DIOCESE OF SOLSONA
Adnak ciapier u ispanskich ŚMI źjaviłasia infarmacyja ab tym, što były biskup zakachaŭsia ŭ piśmieńnicu, jakaja piša eratyčnyja ramany z demaničnym uchiłam, piša Bi-bi-si.
A jašče niadaŭna padobnaja mietamarfoza zdałasia b ludziam, jakija viedali Naviela, niejmaviernaj. U 2010 hodzie ŭ horadzie Salsona ŭ Katałonii 41-hadovy Chaŭjer Naviel staŭ samym maładym u krainie biskupam.
Jon vystupaŭ u padtrymku tak zvanaj «kanviersijnaj terapii» — navukova nie abhruntavanaj mietodyki pa źmienie seksualnaj aryjentacyi abo hiendarnaj identyčnaści čałavieka, jakuju členy ŁHBT-supolnaści nazyvajuć žorstkaj i biesčałaviečnaj,
a taksama zajmaŭsia vyhnańniem demanaŭ.
U šerahach katalickaj carkvy Ispanii ŭ im bačyli novuju zorku. Tym bolšym było ździŭleńnie, kali jon, z adabreńnia Vatykana, źniaŭ ź siabie san. Pa słovach samoha Naviela, hetamu papiaredničali šmatlikija sustrečy z pradstaŭnikami Vatykana i navat z samim Papam Rymskim.
Chaŭjer Naviel zaŭsiody byŭ supiarečlivaj fihuraj. Jon vykazvaŭ tradycyjnyja pohlady na aborty, ale jaho surovaja nieciarpimaść da homaseksualnaści i haračaje adstojvańnie katałonskaj niezaležnaści byli niezvyčajnymi dla śviatara takoha ŭzroŭniu.
I ŭsio ž raspaŭsiudžanaja vydańniem Religión Digital navina ab tym, što biskup zakachaŭsia ŭ Silviju Kabajoł, psichołaha i piśmieńnicu eratyčnych ramanaŭ, u jakoj za śpinaj da taho ž byŭ razvod, vyklikała efiekt bomby.
Kalehi biskupa zajavili žurnalistam, što, miarkujučy pa ŭsim, demany ŭsialilisia ŭ samoha Naviela, a adzin ź ich zaŭvažyŭ: «Heta nie prablema celibatu, heta prablema zaražeńnia».
Taja ž krynica śćviardžała, što papa Francišak asabista ŭhavorvaŭ Naviela prajści praceduru vyhnańnia demanaŭ, kab vyzvalić svoj duch, ale biskup admoviŭsia.
Ułasna, mienavita praha hłybiej vyvučyć śviet demanaŭ (jakich jon tak metanakiravana vyhaniaŭ, niahledziačy na krytyčnaje staŭleńnie da hetaha rytuału ŭ katalickaj carkvie) i źviała jaho ź Silvijaj Kabajoł, jakaja ličyłasia ekśpiertam pa sataniźmie.
Silvija na fota sprava, elcomercio.es
Siarod tvoraŭ Kabajoł možna znajści «Piekła jurlivaści Haŭryiła» i tryłohiju «Amniezija». U pradmovie da adnoj ź jaje knih čytačam abiacajuć zajmalnaje padarožža ŭ śviet sadyzmu, varjactva i jurlivaści i zaadno baraćbu dabra sa złom.
Ni sam były ŭžo ciapier biskup, ni jaho kachanaja na paviedamleńnie Religión Digital nie adreahavali, choć vydańnie nastojliva cytuje Chaŭjera: «Ja zakachaŭsia i chaču zrabić jak pavinna». A ŭ byłoj jeparchii biskupa padkreślili, što paćvierdžańnie abo admaŭleńnie hetaj infarmacyi — asabistaja sprava jaho i tolki jaho.
Vypadak Chaŭjera Naviela znoŭ padniaŭ pytańnie ab celibacie ŭ kaściole. Raniej u intervju biskup pryznavaŭsia, što ŭ junactvie byŭ zakachany ŭ 18-hadovuju dziaŭčynu, a paźniej navat mieŭ namier ažanicca i zavieści dziaciej, ale potym usio ž vybraŭ inšy šlach.
Ciapier jamu treba budzie znoŭ šukać siabie.
Na sajcie Religión Digital havorycca, što były biskup šukaje pracu ahranoma ŭ rajonie Barsiełony.
