«Ja pra heta spačatku navat nie viedaŭ, vypadkova daviedaŭsia, što niekatoryja biełaruskija advakaty ŭstupajuć u rasijskuju kalehiju, kab pracavać u Rasii. Adroźnieńnie ŭ tym, što ŭ Biełarusi advakackaja licenzija vydajecca tolki hramadzianam respubliki, a ŭ RF nie abaviazkova być hramadzianinam Rasii, hałoŭnaje pastajanna ci časova pražyvać na terytoryi.
Nie patrebny navat vid na žycharstva, dastatkova časovaj rehistracyi, — kaža Hašynski. —Niuansy ŭ tym, što choć u nas i Sajuznaja dziaržava, ale padychod da advakatury ŭ Biełarusi i Rasii zusim rozny.
U Rasii ŭvajści ŭ prafiesiju praściej, tam niama dziaržaŭnaj licenzii. Tak i pavinna być, ja liču, prafiesija musić być adkrytaj. Kab stać advakatam u Rasii treba zdać kvalifikacyjny ekzamien, jaki składajecca ź dźviuch častak. Heta niaprosty test na kampjutary i vusny ekzamien, dzie ŭ biletach try pytańni i praktyčnaje zadańnie. Na padrychtoŭku dajecca 45 chvilin, nielha rabić nivodnaj pamyłki.
Hetyja ekzamieny ja ŭžo zdaŭ, ciapier pryniaŭ prysiahu. Heta ŭračystaja pracedura, pravuju ruku prykładvaješ da serca, začytvaješ, što budzieš słužyć u imia pravoŭ, kirujučysia Kanstytucyjaj i zakonam ab advakatury.
Paśla prysiahi ŭručajuć značok advakata i rašeńnie ab prysvajeńni statusu. Zatym farmalnaja pracedura — padača dakumientaŭ u Miniust. I ciaham troch miesiacaŭ advakat musić vyznačycca dzie i jak jon budzie pracavać: u kalehii, biuro, jurkansultacyi».
Pa słovach Antona Hašynskaha, status rasijskaha advakata dazvalaje jamu pracu ŭ Biełarusi:
«Siońnia isnuje šmat pahadnieńniaŭ pamiž RF i Biełaruśsiu, pra roŭnyja pravy hramadzian i pra dopusk na rynak haspadarčych subjektaŭ. Adpaviedna, užo byli precedenty pracy rasijskich advakataŭ u Biełarusi.
Uvohule, ciapierašniaja licenzija daje pracavać z rasijanami, jakija znachodziacca tut u źniavoleńni i pad śledstvam, udzielničać u spravach ab ekstradycyi. Bo rasijskija advakaty nie zachodziać na biełaruski rynak uvohule prosta tamu, što nie ŭsprymajuć jaho jak rynak. Biełaruś nadta maleńkaja i nadta hanarystaja kraina, skažam tak.
Tak, mohuć u niekatorych momantach i admović u pracy advakata z rasijskaj licenzijaj, nie puskać u SIZA ci nie dapuskać udzielničać u sudovych pasiadžeńniach, tut u Biełarusi prymianiajecca čysta indyvidualny padychod. Buduć admaŭlać — budziem abskardžvać, nie baču prablem.
Nu i plus ciapier dla mianie adkryty rasijski rynak pracy, płanuju aktyŭna pracavać i na terytoryi RF.
Ciapier šmat chto ź biełaruskich kaleh daviedvajecca pra takuju mahčymaść i źviartajecca da mianie z pytańniami. Ja z radaściu dapamahaju.
I jašče taki momant — atrymańnie statusu advakata ŭ Rasii heta ž mahčymaść praciahvać pracu nie tolki dla biełaruskich advakataŭ, pazbaŭlenych licenzii. Heta mahčymaść pracy i dla byłych sudździaŭ, rabotnikaŭ pravaachoŭnych orhanaŭ, mahčymaść stać prafiesijnymi jurystami.
Akramia taho ja płanuju atrymać status advakata i va Ukrainie. Heta dazvolić mnie pracavać tam lehalna, u tym liku i abaraniać biełarusaŭ, jakich ciapier tam šmat. Akramia taho, kali Ukraina budzie praciahvać jeŭraintehracyju, to paśla status ukrainskaha advakata moža dać mahčymaść absalutna lehalnaj pracy i ŭ Jeŭropie».
Hašynski ŭžo havaryŭ z maci hramadzianina RF Jahora Dudnikava, jakoha buduć sudzić za ahučku rolikaŭ dla telehram-kanała «OHSB».
«Jana z zadavalnieńniem hatovaja naniać mianie dla praciahu sumiesnaj pracy. Havaryŭ i z baćkami Safii Sapiehi, jany taksama nie suprać», — kaža advakat.
Hašynski nie baicca, što ŭ Rasii jaho taksama pazbaviać licenzii za ŭdzieł «nie ŭ tych» spravach.
«U Rasii zusim inšaja situacyja. Tam vyklučeńnie z Pałaty advakataŭ zaležyć nie ad dziaržavy, a tolki ad kamisii samoj Pałaty. Miniust moža napisać tudy pradstaŭleńnie, ale ŭ Pałacie Miniustu ŭ hetym mohuć admović. To-bok, Pałata advakataŭ dastatkova niezaležnaja ad dziaržavy ŭ paraŭnańni ź Biełaruśsiu. Jak i musić być, bo inakš advakatura stračvaje svaje pryncypy, hałoŭny ź jakich niezaležnaść, — kaža Hašynski. —
I siońnia ŭ Rasii isnuje vielmi vialikaja salidarnaść siarod advakataŭ. Ich tam bolš za 50 tysiač — heta ŭžo maleńkaja armija. I jany ščylna abaraniajuć adno adnaho, kab nie stvarać precedent. Byvajuć spravy, naprykład, kali na advakata zavodziać kryminałku, za razhałošvańnie tajamnicy śledstva, dapuścim.
I ŭ adnym z takich vypadkaŭ u Rasii advakata abaraniali až 23 jaho kalehi, pryčym absalutna biaspłatna. I dabivalisia apraŭdalnych prysudaŭ. Bo jany razumiejuć, što biez salidarnaści advakatura prosta źniknie».
