Uklučeńnie čynoŭnikaŭ u partyjny śpis jašče nie śviedčyć pra ich abaviazkovuju pracu ŭ rasijskim parłamiencie. U 2007-m «Adzinuju Rasiju» adnaasobna vioŭ na vybary Uładzimir Pucin, u 2011-m i 2016-m — Dźmitryj Miadźviedzieŭ. Sioleta śpis uznačalvajuć adrazu piaciora, ź ich dva palityka — ministr abarony, 66-hadovy Siarhiej Šajhu, i ministr zamiežnych spraŭ, 70-hadovy Siarhiej Łaŭroŭ.

Čamu mienavita jany? Uzrovień davieru da «Adzinaj Rasii» i ahułam da inšych čynoŭnikaŭ nie samy vysoki. Jak zahadzia pradkazvali krynicy rasijskaha vydańnia RBK, Miadźviedzieŭ nie trapiŭ u piaciorku z-za nizkaha ŭłasnaha rejtynhu. A voś

Šajhu i Łaŭroŭ dastatkova papularnyja. Pieršy stvaryŭ sabie reputacyju jašče padčas doŭhaj pracy na čale Ministerstva pa nadzvyčajnych situacyjach. Łaŭroŭ asacyjujecca z paśpiachovaj i «pieramožnaj» źniešniaj palitykaj.

Ale rasijski palittechnołah Stanisłaŭ Białkoŭski miarkuje, što paśla vybaraŭ Łaŭroŭ sydzie ŭ Dziaržaŭnuju Dumu abo ŭ Saviet Fiederacyi na pasadu pažyćciovaha sienatara. Darečy, kali RBK źviarnułasia ŭ MZS Rasii z prośbaj pra kamientar, ich pieraadrasavali ŭ «Adzinuju Rasiju» — krasamoŭny namiok pra toje, chto prymaje rašeńni.

Chto taki Łaŭroŭ?

Siarhiej Łaŭroŭ — prafiesijny dypłamat, jaki nikoli nie zajmaŭsia biahučaj palitykaj i nie ŭdzielničaŭ u vybarach.

Jon naradziŭsia ŭ 1950 hodzie ŭ Maskvie. Zachaplaŭsia dakładnymi navukami, źbiraŭsia pastupać u inžynierna-fizičny instytut. Ale maci, jakaja pracavała ŭ Ministerstvie źniešniaha handlu, pierakanała jaho pastupać u znakamity MHIMA, dzie rychtavali dypłamataŭ. Darečy, asnovy anhlijskaj movy Łaŭroŭ zakłaŭ jašče doma — i heta paspryjała jaho karjery.

Budučy ministr skončyŭ VNU z nastupnaj paznakaj u dypłomie: «refierent pa krainach Uschodu». Jon vučyŭ sinhalskuju movu — adnu z dvuch aficyjnych na vostravie Šry-Łanka. Nie samy prestyžny i pierśpiektyŭny vybar, kali kazać pra dalejšuju karjeru. Zatoje

paśla skančeńnia ŭniviersiteta Łaŭroŭ adrazu pajechaŭ za miažu — spačatku stažoram, a paśla ataše ŭ pasolstva hetaj krainy.

Raskazvali, što dypłamat zasumavaŭ na ekzatyčnym vostravie, i navat dumaŭ, ci nie pierajści jamu ŭ raźviedku. Ale sami raźviedčyki jaho adhavaryli. U 1976-m u savieckim MZS vyzvaliłasia pasada ataše ŭ adździele mižnarodnych arhanizacyj, i nieviadomy dabradziej — mo, dziakujučy spryjańni maci Łaŭrova — prapanavaŭ jahonuju kandydaturu.

Z taho času karjera dypłamata išła ŭvierch. Piać hadoŭ pracy ŭ centralnym aparacie MZS, siem hadoŭ u savieckim paŭnamocnym pradstaŭnictvie ŭ Ńju-Jorku, potym znoŭ u centralnym aparacie.

U 40 hadoŭ Łaŭroŭ uznačaliŭ upraŭleńnie mižnarodnych adnosin, a ŭ 1992-m ministr zamiežnych spraŭ Andrej Kozyraŭ zrabiŭ jaho svaim namieśnikam. U tyja časy pamiž Rasijaj i Zachadam nazirałasia poŭnaja harmonija. Kozyraŭ naohuł ličyŭsia ministram-libierałam. Ale Łaŭrova heta absalutna nie biantežyła.

Potym dypłamat dziesiać hadoŭ pracavaŭ u Ńju-Jorku — uznačalvaŭ pradstaŭnictva Rasii pry AAN. A ŭ 2004-m staŭ ministram i dahetul zachoŭvaje svaju pasadu.

17 hadoŭ na adnoj pasadzie

Andrej Hramyka

Andrej Hramyka

Stolki hadoŭ na adnoj pasadzie — vielizarny termin dla sučasnaha śvietu, dzie va ŭładzie rehularna źmianiajucca lidary i kamandy. Ale dla Rasii era Łaŭrova daloka nie samaja praciahłaja: biełarus Andrej Hramyka kiravaŭ savieckim MZS 28 hadoŭ. U časy Rasijskaj impieryi Karł Nieselrode i Alaksandr Harčakoŭ uznačalvali hetaje viedamstva, adpaviedna, 34 i 26 hadoŭ.

Va ŭsich hetych dypłamataŭ mielisia svaje plusy i minusy. Jadnała ich adno — asabistyja dobryja stasunki ź impieratarami i hiensiekami, jakija nie chacieli źmianiać ministraŭ, z-za čaho tyja kiravali viedamstvami ciaham usiaho pieryjadu kiravańnia manarchaŭ.

Ale akramia psichałahičnaj isnavali i inšyja pryčyny.

U historyi Rasii źniešniaja palityka zaŭždy źjaŭlałasia prerahatyvaj kiraŭnika dziaržavy. Heta mieła miesca ŭ časy impieryi i Savieckaha Sajuza, toje ž nazirajecca i ŭ niezaležnaj Rasii.

«Mnie časta kazali, što ŭ Rasii jość palityčny centr, jaki vyznačaje palityku ŭ dačynieńni da Ukrainy. Usie zakočvali vočy i kazali, što jość tolki jon i ad jaho ŭsio zaležyć», — raskazvaŭ žurnalistam Aleh Rybačuk, adzin z paplečnikaŭ ukrainskaha prezidenta Viktara Juščanki.Na ŭdakładnialnaje pytańnie jon adznačyŭ, što havorka pra Pucina. «Usie astatnija — druhasnyja centry».

Dla pracy na takoj pasadzie ŭ lepšym vypadku patrabavaŭsia adnadumiec, u horšym — vykanaŭca, ale nijak nie prychilnik samastojnaj linii (jak vyklučeńnie — Hramyka, ale jaho ŭpłyŭ uzrastaŭ praparcyjna chvarobam Leanida Brežnieva).

Pracazdolny, dobra padrychtavany, daśviedčany Łaŭroŭ byŭ svaim u čas zastoju i pierabudovy, libieralnych 1990-ch i kansiervatyŭnych dziasiatych, pry Pucinie, Miadźviedzievie i znoŭ pry Pucinie, a taksama pry ŭsich svaich papiarednikach na pasadzie ministra.

U 1990-ch jon razam z usim isteblišmientam siabravaŭ z Zachadam, a ŭ 2004-m — na fonie ŭkrainskaj «aranžavaj revalucyi» — abvinavaciŭ ABSIE ŭ tym, što arhanizacyja manipuluje vybarami na postsavieckaj prastory i zabiaśpiečvaje vynik, nieabchodny Zachadu. U nastupnym hodzie jon zajaviŭ u vuzkim kole sienataraŭ, što hałoŭnym resursam krainy źjaŭlajecca haz, nafta i elektraenierhija. Łaŭroŭ paabiacaŭ prymianiać ekanamičny cisk u dačynieńni da niedastatkova łajalnych krain SND, — pisała «Niezaležnaja hazieta».

U atmaśfiery novaj «chałodnaj vajny» Łaŭroŭ staŭ užyvać leksiku, jakaja dahetul ličyłasia nie nadta prystojnaj. Kali adbyŭsia kanflikt u Paŭdniovaj Asiecii, jon pracytavaŭ vykazvańnie pra Michaiła Saakašvili, jakoje nibyta ŭžyŭ adzin dypłamat. U hetych słovach prysutničaŭ mat.

Łaŭroŭ i Biełaruś

Jak źmianiałasia staŭleńnie Łaŭrova da Biełarusi? 19 žniŭnia 2020 hoda jon nazvaŭ prezidenckija vybary ŭ Biełarusi nieidealnymi.

Paśla rytualnaj krytyki Zachadu dypłamat zajaviŭ, što «biełarusy zmohuć sami razabracca ŭ svaich spravach i nie buduć iści za tymi, kamu Biełaruś patrebnaja, kab zasvojvać hieapalityčnuju prastoru». Łaŭroŭ adznačaŭ, što bačyć «hatoŭnaść uładaŭ da dyjałohu». U zajavie nie prahučała adnaznačnaj padtrymki Łukašenki, Maskva vyrazna namiakała na mahčymaść pieramoŭ.

U listapadzie 2020-ha Łaŭroŭ prylataŭ u Minsk, pieradaŭ Łukašenku pryvitańnie ad Pucina i nahadaŭ pra nieabchodnaść kanstytucyjnaj reformy, jakuju Pucin i Łukašenka abmiarkoŭvali ŭ vieraśni.

Ale potym rytoryka całkam źmianiłasia. Paśla incydentu z pasadkaj samalota Ryanair Maskva zaklikała aceńvać situacyju vakoł Biełarusi na ćviarozuju hałavu. Łaŭroŭ paabiacaŭ «nie pakinuć Biełaruś u biadzie» z-za źniešniaha cisku. Hety kurs całkam supadaŭ z pazicyjaj Kramla.

Mahčymyja pierajemniki

Siarhiej Naryškin

Siarhiej Naryškin

Stanisłaŭ Białkoŭski nazyvaje siarod mahčymych pierajemnikaŭ Łaŭrova dvuch asob: 66-hadovaha Siarhieja Naryškina i 49-hadovaha Antona Vajno.

Naryškin źjaŭlajecca vychadcam z KDB. Jon paznajomiŭsia z Pucinym jašče ŭ 1980-m, pracavaŭ ź im u sankt-pieciarburhskaj meryi. Źjaŭlaŭsia kiraŭnikom Administracyi prezidenta, śpikieram Dziaržaŭnaj dumy, zaraz kiruje źniešniaj raźviedkaj.

Palityčny analityk Arciom Šrajbman zhadvaŭ u prahramie «TOK» historyju 2010 hoda, kali Naryškin byŭ kiraŭnikom Administracyi prezidenta pry Dźmitryi Miadźviedzievie. «[Jany] zajavili, što nie vyznačylisia, kaho budziem padtrymlivać na hetych [prezidencich] vybarach [u Biełarusi]. Narod sam vyrašyć», — adznačaŭ analityk.

Mahčyma, havorka mienavita pra pazicyju Miadźviedzieva? Ale Naryškin byŭ i zastajecca čałaviekam Pucina. Tamu vykazaŭ chutčej ahulnuju pazicyju Kramla.

Vajno — syn Karła Vajno, jaki ŭ savieckija časy dziesiać hadoŭ kiravaŭ Estonskaj SSR, sioleta jamu spoŭniłasia 98 hadoŭ. Vajno-małodšy pa adukacyi dypłamat, pačynaŭ karjeru ŭ pasolstvie Rasii ŭ Japonii. Ale paśla niepraciahłaj pracy ŭ aparacie MZS pierajšoŭ va Upraŭleńnie pratakoła Administracyi prezidenta, dzie i zrabiŭ karjeru.

Anton Vajno

Anton Vajno

Kali kiravacca ŭzrostam i adukacyjaj, najbolš vierahodny pierajemnik Vajno. Kali pierajemnaściu, to chutčej havorka pra Naryškina. Bo dla jaho MZS stanie čarhovym etapam karjery, a dla Vajno takoje pryznačeńnie stanie panižeńniem.

Ale ŭ abodvuch vypadkach rašeńnie, jakoj budzie źniešniaja palityka našych uschodnich susiedziaŭ, budzie prymać Kreml.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?