Arciom byŭ abvinavačany pavodle dvuch artykułaŭ Kryminalnaha kodeksa: č. 1 art. 342 i 364. Dziejańniami, jakija hruba parušajuć hramadski paradak, abvinavačvańnie i sud paličyli ŭdzieł Arcioma ŭ akcyi 14 lipienia, vykrykvańnie na joj łozunhaŭ, «hučnyja vopleski rukami», nievykanańnie patrabavańnia supracoŭnikaŭ milicyi «razyścisia».
Paciarpiełym pa spravie pryznany supracoŭniki minskaha AMAPa — Vital Samalotaŭ. Jon užo vystupaŭ paciarpiełym pa spravie Illi Frenia, jakoha sud Maskoŭskaha rajona 24 śniežnia adpraviŭ na 4 hady «kałonii».
Hvałt u dačynieńni da supracoŭnika AMAPa vyjaviŭsia ŭ tym, što Paŭlečka «nanios udar nahoj u hrudzi Vitalu Samalotavu, pryčyniŭšy jamu fizičny bol».
Arciom Paŭlečka pryznaŭ svaju vinu ŭ poŭnym abjomie.
Arcioma zatrymali 14 lipienia na akcyi supracoŭniki ŭ cyvilnym adzieńni. Na jaho skłali dva pratakoły pa art 23.34 i 23.4 KaAP, pa jakim Leninski sud asudziŭ jaho na 13 sutak. Paśla hetaha administracyjnaha aryštu Arciom na volu nie vyjšaŭ: jaho advieźli ŭ Śledčy kamitet, a potym u IČU na Akreścina.
Arciom Paŭlečka na sudzie raspavioŭ, što ŭviečary 14 lipienia špacyravaŭ pa horadzie ź siabram i jahonaj siabroŭkaj. Kali jany byli kala st. m. Kastryčnickaj, to ŭbačyli natoŭp, jaki ruchaŭsia da Płoščy Pieramohi i vykrykvała «Žyvie Biełaruś», «Poka my jediny — my niepobiedimy». Pa słovach Arcioma, jon paddaŭšysia dziejańniu natoŭpu, vyrašyŭ pajści za imi. Ale, jak śćviardžaŭ Paŭlečka na sudzie, jon nie viedaŭ, što heta mitynh:
«Ja nie znachodžusia ni ŭ jakich telehram-kanałach, hrupach, źviazanych z palityčnymi temami. Tamu ja nie viedaŭ, što budzie mitynh».
Jak raspavioŭ Arciom, kali jon dałučyŭsia da kałony, to razam ź ludźmi ŭ joj plaskaŭ u dałoni, kryčaŭ łozunhi, simvoliki ŭ jaho nijakaj nie było, ale kali pačuŭ patrabavańni ad supracoŭnikaŭ milicyi razyścisia — vyrašyŭ syści. Kali jon adyšoŭ, to AMAP pačaŭ zatrymańni, pačałasia bojka z pratestoŭcami.
«Ja ŭbačyŭ heta i vyrašyŭ viarnucca, kab, jak i ŭsie ludzi, dapamahčy zatrymanym. Ja padbieh i zrabiŭ namach nahoj na supracoŭnika AMAPa. Jon byŭ na ziamli, stajaŭ na kaleniach, a vakoł jaho było šmat ludziej, jakija vyrablali niejkija dziejańni. Ale ja nie mahu skazać, ci ažyćciaŭlaŭ ja kankretna niejkija ŭdary, tak jak vakoł było šmat ludziej. Ja ničoha nie adčuŭ», — raspaviadaje Arciom Paŭlečka na sudzie.
14 studzienia Arciom u svoj dzień naradžeńnia pramaŭlaŭ apošniaje słova, u jakim skazaŭ, što raskajvajecca i paprasiŭ prabačeńnia ŭ paciarpiełaha supracoŭnika AMAPa. Arciom sam z horada Lelčycy. Pryjechaŭ u Minsk niadaŭna, bo ŭ Lelčycach nie było pracy pa jaho śpiecyjalnaści. Jon skazaŭ, što choča praciahnuć navučańnie ŭ univiersitecie i zajmacca lubimym chobi.
«Vysoki sud, prašu nie pazbaŭlać mianie svabody i dać pakarańnie mnie miakčej», -— skazaŭ u apošnim słovie Arciom Paŭlečka.
Dziaržaŭny abvinavaŭca paprasiŭ sud pakarać Arcioma na padstavie č. 1 art. 342 i 364 KK tryma hadami pazbaŭleńnia voli. Sudździa Julija Hustyr pryznačyła mienavita takoje pakarańnie, jakoje prasiŭ prakuror.
