«Heta aŭtamatyčnaja vypłata, a nie ŭznaharoda Minsku za štości, — piša analityk. — Takuju ž dapamohu dla baraćby z kavidam atrymali amal usie krainy śvietu praparcyjna svajoj vazie.
Vierahodna, jašče buduć sproby zabłakavać mahčymaść karystacca hetymi srodkami. Ale pakazalna, što Biełaruś nie pastavili ŭ adzin šerah z Mjanmaj, Afhanistanam i Vieniesuełaj, čyje ŭrady nie pryznajucca lehitymnymi.
Naohuł, pryznańnie lehitymnaści ŭłady — heta bolš palityčny, čym pravavy kanstrukt. Niama univiersalnych zakonaŭ ab (nie) pryznańni ŭ vypadkach, kali niejkaja hrupa ludziej trymaje ŭładu niezakonna. Usio prajaŭlajecca na praktycy, i ź jaje my razumiejem, što navat u vačach Zachadu mižnarodnaja nielehitymnaść — heta śpiektr, na jakim mohuć być całkam pryznanyja ŭrady z adnaho boku, a z druhoha — chunta ŭ Mjanmie. I bližej da Mjanmy buduć roznyja režymy ad talibaŭ da Madury, dzie kantakty na niejkim uzroŭni mahčymyja, ale aficyjnaja pazicyja pry hetym: «Vy nielehitymnaja ŭłada».
U Biełarusi ž, jak vyśviatlajecca, nie pryznali nie ŭsiu viertykal, a tolki Łukašenku jak prezidenta. Pamiž im i ŭradam u vačach Zachadu prachodzić niejkaja niabačnaja rysa. U vyniku astatnija viedamstvy biełaruskaj dziaržavy zachodni śviet praciahvaje ličyć uładaj, ź jakoj možna razmaŭlać i vieści spravy.
Kali sa žniŭnia 2020 hoda pradstaŭniki biełaruskaha ŭrada i Nacbanka zasiadali ŭ MVF, to što zdaryłasia ciapier, kab ich vyhaniać? Miarkujučy pa ŭsim, u arhanizacyi mienavita takaja łohika. Tamu ambasadary krain JEZ hatovyja ŭručać davierčyja hramaty pryznačanamu Łukašenkam ministru Makieju, ale nie hatovyja ŭručać ich samomu Łukašenku.
U hetym sensie łahičnaje pytańnie — a ci jość naohuł niejki praktyčny sens u niepryznańni Zachadam Łukašenki, kali adnoj rukoj Zachad zajaŭlaje pra heta, a druhoj — daje jahonym ministram miljard, chaj i nie žyvych hrošaj, ale taho, što možna vydatkavać na apłatu daŭhoŭ?
Sens zastajecca.
Losavyznačalnyja dla Biełarusi dakumienty i damovy, jakija budzie padpisvać sam Łukašenka, u vačach zachodnich krain i struktur buduć vałodać kudy mienšaj jurydyčnaj siłaj, čym toje, što padpisvajuć jahonyja ministry.
Tamu jak novaja Kanstytucyja pa vynikach refierendumu, tak i darožnyja karty pa intehracyi mohuć być ŭciahnutyja ŭ varonku zachodniaha niepryznańnia, tamu što da ich dakranułasia nie samaja lehitymnaja ruka (darečy, cikava, što budzie z pryznańniem ŭrada ci taho ž VNS paśla pryniaćcia hetaj novaj Kanstytucyi ).
A kali heta, naprykład, budzie prodaž niejkich stratehičnych aktyvaŭ abo raźmiaščeńnie ŭ krainie rasijskich vojskaŭ, heta paličać adnabakovym rasijskim aktam, što moža pahražać Maskvie (abo pakupnikam aktyvaŭ) sankcyjami.
Nu a pakul, vydača miljarda Minsku — jašče adna nahoda dla ćviarozaści ŭ nadziejach na žyvatvorčy Zachad. Ź inšaha boku, cikava pahladzieć, jak paśla hetaha dziaržprapahanda budzie raspaviadać, što MVF — pasłuchmiany sabačka Vašynhtona».
Adznačym, što dapamoha ad MVF nie aznačaje pastupleńnie čystych hrošaj, «čeki» MVF jašče treba kanviertavać u niejkuju realnuju valutu ŭ zamiežnym banku.
Daradca Cichanoŭskaj Franak Viačorka kamientavaŭ, što budzie rabić apazicyja, kali MVF usio ž taki vydzielić hrošy Biełarusi.
«Navat kali hetyja hrošy buduć vyłučanyja, my ŭsio jašče možam zrabić tak, kab ich nielha było abmianiać na ćviorduju valutu. Jość i inšy varyjant — vystavić umovy dla realizacyi hetych srodkaŭ. Naprykład, zrabić, kab hrošy možna było patracić tolki na vakcyny i aparaty štučnaj vientylacyi lohkich, ale ni ŭ jakim razie nie dapuścić, kab jany pastupili ŭ biudžet režymu».
Tym časam praŭładnyja ekśpierty i čynoŭniki ŭsio čaściej zajaŭlajuć, što za zakliki da sankcyjaŭ mohuć uvieści adkaznaść.
