Razhlad hramadzianskaj spravy Julii Rafałovič suprać redakcyi rajonnaj haziety «Kobrynski vieśnik» pačaŭsia 27 žniŭnia. Nahadajem, 21 krasavika na sajcie vkobrine.by i 24 krasavika ŭ papiarovym vydańni byŭ apublikavany artykuł «Kali zabytaja klatva Hipakrata…». Aŭtar publikacyi paviedamiŭ, što ŭčastkovaja doktarka «z palityčnych matyvaŭ naadrez admoviłasia… akazvać dapamohu dziciaci supracoŭnika RAUS».
Adnak pravaachoŭnyja orhany nie znajšli ŭ dziejańniach doktarki składu złačynstva, kab raspačać suprać jaje kryminalnuju spravu «pa fakcie nieakazańnia miedyčnaj dapamohi chvoraj asobie biez uvažlivych pryčynaŭ».
U intervju «Novamu Času» Julija Rafałovič zaŭvažyła, što artykuł u «Kobrynskim vieśniku» vyklikaŭ u jaje abureńnie. «Mienavita tak ja reahavała na abvinavačvańnie aŭtarki publikacyi, što ŭbačyła lutaha voraha ŭ chvorym dziciaci, jakomu była patrebna terminovaja miedyčnaja dapamoha», — padkreśliła spadarynia Julija.
Na jaje mierkavańnie, aŭtarka artykuła hrebuje normami žurnalisckaj etyki, kali tak pierakručvaje toj fakt, što biez tałona na pryjom jana admoviłasia vydać daviedku ab stanie zdaroŭja dziciaci dla zaniatkaŭ u tancavalnym hurtku.
Nahadajem, paśla adkrytaha vystupu Julii Rafałovič suprać falsifikacyi vynikaŭ prezidenckich vybaraŭ i hvałtu siłavikoŭ dziciačaja doktarka pieražyła sudy, štrafy, źniavoleńnie, zvalnieńnie z pracy i źnievažalnuju publikacyju ŭ haziecie. Aproč taho, pieraśled spadaryni Julii vyjaviŭsia pahrozami zaviadzieńnia na jaje kryminalnaj spravy, prablemami mužu na pracy, admovami synu, jaki vučycca ŭ Polščy, prava pierasiekčy miažu dy viarnucca na radzimu. 10 žniŭnia 2020 hoda ŭ Kobrynie syn doktarki byŭ zatrymany, źbity i asudžany na 15 sutak.
Va ŭsich hetych zachadach była praihnaravanaja 20-hadovaja biezdakornaja praca Julii Rafałovič, partret jakoj upryhožvaŭ Došku honaru balnicy, ščyry kłopat piedyjatra pra maleńkich kobryncaŭ u luby čas sutak, a nie tolki ŭ pracoŭny. Była pakinutaja biez uvahi i prośba hramadskaści da hałoŭnaha doktara balnicy Mikoły Braško nie zvalniać šanoŭnuju lekarku, choć pad takim zvarotam byli sabranyja bolš za 800 podpisaŭ.
