Schiema dazvalała pastaŭščykam aščadžać na mytach, nie stavić tavary na bałans. Heta stvarała ŭmovy, kali asobnyja kampanii zavalvali rasijski rynak šerymi tavarami, dempinhujučy i razdražniajučy sumlennych rasijskich kamiersantaŭ.
Jak viadoma «Našaj Nivie», Łukašenku daviałosia admianić z 31 žniŭnia hety ŭkaz u vyniku cisku z boku Rasii.
Krynicy paviedamlajuć, što paśla admieny ŭkaza «Biełmytniaservis» moža zhubić u ahulnych abarotach da 80% — pastaŭščykam stanie niavyhadna supracoŭničać z kampanijaj.
«Rasijskija kampanii mahli ŭvozić tavary praź Biełaruś, pryciahvajučy miascovych mytnych apierataraŭ, naprykład «Biełmytniaservis», što dazvalała im płacić PDV nie ŭ momant uvozu, a paźniej (pavodle rasijskaha zakanadaŭstva — nie paźniej za 20-ha čysła miesiaca, u jaki kampanija pryniała tavar na ŭlik), — tłumačyła RBK prezident rasijskaha mytnaha brokiera «KVT Servis» Julija Šlenskaja. — Dziakujučy hetamu kamiersanty mahli adterminavać momant, kali daviadziecca źniać srodki z abarotu na vypłatu padatku».
Pa słovach ekśpierta, raniej afarmleńnie na miažy Biełarusi było papularnym siarod rasijskich kampanij, «ale ciapier schiema budzie niemahčymaja». Šlenskaja ličyć, što ad «admieny «biełaruskaj» schiemy pavinny vyjhrać aficyjnyja kampanii-pasiaredniki, jakija dapamahajuć uvozić tavary ŭ Rasiju».
Hiendyrektar rasijskaj kampanii «Univiersalnyja hruzavyja rašeńni» Siarhiej Martjanaŭ prahnazuje, što paśla 31 žniŭnia kolkaść rasijskich kampanij, jakija ŭvozili tavary praź Biełaruś, upadzie da 70%.
«Heta była šeraja schiema, jakaja dazvalała kampanijam ekanomić na mytnych płaciažach, uvozić tavar cieniavym sposabam: jaho možna było nie stavić na bałans. Admiena hetaj ilhoty zrobić roŭnymi ŭmovy dla ŭsich udzielnikaŭ rynku», — cytuje Martjanava RBK.
Pry hetym rost cen u Rasii ŭ suviazi z admienaj «biełaruskaj» schiemy nie prahnazujuć.
