Dyjahrama: dzionnaja kolkaść vyjaŭlenych zaražeńniaŭ (źleva) i kolkaść śmierciaŭ ad kavidu (sprava) u śviecie. Apošni miesiac fiksujecca źnižeńnie i kolkaści vypadkaŭ, i śmiarotnaści. Hrafiki worldometers.info.
Ličby Suśvietnaj arhanizacyi achovy zdaroŭja (SAAZ) pakazvajuć, što na apošnim tydni kolkaść novych zaražeńniaŭ skłała 267 miljonaŭ — heta na 16% mienš, čym na minułym tydni. Hetaja ličba skaračajecca piaty tydzień zapar, mienš i pamierłych ad chvaroby.
Chutčej za ŭsio ličby źnižajucca ŭ Afrycy i krainach zachodniaj častki Cichaakijanskaha rehijona, krainaj z najvialikšym spadam novych zachvorvańniaŭ stała Mjanma.
Adzinym rehijonam, dzie kolkaść novych vypadkaŭ kavidu raście, źjaŭlajecca Uschodniaje Mižziemnamorje.
Statystyka pakazvaje, što śviet užo pierajšoŭ pik druhoj chvali pandemii.
Pa słovach dyrektara SAAZ Tedrasa Hiebrejesusa, spad u ličbach demanstruje efiektyŭnaść prostych mier prafiłaktyki — takich, jak našeńnie masak.
Ale ekśpierty padkreślivajuć: pryncypy baraćby z pandemijaj vielmi adroźnivalisia ŭ roznych krainach, adnak kolkaść novych vypadkaŭ i novych śmierciaŭ padaje va ŭsim śviecie.
Prafiesar Sajman Kłark z brytanskaha ŭniviersiteta Rydynha patłumačyŭ dla «Dejli mejł», što vakcynacyja ad kavidu pakul achapiła tolki nievialikuju dolu nasielnictva, kab heta mahło paŭpłyvać na suśvietny ŭzrovień zachvorvańnia. U toj ža čas Kłark bačyć dva racyjanalnyja tłumačeńni spadu. Ën miarkuje, što adnoj z pryčyn moža być siezonnaść.
Maroznaja zima hetaha hoda ŭ Paŭnočnym paŭšarji i letniaja śpioka ŭ Paŭdniovym paŭšarji časova zatarmazili raspaŭsiud virusaŭ. Inšaj pryčynaj źmianšeńnia ličbaŭ, jak ličyć ekśpiert, moža być efiekt karancinnych mier, u pryvatnaści, abmiežavańnie na padarožžy.
Usiaho na hety momant u śviecie ad kavidu, pavodle aficyjnaj statystyki, pamierła amal 2,5 miljona čałaviek. Realnaje ž žnivo śmierci našmat vyšejšaje. Kali ŭ krainach Zachodniaj Jeŭropy, ZŠA i Łacinskaj Amieryki kolkaść uličanych śmierciaŭ ad kavidu i «lišniaj śmiarotnaści» razychodzicca minimalna, to ŭ niekatorych krainach byłoha SSSR i Azii hetaja roźnica składaje razy i navat dziasiatki razoŭ. Tak, sa statystyki, pieradadzienaj Biełaruśsiu ŭ AAN, stała viadoma, što ŭ našaj krainie «lišniaja śmiarotnaść» u druhim kvartale 2020 hoda pieravyšała aficyjnyja straty ad karanavirusa ŭ 14,7 razu.
Unutry Biełarusi ŭ minułym hodzie statystyka śmiarotnaści, jak i zachvorvańnia na pnieŭmanii, była zasakrečanaja.
Spynić pandemiju maje masavaja vakcynacyja, jakuju pačali dziasiatki krain na roznych kantynientach. Lidary pa vakcynacyi na siońnia — Izrail, Abjadnanyja Arabskija Emiraty i Brytanija. Jeŭrasajuz maje namier całkam vakcynavać nasielnictva da kanca leta. U Biełarusi pakul pieršaj dozaj vakcynavanyja tolki miedyki.
Jeŭrasajuz vykarystoŭvaje dla vakcynacyi niamiecka-amierykanskuju vakcynu Pfizer. Ukraina, imavierna, zrobić staŭku na kitajski Sinovac. Biełaruś, pa słovach pradstaŭnikoŭ uładaŭ, maje pryščaplać rasijskaj vakcynaj Sputnik V, jakaja łabaratorna taksama pakazała vysokuju efiektyŭnaść.
