešta ekstremisckim, jany nia toje kab heta zabaranili, a chutčej praviali sanitarny kantrol. Ja nia dumaju, što heta maje niejkaje značeńnie, kali asnoŭny aktyŭ «Rabočaha ruchu» i tak aryštavany.
