«Vysokaja cana na haz isnuje tolki pa spotavych kantraktach, heta nie doŭhaterminovyja kantrakty, a toje, što pradajecca na biržy. Cana raście tamu, što Jeŭrapiejskaja ekanomika adnaŭlajecca paśla pandemii, — kaža ekanamičny ahladalnik Taćciana Manionak. —
Taksama tamu, što letaś jeŭrapiejcy va ŭmovach tannaha hazu raźličvali, što cana budzie dalej źnižacca, i nie zapoŭnili jak śled svaje schoviščy — ciapier jany zapoŭnieny prykładna na 70%. Taksama amierykancy admovilisia ad pastavak zvadkavanaha hazu, im stała vyhadniej pradavać jaho na azijackija rynki, prahnazujecca taksama chałodnaja zima — heta ŭsio adyhrała rolu».
Ale kali takija vysokija košty na haz, to čamu «Hazpram» źnižaje pastaŭki praz hazapravod «Jamał-Jeŭropa»? Rasijskamu hihantu ž vyhadna pastaŭlać haz praź Biełaruś?
«Hazpramu» vyhadna pastaŭlać praź Biełaruś, jak by tam ni było. Vyhladaje, što heta robicca dla taho, kab vyrašyć prablemy z zapuskam «Paŭnočnaha patoku — 2», — kaža Manionak. — Bo choć trubapravod dabudavany i ŭviedzieny ŭ ekspłuatacyju, jon usio jašče nie pracuje praź biurakratyčnyja momanty, ruskim chaciełasia b, kab Jeŭropa hetyja momanty vyrašyła chutčej, i «Paŭnočny patok — 2» zapuściŭsia i byŭ całkam zahružany. Pastaŭki pa doŭhaterminovych kantraktach jak išli cieraź Biełaruś, tak i iduć.
Što my hublajem ad admovy reziervavańnia mahutnaściaŭ «Jamał-Jeŭropy». Taćciana Manionak kaža, što adnosna ŭsiaho biudžetu krainy heta nievialikija hrošy.
«Heta nie vielmi vialikija hrošy adnosna ŭsiaho biudžetu, tamu što truba pradadziena «Hazpramu», jon płacić tolki padatki. Darečy, ni ŭ adnoj krainie Jeŭropy bolš «Hazpram» nie maje svajoj truby, tolki na terytoryi Biełarusi. Letaś jany zapłacili kala 250 miljonaŭ dalaraŭ padatkaŭ, ale treba hladzieć na heta ŭsio pa vynikach hoda, bo admova ad dadatkovaha reziervavańnia mahutnaściaŭ pačałasia nie z pačatku hoda, a ź leta», — adznačaje ekśpiert.
