Pa słovach Trockaha, jaho mašynu biespadstaŭna spynili ludzi ŭ ciomnym i bałakłavach, a kali jon, bajučysia za svajo žyćcio, admoviŭsia vyjści z mašyny, supracoŭnik DAI «dastaŭ bajavuju zbroju i nakiravaŭ u jaho bok, pryceliŭsia prosta ŭ hałavu i padrychtavaŭsia stralać».

Paśla zatrymańnia Trockaha mocna źbili. Z čerapna-mazhavoj traŭmaj pad kanvojem i ŭ kajdankach jon pravioŭ u špitali try tydni. Zatym Alaksandra Trockaha pieraviali ŭ SIZA-1 pa kryminalnaj spravie za hvałt u dačynieńni da milicyjanta (art. 364 KK). Ale pierad pieradačaj spravy ŭ prakuraturu śledčyja pierakvalifikavali abvinavačańnie na bolš žorstkaje — zamach na zabojstva supracoŭnika orhanaŭ unutranych spraŭ. Sprava razhladajecca pad staršynstvam sudździ Siarhieja Chrypača. Paciarpieły supracoŭnik DAI Juraŭ na pieršaje pasiadžeńnie nie źjaviŭsia, bo chvareje na COVID-19.

U čym abvinavačvajuć mužčynu?

Pavodle abvinavačvańnia, kiroŭca Alaksandr Trocki ŭ pieryjad času z 19:50 da 19:55 12 žniŭnia na prajeznaj častcy na praśpiekcie Pieramožcaŭ pa kirunku vulicy Mielnikajte i praśpiekta Mašerava spyniŭ svoj aŭtamabil «Škoda-kadziak» pa zakonnym patrabavańni supracoŭnika DAI majora milicyi Jurava. Na nieadnarazovyja patrabavańni supracoŭnika AMAPa zahłušyć ruchavik, vyjści z aŭtamabila, adčynić bahažnaje adździaleńnie dla ahladu Trocki kateharyčna admoviŭsia ŭ hrubaj formie. Pry hetym «ruchavik naŭmysna nie zahłušyŭ, z aŭtamabila nie vyjšaŭ, bahažnaje adździaleńnie dla nadhladu nie pakazaŭ». Zatym Trocki, praciahvajučy znachodzicca ŭ aŭtamabili, «majučy na mecie ździajśnieńnie zabojstva supracoŭnika orhanaŭ unutranych spraŭ Jurava, žadajučy pieraškodzić jaho zakonnaj dziejnaści, z pomsty Juravu za vykanańnie im abaviazkaŭ pa zabieśpiačeńni achovy hramadskaha paradku, vykarystoŭvajučy ŭ jakaści pryłady zabojstva krynicu padvyšanaj hramadskaj niebiaśpieki — aŭtamabil «Škoda-kadziak», naŭmysna pačaŭ ruch na Jurava, jaki stajaŭ kala kapota».

Pavodle abvinavačvańnia, kali supracoŭnik DAI ŭpaŭ na kapot i stuknuŭsia ciełam ab aŭtamabil, z metaj realizacyi zabojstva Jurava Trocki naŭmysna praciahnuŭ ruch na aŭtamabili, kali toj byŭ na kapocie, «tym samym majučy namier na jaho zabojstva». Davieści da kanca zabojstva Jurava Trocki nie zmoh pa niezaležnych ad jaho abstavinach, pakolki paciarpieły ŭ momant najezdu znachodziŭsia ŭ broniekamizelcy. Juraŭ pierakaciŭsia pa kapocie aŭtamabila, jaki ruchaŭsia, i ŭpaŭ na prajeznuju častku. Paśla najezdu Trocki źnik ź miesca zdareńnia. Takim čynam, na dumku dziaržabvinavaŭcy, Trocki ździejśniŭ zamach na zabojstva supracoŭnika orhanaŭ unutranych spraŭ u suviazi z vykanańniem im abaviazkaŭ pa achovie hramadskaha paradku — č. 1 art. 14 art. 362 Kryminalnaha kodeksa.

Jakija traŭmy byli naniesienyja paciarpiełamu?

Zhodna z materyjałami spravy, supracoŭniku DAI Juravu ŭ vyniku dziejańniaŭ Trockaha naniesienyja krovapadcioki pravaha pieradplečča, levaj bakavoj pavierchni tułava, drapina na pravaj stupni, što adnosicca da cialesnych paškodžańniaŭ, jakija nie paciahnuli za saboj karotkačasovaha rasstrojstva zdaroŭja.

Mužčyna całkam vinu nie pryznaje.

Što kaža na sudzie sam Trocki?

Alaksandr Trocki ŭ sudzie admoviŭsia adkazvać na pytańni dziaržabvinavaŭcy, a začytaŭ svaju pazicyju z raniej padrychtavanaha im lista. Jon adrazu zajaviŭ, što vinu nie pryznaje.

Trocki raspaviadaje, što 12 žniŭnia jon viartaŭsia dadomu z pracy. Jon chacieŭ vyjechać na MKAD, ale darohi ŭ horadzie byli pierakrytyja.

«Adzinym aptymalnym maršrutam było vyjechać na MKAD — praśpiekt Pieramožcaŭ. Kali ja ruchaŭsia pa praśpiekcie, ja źviarnuŭ uvahu na hrupu ludziej u ciomnym adzieńni i bałakłavach, jakija znachodzilisia na krai prajeznaj častki. U niekatorych ź ich u rukach była zbroja. Adzin ź ich vyjšaŭ na prajeznuju častku nasustrač majmu aŭtamabilu. Jon pieraharadziŭ šlach i žestam ruki padaŭ kamandu spynicca. Ja padparadkavaŭsia hetamu patrabavańniu. Jak dalej vyśvietliłasia, hetyja ludzi ŭ ciomnym adzieńni i sa schavanymi bałakłavami asobami byli supracoŭnikami milicyi. Da dźviarej kiroŭcy padyšoŭ supracoŭnik, jaki mnie pieraharadziŭ ruch i padaŭ sihnał ab spynieńni. Jak dalej vyśvietliłasia, heta byŭ supracoŭnik AMAPa Karota. Jon u ahresiŭnaj formie, nie pradstaviŭšysia, biez tłumačeńnia pryčyn zapatrabavaŭ vyjści z aŭtamabila. U hety momant da majho aŭtamabila padyšli inšyja supracoŭniki, tvary jakich byli schavanyja bałakłavami. Pry hetym, ustanavić, što heta supracoŭniki AMAPa, a adzin ź ich byŭ supracoŭnik DAI — było niemahčyma. Pryčynu spynieńnia mnie nie abviaścili. Juraŭ da mianie naohuł nie padychodziŭ i da mianie nie źviartaŭsia.

«Pryceliŭsia mnie prosta ŭ hałavu i padrychtavaŭsia stralać»

Bajučysia za svaju biaśpieku z pryčyny ahresiŭnaści hetych asob, ja spytaŭ u Karoty, ci mahu ja zastavacca ŭ aŭtamabili. Nijakaj nieabchodnaści vychodzić z aŭtamabila nie było. Nijakaha pravaparušeńnia ja nie ździajśniaŭ, nichto nie abviaściŭ mnie, što ja zatrymany i pavinien vyjści z aŭtamabila. U hety momant Karota pasprabavaŭ adčynić dźviery kiroŭcy zvonku, ale jany akazalisia zabłakavanaja. Tady Karota jašče ŭ bolš ahresiŭnaj formie zapatrabavaŭ vyjści z aŭtamabila i adkryć bahažnik. Adnačasova adzin supracoŭnik, jaki znachodziŭsia z pravaha boku ad mianie, pasprabavaŭ adčynić pravyja pasažyrskija dźviery, ale jany taksama byli zabłakavanyja. Ja adkazaŭ Karocie, što mnie strašna i ja bajusia vychodzić z aŭtamabila, a adčynić bahažnik možna nie vychodziačy z aŭtamabila. Pry hetym ni adnaho hrubaha abo maciernaha słova ja nie skazaŭ. Dalej Karota rezka zrabiŭ sprobu adčynić dźviery kiroŭcy. Jon zasunuŭ ruku ŭ pryadčynienaje akno i pasprabavaŭ vybić akno łokciem. Pry hetym mnie nichto nie paviedamiŭ, što ŭ dačynieńni da mianie moža być užytaja fizičnaja siła abo śpiecsrodki.

Adrazu ž paśla niaŭdałaj sproby vybić škło Karota padaŭ sihnał i supracoŭniki, jakija stajali vakoł aŭtamabila, nakiravali zbroju ŭ moj bok. Adnačasova supracoŭnik DAI Juraŭ staŭ napieradzie mašyny za 1,5 mietra, dastaŭ bajavuju zbroju i nakiravaŭ u moj bok, pryceliŭsia mnie prama ŭ hałavu i padrychtavaŭsia stralać». 

Skrynšot ź videa SK. Jak miarkujecca, na im paciarpieły supracoŭnik DAI. U rukach jon trymaje zbroju

Skrynšot ź videa SK. Jak miarkujecca, na im paciarpieły supracoŭnik DAI. U rukach jon trymaje zbroju

«Supracoŭnik DAI, sprabujučy spynić aŭtamabil, skoknuŭ ciełam na kapot»

Pa słovach Alaksandra, inšy supracoŭnik z pradmietam u rukach, padobnym na małatok, nakiravaŭsia da pasažyrskich dźviarej.

«Mocna spałochaŭšysia za svajo žyćcio, ja prosta pasprabavaŭ źjechać ź miesca prypynku. Dla čaho vyviernuŭ rul maksimalna naleva, kranuŭsia ź miesca, sprabujučy nikoha nie zakranuć. Pry hetym Juraŭ, napeŭna, sprabujučy spynić aŭtamabil, skoknuŭ ciełam na kapot, paśla čaho skaciŭsia ŭ bok, a ja vyjechaŭ na pałasu ruchu i pasprabavaŭ źjechać. Pa aŭtamabili adkryli ahoń, pačali stralać. Było zrazumieła, što pa aŭtamabili było zroblena značna bolš za try streły».

«Mianie žorstka i biespadstaŭna źbili»

Jak raspaviadaje Alaksandr, na bližejšym skryžavańni jon spyniŭ aŭtamabil i chacieŭ źviarnucca ŭ milicyju, ale ŭ hety čas jaho spyniŭ inšy ekipaž DAI.

«Ja vyjšaŭ z aŭtamabila, mianie žorstka i biespadstaŭna źbili, a aŭtamabil paškodzili. Paśla hetaha mianie nieadnarazova źbivali z užyvańniem dubinak, pistaleta i z užyvańniem hazavaha bałončyka, raspyliŭšy mnie jaho ŭ tvar. Praktyčna z samaha pačatku źbićcia samastojna pierasoŭvacca ja ŭžo nie moh».

«Ja prosta chacieŭ źjechać, bo spałochaŭsia za svajo žyćcio»

Trocki jašče raz źviarnuŭ uvahu suda, što namieru na zabojstva ŭ jaho nie było, a ŭsie jaho dziejańni źviazanyja tolki z tym, što jon «realna bajaŭsia za svajo žyćcio, bo absalutna biespadstaŭna na jaho była nakiravanaja bajavaja zbroja i supracoŭniki milicyi padrychtavalisia stralać».

«Pry hetym z dvuch bakoŭ biez tłumačeńnia pryčyn asoby ŭ čornaj vopratcy, sa schavanymi tvarami i biez apaznavalnych znakaŭ stali vyłomlivać dźviery aŭtamabila. Ja dapuskaju, što ŭ vyniku maich dziejańniaŭ byli pryčynienyja cialesnyja paškodžańni Juravu, adnak namieru ŭ mianie na heta nie było. Ja prosta chacieŭ źjechać, bo spałochaŭsia za svajo žyćcio».

Taksama Alaksandr Trocki adznačyŭ, što jon raniej nie viedaŭ Jurava, tamu nie moh jamu pomścić za što-niebudź ci adčuvać da jaho niepryjaznyja adnosiny.

«Prašu sud vynieści apraŭdalny prysud. Na pytańni admaŭlajusia adkazvać, karystajučysia svaim pravam», — skazaŭ naprykancy Alaksandr.

Što adbyłosia paśla incydentu?

12 žniŭnia pres-sakratarka MUS Volha Čamadanava ŭ Telegram-kanale paviedamiła, što supracoŭniku milicyi akazana miedycynskaja dapamoha i jon dastaŭleny ŭ miedustanovu. Adnak pra toje, što i kiroŭca «Škody» Alaksandr Trocki byŭ dastaŭleny ŭ balnicu paśla źbićcia, Čamadanava zmaŭčała.

U 5-j kliničnaj balnicy mužčyna znachodziŭsia try tydni. Za hety čas u pałatu da Alaksandra nikoha z rodnych nie puścili. Jon byŭ prykuty kajdankami da łožka, jaho achoŭvaŭ kanvoj. Treciaha vieraśnia Alaksandra ź lakarni pieraviali ŭ SIZA № 1 na vulicy Vaładarskaha, dzie jon znachodzicca i ciapier. Iryna raspaviadaje, što jaje muž u listach piša, što ciapier «zdaroŭje niadrennaje». 

U dačynieńni da Alaksandra adrazu raspačali kryminalnuju spravu pavodle art. 364 Kryminalnaha kodeksa — hvałt u dačynieńni da supracoŭnika orhanaŭ unutranych spraŭ. Adnak u śniežni — pierad pieradačaj spravy ŭ prakuraturu — abvinavačvańnie pierakvalifikavali. Ciapier Alaksandra Trockaha abvinavačvajuć pa č. 1 art. 14 art. 362 Kryminalnaha kodeksa — zamach na zabojstva supracoŭnika orhanaŭ unutranych spraŭ u suviazi z vykanańniem im abaviazkaŭ pa achovie hramadskaha paradku.

Sankcyja artykuła 362 Kryminalnaha kodeksa praduhledžvaje pakarańnie ŭ vyhladzie pazbaŭleńnia voli na termin ad dziesiaci da dvaccaci piaci hadoŭ, pažyćciovaje źniavoleńnie, śmiarotnaje pakarańnie. Zhodna z č. 2 art. 14 KK adkaznaść za zamach na złačynstva nastupaje pa tym ža artykule Kodeksa, što i za zakončanaje złačynstva.

Što adbyvajecca na sudzie?

Paciarpieły supracoŭnik DAI Juraŭ na pieršaje pasiadžeńnie nie źjaviŭsia, bo chvareje na COVID-19. Z materyjałaŭ spravy stała viadoma, što Alaksandr Trocki pisaŭ zajavy na ŭzbudžeńnie kryminalnaj spravy ŭ dačynieńni da Jurava pa nastupnych artykułach:

  • Naŭmysnaje pryčynieńnie ciažkaha cialesnaha paškodžańnia (art. 147);
  • Pieravyšeńnie ŭłady abo słužbovych paŭnamoctvaŭ (art. 426 KK).

Ale pa ŭsich artykułach śledčyja nie našli padstaŭ dla zaviadzieńnia kryminalnaj spravy ŭ adnosinach da supracoŭnika DAI.

«Źbivali i zasoŭvali pistalet u rot»

Na sudzie ahučyli pakazańni Trockaha, dadzienyja im padčas papiaredniaha śledstva ŭ 5-aj balnicy. Jon zajaŭlaŭ, što jamu pahražali zabojstvam, źbivali i zasoŭvali pistalet u rot, pryvodzili ŭ pačućcio našatyram i praciahvali źbivać, ledź nie trapiŭ u komu.

«Mnie byli naniesienyja ciažkija cialesnyja paškodžańni hrupaj asob», — zafiksavana ŭ pratakołach dopytu.

Sudździa zadaŭ pytańnie, čamu ŭ pakazańniach padčas śledstva Trocki nie ŭkazaŭ ab najeździe i supracivie. Trocki admoviŭsia ad adkazu.

Padčas śledstva, kali stan zdaroŭja Alaksandra staŭ lepšym, Trocki pahadziŭsia dać pakazańni, ale adrazu zajaviŭ ab tym, što namieru ŭ jaho nie było, a ŭsio toje, što adbyłosia — čystaja vypadkovaść.

Śledčyja zapytvalisia ŭ jaho, čym jon zajmaŭsia 9, 10, 11 žniŭnia, ale Trocki adkazvaŭ, što nie pamiataje, ale ŭdziełu ŭ mitynhach i biesparadkach jon nie prymaŭ. 

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?