Iryna da Kaladaŭ vyrašyła ŭpryhožyć svajo vakno bieł-čyrvona-biełymi śniažynkami.
«Ściah my nie vyviešvali, bo raptam što. Padumali, što śniažynki — heta nie zabaroniena. Chacieli takim čynam vykazać svaju pazycyju, kab bačyli susiedzi i ludzi, jakija prachodziać poruč, kab bačyli, što nas šmat. U nas na susiednich voknach arkušy papiery visiać, ale našy śniažynki nie spadabalisia najbolš», — raskazvaje Iryna.
«Nočču ŭ vakno kinuli hajki»
Za śniažynki ŭ vakno Iryny ŭnačy prylacieli hajki, vakno raźbitaje.
«Heta było a pałovie na treciuju nočy. My spali ŭ pakoi, kali prylacieli dźvie hajki. My vyklikali milicyju. U milicyi adrazu ŭdakładnili, ci visieła ŭ vaknie «niezarehistravanaja symbolika»», — pryhadvaje Iryna.
Haspadary kvatery acanili škodu ad dziejańniaŭ nieviadomych u 270 rubloŭ.
«Sfatahrafavali ŭsiu kvateru»
U milicyi nie paličyli patrebnym šukać tych, chto kidaŭ u vakno hajki. U adkazie z Maskoŭskaha RUUSa paviedamili, što «asoby vykazali niazhodu z raźmiaščeńniem u vaknie vobrazu bieł-čyrvona-biełaha ściaha». Kali pryjechali, adfatahrafavali ŭsiu kvateru.
«U chodzie pravierki orhan kryminalnaha pieraśledu prychodzić da vysnovy, što ŭ ciapierašni čas, u suviazi z palityčnymi padziejami ŭ krainie, siarod asobaŭ ź liku hramadzianskaj supolnaści, majucca asoby, jakija nehatyŭna staviacca da bieł-čyrvona-biełaj symboliki», — havorycca ŭ adkazie ź milicyi.
Iryna čakała padobnaha, ale nie čakała, što spravu navat nia buduć zavodzić.
«My zrazumieli, što dalej damahacca spraviadlivaści biessensoŭna. My raźličvali, što šukać hetych ludziej nia buduć, ale nie čakali, što pravierka skončycca tak chutka, što spravu navat nie zaviaduć», — kaža Iryna.
Śniažynki pravisieli dva dni, šyby pabili ŭ noč na Kalady. Užo praz 5 dzion u milicyi vyrašyli, što nijakaha składu złačynstva ŭ tym, što adbyłosia, niama. Paźniej Iryna atrymała zapisy z kamer videanazirańnia na domie, i tam bačna, što hajki ŭ vakno kidała hrupa ludziej u maskach.
