Cichanoŭski byŭ nia zhodny z tym, što padatkovaja chacieła spahnać ź jaho padvyšany padatak za 900 tysiač dalaraŭ, jakija znajšli śledčyja na jahonym leciščy padčas pieratrusu 3-4 červienia 2020 hodu.

«Rašeńnie nie na našu karyść. Pačakajem matyvirovačnuju častku i budziem jaho abskardžvać», — paviedamiła advakatka Natalla Mackievič.

Heta značyć, što padatkovaja budzie spahaniać ź Siarhieja Cichanoŭskaha amal 258 tysiač biełaruskich rubloŭ.

Sudovaje pasiedžańnie prachodziła ŭ zakrytym režymie — pa chadajnictvie padatkovaj inspekcyi, jakaja vystupała ŭ jakaści adkazčyka. Pradstaŭniki padatkovaj inspekcyi spasyłalisia na toje, što «siły, srodki, metady i sposaby pracy padatkovaj źjaŭlajucca tajamnicaj, jakaja achoŭvajecca zakonam». Akramia taho, «u spravie jość infarmacyja ab majomasnym stanoviščy Siarhieja Cichanoŭskaha, jakoje źjaŭlajecca padatkovaj tajamnicaj».

Padatkovaja inspekcyja paličyła, što ŭ Cichanoŭskaha praz znojdzienyja za kanapaj 900 tysiač dalaraŭ vyjšła pieravyšeńnie dachodaŭ nad vydatkami ŭ sumie 1 młn 612 tysiač rubloŭ. Jamu naličyli amal 258 tys. rubloŭ padatku. Błohier pisaŭ u skarzie, što heta nie jahonyja hrošy, jon nia viedaje ab ich pachodžańni, nia moh ich raschodavać, bo znachodziŭsia i dahetul znachodzicca ŭ SIZA.

Cichanoŭski pad vartaj z 29 traŭnia 2020 hodu — kali jaho zatrymali ŭ Hrodnie na pikiecie pa zbory podpisaŭ za vyłučeńnie jahonaj žonki Śviatłany kandydatam u prezydenty. Błohieru inkryminavanyja: arhanizacyja masavych biesparadkaŭ u 2020 hodzie (č. 1 art. 293 Kryminalnaha kodeksu); raspaŭsiudžvańnie hrupaj asob pa papiaredniaj zmovie materyjałaŭ, nakiravanych na raspalvańnie sacyjalnaj varožaści suprać pradstaŭnikoŭ ułady i pravaachoŭnych orhanaŭ (č. 3 art. 130 KK); pahrozy na adras staršyni Centralnaj kamisii pa vybarach i praviadzieńni respublikanskich referendumaŭ Lidzii Jarmošynaj (č. 2 art. 191 KK); arhanizacyja hrupavych dziejańniaŭ, jakija hruba parušajuć hramadzki paradak i spałučajucca z užyvańniem hvałtu ŭ dačynieńni da pradstaŭnikoŭ ułady (č. 1 art. 342 KK).

Abvinavačańnie paličyła, što «ad dziejańniaŭ Cichanoŭskaha i astatnich abvinavačanych» dziaržavie była naniesiena škoda ŭ pamiery bolš jak 3 miljony rubloŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?