Na dniach himnastka Mielicina Staniuta vykłała ŭ Instagram fota, pryznačanyja, miarkujučy pa podpisie, dla ŭkrainskaj viersii časopisa Playboy. Što ž, nie tak adkryta, jak byvaje ŭ hetym vydańni, ale estetyčna!
Heta daloka nie pieršy vypadak, kali dziaŭčaty ź biełsportu abo jaho atačeńnia zdymajucca dla mužčynskich časopisaŭ — tak, i dla Playboy taksama.
Viktoryja Azaranka
U 2009-m tady jašče 19-hadovaja tenisistka, jakaja tolki ŭvajšła ŭ suśvietny top-10, zaśviaciłasia ŭ francuzskaj viersii časopisa dla mužčyn FHM. Azaranka kazała, što joj spadabaŭsia praces, ale treba było stroić ź siabie maniekien, što było ciažka. Mahčyma, tamu ŭ nastolki adkrytych fotasiesijach tenisistka bolš nie zdymałasia, navat kali stała čempijonkaj turniraŭ Vialikaha šlema i pieršaj rakietkaj śvietu.
Darja Domračava
Bijatłanistka, u karjery jakoj mnostva ŭznaharod, karystałasia papularnaściu siarod fatohrafaŭ biełaruskich hlancavych časopisaŭ. U 2010-m bronzavaja miedalistka Vankuviera zaśviaciłasia na vokładcy Pingouin.
A ŭ 2015-m užo trochrazovaja čempijonka Alimpijskich hulniaŭ stała tvaram numara Dolce Vita.
U 2016-m Domračava padziakavała za rabotu i vydatnuju vokładku časopisu Fashion Collection. Praŭda, zaŭziatary zajavili, što nie paznajuć spartsmienku na fota paśla apracoŭki.
Volha Barabanščykava
Viadomuju tenisistku padčas karjery pastajanna ŭklučali ŭ topy krasuń jaje sportu, i niadziŭna, što jana atrymała prapanovu zdymak ad Playboy. Ale na heta spartsmienka nie pahadziłasia: nie chacieła ahalacca całkam. Ale jarkija fotasiesii ŭ Barabanščykavaj usio roŭna jość. Adna ź ich — dla mužčynskaha časopisa XXL u 2010-m.
Alaksandra Vitus
Viadomaja pa proźviščy Sokał niekali futbalistka i ŭładalnica Kubka Biełarusi, zaviaršyŭšy karjeru z-za traŭmy, syšła ŭ madelny biznes praz prykład starejšaj siastry — i całkam paśpiachova, adrazu vyjhraŭšy konkurs z pryzam u vyhladzie zdymak dla časopisa XXL. Pryčym fotasiesija ŭ Sokał prajšła ź viadomym rasijskim šoŭmienam Cimuram Radryhiezam.
Dziaŭčynie prapanoŭvali źniacca dla Playboy, adnak da fota bieź bializny jana akazałasia nie hatovaja. Heta nie pieraškadžała źjaŭlacca ŭ inšych časopisach — voś, naprykład, bekstejdž vobrazu dla biełaruskaha Icon z 2015 hoda.
Daša Mart
Žonka eks-bramnika «Junactva» Alaksandra Baraduli nie saromiejecca pikantnych zdymkaŭ. I voś jana jakraz trapiła ŭ Playboy — a kankretna ŭ mieksikanskuju viersiju časopisa za studzień 2020-ha.
Anastasija Kasiankova
Byłaja žonka Alaksandra Hleba paznajomiłasia z mužam u 2006-m jakraz na jaskravaj fotasiesii dla časopisa — abaich uhavaryŭ na jaje były aŭtar «Presboła» Siarhiej Ščurko. Pa słovach Kasiankovaj, Hleb paźniej pryznaŭsia, što jamu było ciažka adoleć jurlivaść na zdymkach.
A ŭ 2014-m, užo paśla razvodu z futbalistam, śpiavačka i madel zaniała vokładku časopisa chakiejnaha «Dynama». Intervju da fotasiesii rabiŭ usio toj ža Ščurko.
Hanna Siedakova
Pieršaja žonka Valancina Bialkieviča ŭžo ŭ junym uzroście stała viadomaj śpiavačkaj i praciahvaje zastavacca papularnaj da hetaha času, tamu zdymak u časopisach u jaje było vielmi šmat. Jana i sama lubiła fotasiesii — nastolki, što dla časopisa Maxim u 2004-m paziravała na čaćviortym miesiacy ciažarnaści. Bialkieviču takaja aktyŭnaść była nie daspadoby, i zdymki stali adnoj z detalaŭ, sukupnaść jakich nie dazvoliła siamji doŭha isnavać.
Zdymałasia artystka i ŭ bolš adkrytym styli. A na vokładku rasijskaha Playboy traplała minimum try razy — adzin ź ich byŭ jašče padčas žyćcia ź Bialkievičam, a samy śviežy datavany kancom 2019-ha.
Volha Chižynkova
Eks-pres-sakratar bresckaha «Dynama» — simvał dabryni i lubovi da ludziej, pieraniesienaj praz usie vyprabavańni, navat kali heta 42 sutak za kratami va ŭmovach katavańnia. Tak što bolšaść fotasiesij Volhi — heta pra piaščotu, a nie erotyku. Ale siarod ich možna vyłučyć zdymku dla časopisa Icon u kancy 2014-ha. Zdajecca, vyšyvanka jašče nikoli nie vyhladała tak horača!
