«U dački pałova kłasa na daviedkach. Chvarejuć dzieci i baćki, šmat — na kavid, — raspaviadaje Natalla ź Minska. — Spytała ŭ našaha piedahoha, ci płanuje škoła pieravodzić dziaciej na dystancyjnaje navučańnie? Ale taja adkazała, što pra heta na schodach z kiraŭnictvam pakul ni słova.

Vyrašyła nie čakać, pakul epidabstanoŭka pahoršycca i pajšła da kiraŭnictva škoły, kab udakładnić, jak pa ŭsich praviłach mahu pieravieści dačku na dystancyjnaje navučańnie. Ale jak tolki dyrektarka škoły pra heta pačuła, spačatku adrazu stała pradjaŭlać da mianie pretenzii.

A kali ja skazała pra toje, što jak zakonny pradstaŭnik svajho dzicionka ja sama mahu abirać formu jaho navučańnia, jana pačała pahražać mnie sacyjalna niebiaśpiečnym stanoviščam. Heta naohuł zakonna?»

Nahadajem, da hetaha pra baćkoŭ, jakija chočuć pieravodzić dziaciej na chatniaje navučańnie vykazvałasia Hienieralnaja prakuratura. Viedamstva papiaredziła, što dziaržava moža pryniać peŭnyja miery da baćkoŭ, jakija pieraškadžajuć dziciaci atrymlivać ahulnuju bazavuju adukacyju ŭ luboj formie.

«Z baćkami ŭ takich vypadkach pravodziacca tłumačalnyja hutarki, — dadała Hienprakuratura. — Kali situacyja nie mianiajecca, arhanizujecca abarona dziciaci ŭ miežach pravavoha miechanizmu papiaredžańnia siamiejnaha niedabrabytu. 

Darečy, pieraškoda baćkami atrymańniu dziećmi ahulnaj siaredniaj adukacyi ŭ luboj jaho formie — adzin z kryteraŭ sacyjalna niebiaśpiečnaha stanovišča zhodna z dadatkam da pastanovy Savieta ministraŭ ad 15 studzienia 2019 h. № 22 «Ab pryznańni dziaciej, jakija znachodziacca ŭ sacyjalna niebiaśpiečnym stanoviščy».

«Ad takich zajaŭ na hałavie ŭstajuć vałasy, — ličyć Natalla. — Atrymlivajecca, kali na mianie paskardzicca dyrektarka škoły z-za taho, što ja zaścierahła svajho dzicionka i pakinuła na čas pandemii doma, u mianie jaho jašče mohuć jaho i zabrać?»

Zakanadaŭstva nie praduhledžvaje dystancyjnaje navučańnie

Asnoŭny «adukacyjny» dakumient krainy — Kodeks ab adukacyi. Ź minułaha hoda surjoznych źmien u jaho źmieście nie adbyłosia. Heta značyć, što takaja katehoryja jak dystancyjnaje navučańnie ŭ Biełarusi dahetul zakonam nie praduhledžana.

Adzinym bolš-mienš prydatnym varyjantam u dadzienaj situacyi, pa sutnaści, moža zastacca pieravod dzicia na chatniaje navučańnie. Ale heta dazvolena nie ŭsim.

U artykule 167 kodeksa havorycca pra toje, što ahulnuju adukacyju pa takim płanie mohuć atrymlivać adoranyja i talenavityja vučni, a taksama tyja, chto nie moža naviedvać škołu z-za važkich pryčyn. Prytym śpisu takich pryčyn niama ni ŭ adnym dakumiencie.

Kožny vypadak razhladajecca administracyjaj škoły indyvidualna, a apošniaje słova zastajecca za kiraŭnictvam škoły. Pra heta napisana ŭ artykule 70 «Pałažeńnia ab ustanovie ahulnaj siaredniaj adukacyi».

Idziem dalej. Karanavirus aficyjna ŭniesieny Ministerstvam achovy zdaroŭja ŭ śpis niebiaśpiečnych dla žyćcia zachvorvańniaŭ, a pa zakonie dzicia maje prava na adukacyju. Heta značyć, što dziaržava abaviazana zabiaśpiečyć dzieciam biaśpiečnyja ŭmovy navučańnia padčas pandemii.

I ŭ dadzienym vypadku havorka vidavočna pavinna iści nie pra chatniaje navučańnie, padčas jakoha za adukacyju adkazvajuć baćki, a mienavita pra dystancyjnaje navučańnie, jakoje ažyćciaŭlajecca pad kantrolem nastaŭnikaŭ i škoły.

Ale! Viartajemsia da taho, z čaho pačynali: dystancyjnaja adukacyja ŭ našaj krainie nie praduhledžana zakonam, a karanavirus nie źjaŭlajecca važkaj pryčynaj, niahledziačy na aficyjnyja dakumienty Ministerstva achovy zdaroŭja. Vidavočnaja zakanadaŭčaja niedaskanałaść.

Kamientar jurysta: «Siamja i zakonnyja pradstaŭniki dziciaci — u pryjarytecie»

«Jość «Kodeks ab šlubie i siamji». Pa im siamja i zakonnyja pradstaŭniki dziciaci — u pryjarytecie, — kamientuje juryst Alena Sałaŭjova. — Jany majuć prava vybirać mietady, formy vychavańnia i adukacyi svajho dzicia. Žyćcio i zdaroŭje dziciaci — hałoŭny pryjarytet.

Razvažajem tak: u dziciaci jość prava na žyćcio, zdaroŭje i prava na adukacyju. U dadzienaj situacyi žyćcio i zdaroŭje važniejšyja za adukacyju.

Heta značyć, što rašeńnie ab praciahłaści karancinu kožny z baćkoŭ moža prymać indyvidualna. A tamu dyktavać im niejki kankretny termin mahčymaj adsutnaści ŭ škole niezakonna».

«Dla administracyi škoły možna napisać apaviaščeńnie ab tym, što vy pakidajecie dzicia doma, i zarehistravać jaho ŭ kancylaryi.

Tekst moža być takim: «My, baćki takoha-ta vučnia takoha-ta kłasa, paviedamlajem, što, zhodna z «Kodeksam Respubliki Biełaruś ab šlubie i siamji», majem prava na pryjarytetnyja rašeńni ŭ dačynieńni da našych dziaciej. Niesučy adkaznaść za ich žyćcio i zdaroŭje, pakidajem ich doma z takoj-ta pa takuju datu na karancin, tamu što ličym, što epidemijałahičnaja situacyja ŭ Biełarusi ciapier niespryjalnaja. Navučalnuju prahramu abiacajemsia asvoić samastojna. Data i podpis».

Čytajcie taksama:

«Za dva tydni vieraśnia pryniała stolki ž pacyjentaŭ, kolki ŭ studzieni. I heta jašče nie pik». Miedyki i pacyjenty pra čaćviortuju chvalu kavidu

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?