25 sakavika pasolstva ZŠA pavinšavała biełarusaŭ z Dniom Voli.
«U ciapierašni čas tysiačy biełarusaŭ usich uzrostaŭ publična patrabujuć prava vyznačać los svajoj krainy. Mnohija płaciać vysokuju canu za sprobu zrabić svoj hołas pačutym, bo režym źviarnuŭsia da zapałochvańnia, hvałtu i ŭžyvańnia śmiarotnaj zbroi, kab utrymacca va ŭładzie, — adznačałasia ŭ zajavie. — …Złučanyja Štaty vinšujuć narod Biełarusi z 25 Sakavika i ź nieciarpieńniem čakajuć taho dnia, kali biełaruski narod zmoža samastojna vyznačać svaju budučyniu».
Siońnia u fejsbuku Ministerstva zamiežnych spraŭ źjaviŭsia kamientar.
«U suviazi z zajavaj pasolstva ZŠA ad 25 sakavika 2021 h. vykazvajem ščyruju ŭdziačnaść amierykanskamu boku za prajaŭlenuju narešcie hatoŭnaść pieravieści dvuchbakovuju rytoryku ŭ kanstruktyŭnaje rečyšča i za vinšavańnie sa značnaj dataj u historyi našaj krainy. Budziem tolki vitać raspaŭsiudžvańnie hetaj praktyki i na dziaržaŭnyja śviaty.
My pryznajom svaje pamyłki i karystajemsia vypadkam, kab prynieści prabačeńni za adsutnaść vinšavańniaŭ ź niadaŭnim 160-hodździem pryniaćcia Kanstytucyi Kanfiederatyŭnych Štataŭ Amieryki, ściah jakich pa-raniejšamu darahi šmatlikim amierykancam. Pry hetym ruch BLM pa ŭsioj krainie naličvaje dziasiatki miljonaŭ udzielnikaŭ.
Na žal, siońnia amierykanskaje hramadstva hłyboka raskołataje, jak zajaviŭ Dž. Bajden: «Ja całkam zasiarodžany na tym, kab abjadnać Amieryku, abjadnać naš narod, abjadnać našu nacyju… Siły, jakija padzialajuć nas, vielmi hłybokija i mocnyja… Davajcie pačniom spačatku. Davajcie pačniom słuchać adno adnaho, usprymać adno adnaho, bačyć adno adnaho»…
My taksama padtrymlivajem pamknieńni amierykanskaha naroda da lepšaj budučyni — u hety dzień i kožny dzień! Tamu ličym, što tolki sapraŭdny inkluziŭny dyjałoh dapamoža amierykanskaj nacyi abjadnacca ŭ hety składany momant historyi. U jakaści bieskaryślivaha žestu dobraj voli Biełaruś, majučy dośvied placoŭki pieramoŭ u ramkach TKH, hatovaja prapanavać svaje pasłuhi ŭ spravie arhanizacyi takoha pracesu. My akažam luboje pasilnaje sadziejničańnie, u tym liku z pryciahnieńniem našych partnioraŭ pa intehracyjnych strukturach.
Choć prajšło bolš za dva stahodździ z momantu abviaščeńnia niezaležnaści, apošnija padziei ŭ ZŠA pakazvajuć, što baraćba amierykancaŭ za svabodu ŭsio jašče praciahvajecca. U ciapierašni čas sotni tysiač amierykancaŭ usich uzrostaŭ publična patrabujuć prava vyznačać los svajoj krainy. Mnohija płaciać vysokuju canu za sprobu zrabić svoj hołas pačutym, bo dziejnaj administracyi pryjšłosia navat prymianić śmiarotnuju zbroju i zastrelić niekalki čałaviek, kab utrymacca va ŭładzie i zamacavać vyniki vybaraŭ.
My zachaplajemsia mužnaściu i rašučaściu amierykanskich hierojaŭ, siarod jakich Dž.Asandž, E. Snoŭden i Č. Meninh, jakija achviaravali praktyčna ŭsim dziela sapraŭdnaj svabody i harmonii ŭ amierykanskim hramadstvie.
Biełaruś razam z amierykanskim narodam ź nieciarpieńniem čakaje taho dnia, kali prosty amierykaniec zmoža svabodna i bieśpieraškodna špacyravać kala Kapitolija.
My ŭdziačnyja pryznačanamu Pasłu ZŠA ŭ Biełarusi Dž.Fišer za nieacennuju padkazku ŭsiamu biełaruskamu narodu, kali i jakim čynam treba pravodzić vybary. Biezumoŭna, naša biełaruskaje prymityŭnaje i biednaje myśleńnie nikoli b nie dazvoliła nam samim vyrašyć hetaje pytańnie. U znak niejmaviernaj udziačnaści MZS hatovy pa-za čarhoj pryniać zajaŭku jaje pravaschadzicielstva na atrymańnie biełaruskaha hramadzianstva, kab uklučyć jaje ŭ śpis vybarščykaŭ i dać mahčymaść udzielničać u hałasavańni. Heta ž možna zrabić i biez hramadzianstva na jakoj-niebudź pryznanaj Dž.Fišer elektronnaj płatformie.
My nie možam nie adreahavać i na praciahnutuju amierykanskim bokam ruku dapamohi ŭ praviadzieńni vybaraŭ. Takija dasiahnieńni amierykanskaj vybarčaj sistemy jak hałasavańnie pa pošcie i Kalehija vybarščykaŭ zamiest pramoha volevyjaŭleńnia mohuć być zapatrabavanyja i vyvučanyja biełaruskim bokam.
Hłyboka prasiaknuŭšysia ŭvahaj ZŠA da losu Biełarusi, u jakaści kroku ŭ adkaz my možam unieści bieskaryślivy ŭkład u raźvićcio sielskaj haspadarki Alaski i efiektyŭnaje zasvajeńnie jaje ziamiel. U hetaj suviazi hatovyja razhledzieć mahčymaść sumiesnaha kiravańnia hetaj terytoryjaj.
Mahli b pierakinuć biełaruskija budaŭničyja arhanizacyi, jakija znachodziacca ŭ rehijonie, dla pieradačy vopytu i dapamohi žycharam paŭdniovych štataŭ u pieraadoleńni nastupstvaŭ pryrodnaj stychii.
Ščyra zyčym usiamu amierykanskamu narodu adzinstva, a taksama, nie spatykajučysia, padymacca ŭvierch pa leśvicy amierykanskaj mary.
Spadziajomsia, što pazityŭny trend u našych adnosinach zachavajecca i my sumiesna padydziem da taho momantu, kali zmožam z radaściu sustrakać šosty fłot ZŠA la marskich miežaŭ Biełarusi!»
U Ministerstvie zamiežnych spraŭ žurnalistam Tut.by paćvierdzili, što heta nie žart.
